Ginahimo Ko Gid Bala ang Akon Bug-os nga Masarangan?

1. Ano ang mahimo kabalak-an sang isa ka matutom nga Cristiano?

¹ Napamangkot mo na bala ina sa imo kaugalingon? Ayhan nalimitehan ang imo pagpakigbahin sa ministeryo bangod sang pagtigulang, balatian, ukon pagdugang sing mga responsibilidad sa pamilya, amo nga naluyahan ka sing buot. Ang isa utod nga babayi nga may tatlo ka bata nagsulat nga kon kaisa, nakonsiensia sia kay ang iya mahimo sa ministeryo nalimitehan bangod sang tion nga iya ginahinguyang sa pag-atipan sang iya pamilya. Ano ang makabulig sa aton para matamod sing balanse ini nga mga butang?

2. Ano ang ginapaabot ni Jehova sa aton?

² Kon Ano ang Ginapaabot ni Jehova sa Aton: Wala sing duhaduha nga luyag naton tanan himuon ang aton bug-os nga masarangan sa ministeryo. Pero may daku nga kinatuhayan ang luyag naton himuon kag ang masarangan naton himuon. Ang katunayan nga luyag naton himuon ang aton bug-os nga masarangan nagapamatuod nga wala kita nagapabaya. Dapat naton dumdumon nga nahibaluan ni Jehova ang aton mga limitasyon kag wala sia nagapangabay sang indi naton masarangan. (Sal. 103:13, 14) Ano ang iya ginapaabot sa aton? Gusto niya nga alagaron naton sia sing bug-os kalag, ihatag naton ang aton bug-os nga masarangan.—Col. 3:23.

3. Paano naton mausisa ang aton mga panikasog sa ministeryo?

³ Ano ang makabulig sa aton para mahibaluan kon ano ang aton masarangan? Mahimo kita magpabulig kay Jehova para mahibaluan kon ano ang aton matuod nga kahimtangan. (Sal. 26:2) Mahimo man makabulig ang masaligan kag hamtong nga Cristianong abyan nga nakakilala sa aton sing maayo kag wala nahadlok magprangka sang aton palauswagon. (Hulu. 27:9) Dumduman man nga bangod nagabag-o ang mga kahimtangan, mapuslanon nga usisaon naton sing regular ang aton kahimtangan.—Efe. 5:10.

4. Paano naton dapat tamdon ang pasad sa Biblia nga mga pahanumdom parte sa ministeryo?

⁴ Kon Paano Naton Tamdon ang mga Pahanumdom: Sa tion sang palumba, ang mga nagatan-aw mahimo nga magpalig-on sa mga nagadalagan. Tuyo nila nga buligan ang mga nagadalagan nga makalab-ot sa inangan, indi para pasalahon. Sing kaanggid, ang pasad sa Biblia nga mga pagpalig-on kag mga pahanumdom sa aton mga miting kag mga publikasyon nga ‘ibantala ang pulong sing masako,’ para sa aton kaayuhan kag wala nagapahangop nga kulang ang aton mga panikasog. (2 Tim. 4:2) Makasalig kita nga tubtob ginatinguhaan naton ang aton bug-os nga masarangan, dumdumon ni Jehova ang aton ‘gugma kag binuhatan’ nga may kahamuot.—Heb. 6:10.