Distrito nga Kombension—Tion sang Malipayon nga Pagsimba

1. Paano ang mga kapiestahan sa Israel kaanggid sa aton distrito nga kombension?

¹ Regular nga nagakadto sa Jerusalem sanday Jose, Maria, ila kabataan, kag iban pa para magtambong sa mga kapiestahan kada tuig. Sa sini nga mga okasyon, ginabayaan nila kag sang iban pa nga sumilimba ang ila mga hilikuton kada adlaw agod talupangdon ang mas importante nga espirituwal nga bahin sang ila kabuhi. Sa mga kapiestahan, may tion sila sa pagpamalandong sa kaayo ni Jehova kag sa pagbinagbinag sang iya Kasuguan. Ang aton nagahilapit nga distrito nga kombension nagahatag sing kaanggid nga mga kahigayunan para sa malipayon nga pagsimba kay Jehova.

2. Ano nga mga paghanda ang aton himuon para sa nagahilapit nga distrito nga kombension?

² Kinahanglan ang Paghanda: Kinahanglan nga maglakbay ang pamilya ni Jesus sing mga 200 kilometros pakadto-pakari gikan sa Nazaret pa Jerusalem. Bisan pa wala naton mahibaluan kon pila ang mga manghod ni Jesus, mahanduraw naton ang pagplano kag panikasog nanday Jose kag Maria. Nakahimo ka na bala sing kinahanglanon nga mga paghanda para matambungan ang tatlo ka adlaw nga distrito nga kombension? Mahimo nga kinahanglan ka magbakasyon sa imo trabaho ukon makig-istorya sa imo amo ukon sa manunudlo sang imo kabataan para makatambong sa kombension. Makamatumato ka bala sa pagbulig sa mga miembro sang kongregasyon nga nagakinahanglan sing bulig agod makatambong sa kombension?—1 Juan 3:17, 18.

3. Paano nangin makapabakod ang pag-inupdanay sa mga kapiestahan sa Israel?

³ Makapabakod nga Pag-inupdanay: Isa gid ka kahigayunan nga makapalig-unanay ang mga masigkasumilimba sa tion sang Judiyong mga kapiestahan! Pat-od nga nalangkag gid ang pamilya ni Jesus sa pagpakig-upod liwat sa ila madugay na nga mga abyan. Nakahigayon man sila nga makakilala sing bag-o nga abyan nga mga Judiyo kag mga proselita nga nagtambong ukon naglakbay pakadto-pakari gikan sa Jerusalem.

4. Paano naton mapakita nga ginaapresyar naton ang aton nahiusa nga Cristianong paghiliutod?

⁴ Wala gin-imprinta sang matutom kag mainandamon nga ulipon ang mga impormasyon sa distrito nga kombension para ipanagtag sa aton. Sa baylo, gintipon kita sa pagpamati sa mga pamulongpulong para makapalig-unanay sa isa kag isa. (Heb. 10:24, 25) Gani, planuha nga makaabot sing temprano sa kombension kada adlaw agod makapakig-upod sa iban antes ipahibalo sang tsirman ang musika, nga nagapatimaan nga magpungko na ang tanan. Imbes nga magbiya sa tilipunan para magbakal sing palanyagahon, ginapalig-on kita nga magbalon sing tamatama nga pagkaon kag magpabilin sa tilipunan para makilala kag maistorya naton ang iban. Dapat gid naton apresyahon ang aton nahiusa nga Cristianong paghiliutod bangod isa ini ka dulot gikan kay Jehova.—Miq. 2:12.

5. Ano ang makabulig sa aton nga makapanginpulos sing bug-os sa programa?

⁵ Tion sa Pagtuon: Sugod sang bata pa si Jesus, ginkalitan niya ang mga kapiestahan para makatuon parte sa iya langitnon nga Amay. (Luc. 2:41-49) Ano ang makabulig sa aton kag sa aton pamilya para makabenepisyo sing bug-os sa tanan nga ipresentar nga bahin? Sa tion sang mga sesyon, magpabilin nga nagapungko kag likawi ang indi kinahanglan nga pag-istoryahanay. Likawi nga matublag ka kag ang iban sang imo cell phone ukon iban pa nga mga gadyet. Tuluka ang humalambal, kag magkuha sing malip-ot nga mga nota. Kinahanglan nga magpungko ka upod sa imo pamilya para mapat-od nga nagapamati man ang inyo kabataan. Pagkagab-i, maghinguyang sing pila ka tion sa pagbinagbinag sang pila ka punto nga inyo nanamian.

6. Ano ang dapat naton tandaan parte sa pamayo kag pamustura?

⁶ Pamayo kag Pamustura: Mahapos lang makilal-an sang nagalakbay nga dumuluong nga mga negosyante ang pamilya ni Jesus kag ang iban pa nga Judiyo nga sumilimba nga nagapanglakaton pakadto-pauli halin sa kapiestahan bangod sang plikos sa tagsa ka sidsid sang ila bayo kag sang lubid nga asul sa ibabaw sang plikos. (Num. 15:37-41) Bisan pa wala nagasuksok sing pinasahi nga bayo ang mga Cristiano, nakilal-an kita sa aton maugdang, mahipid kag matinlo nga pamayo. Dapat naton talupangdon gid ang aton hitsura kon nagabiyahe pakadto kag pauli sa kombension kag sa tion nga yara kita sa duog nga ginahiwatan sang kombension. Bisan pa mag-ilis kita sing bayo pagkatapos sang programa, dapat naton huptan nga talahuron ang aton hitsura kag isuksok ang aton badge. Sa sini nga paagi mapatuhay kita gikan sa mga indi Saksi kag makapakita sing maayo nga impresyon sa iban.

7. Ngaa dapat naton binagbinagon ang pagboluntaryo sa kombension?

⁷ Pagboluntaryo: Madamo nga boluntaryo ang kinahanglan para mangin madinalag-on ang kombension. Makaboluntaryo ka bala? (Sal. 110:3) Ang mga hilikuton sa kombension bahin sang aton sagrado nga pag-alagad kag nagahatag sing maayo nga panaksi. Ang manedyer sang isa ka ginhiwatan sang kombension nagdayaw gid sa mga boluntaryo nga nagtinlo sa ila pasilidad, sia nagsulat: “Luyag ko kamo pasalamatan sa sining dalayawon nga hitabo nga akon naeksperiensiahan. Pirme ko mabatian nga pinasahi ang mga Saksi ni Jehova, kag may maayo kamo nga reputasyon sa paggamit sang kaangay sini nga mga pasilidad bangod ginabayaan ninyo ini nga mas matinlo. Kamo kag ang inyo organisasyon naghimo sini nga pasilidad nga mas maayo nga duog para sa komunidad kag ginhimo ninyo ini upod sa labing mabuot nga grupo sang mga tawo kag nalipay gid kami nga makilala kamo.”

8. Paano kita makahimo sing kahigayunan sa pagpanaksi samtang yara sa duog nga ginahiwatan sang kombension?

⁸ Kahigayunan sa Pagpanaksi: Madamo sa duog nga ginahiwatan sang kombension ang makatalupangod sa mga bisita nga may mga badge kag may maayo nga pamayo kag pamustura, kag mahimo nga mangusisa sila, gani makahigayon kita sa pagsugid sa ila parte sa kombension. Gindala sang isa ka kuatro anyos sa restawran ang iya kopya sang bag-o lang napagua nga publikasyon pagkatapos sang programa kag ginpakita ini sa serbidora. Bangod sini, naagda sang iya mga ginikanan ang babayi sa kombension.

9. Paano naton mailog ang apresasyon sang pamilya ni Jesus sa espirituwal nga mga aman ni Jehova?

⁹ Ang dumaan nga mga kapiestahan malipayon nga okasyon nga ginapaabot sang mahunahunaon sa espirituwal nga mga Judiyo. (Deut. 16:15) Nalipay gid ang pamilya ni Jesus sa pagsakripisyo para makatambong kag makabenepisyo sa sini. Kabay pa nga amo man sini ang aton apresasyon sa aton distrito nga kombension, nga nagatamod ini subong dulot gikan sa aton mahigugmaon nga Amay sa langit. (Sant. 1:17) Karon na ang tion sa paghanda para sa sining malipayon nga kahigayunan sa pagsimba kay Jehova kada tuig!

Mga Pahanumdom Para sa Distrito nga Kombension

◼ Iskedyul sang Programa: Ang programa magasugod sa 8:20 s.a. sa Biernes kag Sabado kag 8:50 s.a. naman sa Domingo. Kon ipahibalo na ang musika, dapat makadto na kita tanan sa aton mga pulungkuan agod makasugod ang programa sing mahim-ong. Ang programa sa Biernes kag Sabado matapos sa 3:55 s.h. kag 3:15 s.h. naman sa Domingo.

◼ Palarkingan: Sa tanan nga duog nga hiwatan sang kombension, mahimo makaparking ang bisan sin-o nga makauna. Sanglit kinaandan na nga limitado ang palarkingan, mas maayo nga mag-updanay kamo sa isa lang ka salakyan kon posible.

◼ Pagreserba sang Pulungkuan: Mahimo lamang kamo makatigana sing pulungkuan para sa mga kaupod ninyo sa salakyan ukon kaupod sa balay, subong man sa inyo mga ginatun-an sa Biblia.

◼ Panyaga: Palihug magbalon kamo, imbes nga maghalin pa sa duog nga ginahiwatan sang kombension agod magbakal sing pagkaon. Puede kamo makadala sing balunan nga sarang mabutang sa idalom sang inyo pulungkuan. Apang, ang dalagku nga pangpiknik nga mga cooler kag buluk-on nga mga kagamitan wala ginatugutan sa pasilidad sang kombension.

◼ Amot: Mapakita naton nga ginaapresyar naton ang mga kahimusan sa kombension paagi sa paghatag sing boluntaryo nga mga amot para sa bug-os kalibutan nga hilikuton sa aton Kingdom Hall ukon sa duog sang kombension. Kon luyag ninyo mag-amot paagi sa tseke, ipangalan ini sa “Watch Tower.”

◼ Aksidente kag Emerhensia: Kon may emerhensia nga matabo sa duog sang kombension, palihug pahibalua ang pinakamalapit nga atendant, nga amo naman ang magapahibalo sa First Aid agod matan-aw ini sang aton kalipikado nga utod nga naasayn sa sini nga departamento kag maghatag sing bulig. Kon kinahanglanon, ang aton utod nga naasayn sa First Aid amo ang matawag sa pinakamalapit nga ospital.

◼ May Diperensia sa Palamatin-an: Sa pila ka kombension, iwaragwag ang programa sa FM frequency sang radyo. Agod makapanginpulos sa sini nga aman, kinahanglan magdala kamo sing de-baterya nga radyo nga may FM kag headphone.

◼ Rekording: Indi dapat ikonektar sa sound system ukon sa salaksakan sang koryente sa pasilidad ang bisan ano nga rekorder. Mahimo lamang ini magamit sa paagi nga indi makatublag sa iban.

◼ Pagpangodak: Kon luyag ninyo mangodak sa tion sang sesyon, palihug indi maggamit sing flash kag indi man paglipdi ang iban nga nagapamati sa programa.

◼ Follow-Up nga Pormas: Dapat gamiton ang Please Follow Up (S-43) nga pormas agod matatap ang bisan sin-o nga nagpakita sing interes bangod sang di-pormal nga pagpanaksi sa tion sang kombension. Ang mga manugbantala dapat magdala sing isa ukon duha sini nga pormas sa kombension. Ang nasulatan nga mga pormas mahimo ihatag sa Book Room ukon sa sekretaryo sang inyo kongregasyon.—Tan-awa ang Nobiembre 2009 nga Ang Aton Ministeryo sa Ginharian, p. 4.

◼ Restawran: Padunggi ang ngalan ni Jehova paagi sa inyo maayo nga paggawi sa mga restawran. Sa madamo nga duog, kinabatasan na ang pagbilin sing 10 porsiento nga tip, depende sa ila serbisyo.

◼ Badge Kard: Palihug isuksok ang inyo badge samtang yara sa kombension kag kon nagalakbay pakadto-pakari sa duog sang kombension. Matigayon ninyo ang inyo mga badge kard sa inyo kongregasyon. Indi kamo dapat magpabuyanbuyan sa pagkuha sini para sa inyo kag sa katapo sang inyo pamilya.

◼ Bawtismo: Ang mga kandidato sa bawtismo dapat magpungko sa pulungkuan nga gin-aman para sa ila antes magsugod ang programa sa Sabado sang aga. Ang kada isa dapat magdala sing maugdang nga pangpaligo nga bayo kag tualya. Agod mapat-od nga nagakaigo ang panapton sang mga balawtismuhan, dapat ini binagbinagon sa ila sang mga gulang nga magarepaso sang mga pamangkot sa Organisado nga libro.

◼ Pagboluntaryo: Madugangan pa gid ang aton kalipay sa pagtambong sa kombension kon magboluntaryo kita sa mga hilikuton. (Binu. 20:35) Ang bisan sin-o nga luyag magboluntaryo dapat magreport sa Volunteer Service Department sang kombension. Ang mga kabataan nga wala pa nagaedad sing 16 anyos mahimo magboluntaryo sa idalom sang panuytoy sang ila ginikanan ukon guardian ukon iban pa nga adulto nga ginsaligan sang ila mga ginikanan ukon guardian.