Panag-on sang Memoryal—Tion Para Dugangan ang Hilikuton!

1. Ano ang mga rason ngaa dapat naton dugangan ang aton mga hilikuton sa Marso, Abril, kag Mayo?

¹ Madugangan mo bala ang imo tion sa pagministeryo sa panag-on sang Memoryal? Maayo ang klima sa kalabanan nga lugar sa sini nga mga tion. Ang pila ka manugbantala nagabakasyon sa ila trabaho kag wala man sing klase ang mga estudyante, gani may tion sila sa pagministeryo. Sugod sa Abril 2, managtag kita sing mga imbitasyon sa mga interesado para sa Memoryal sa Abril 17. Pagkatapos, tinguhaan naton nga mapalambo ang interes sang mga magtambong kag agdahon sila sa pinasahi nga pamulongpulong sa semana sang Abril 25. Madamo gid sing rason kon ngaa dapat naton dugangan ang aton hilikuton sa Marso, Abril, kag Mayo.

2. Ano ang isa sa labing maayo nga paagi para madugangan ang aton pagministeryo?

² Pag-auxiliary Payunir: Ang isa ka paagi para mahimo ini amo ang pag-auxiliary payunir. Sanglit masako kita tanan, nagakinahanglan ini sing abanse nga pagplano kag pagbag-o sang aton iskedyul. (Hulu. 21:5) Mahimo mo ipaiway ang indi man gid importante nga mga hilikuton. (Fil. 1:9-11) Ngaa indi mo pag-agdahon ang iban sa kongregasyon para buylugan ka nga mag-auxiliary payunir?

3. Ano ang mahimo sang pamilya para madugangan ang ila hilikuton?

³ Sa tion sang inyo masunod nga Pangpamilya nga Pagsimba, mas maayo kon binagbinagon ninyo ang inyo mga tulumuron subong pamilya. (Hulu. 15:22) Paagi sa pagbuligay, mahimo makaauxiliary payunir sing isa ukon kapin pa nga bulan ang pila ka katapo sang pamilya. Paano kon indi ninyo ini mahimo? Madugangan man sang pamilya ang ila hilikuton paagi sa pagpakigbahin sa ministeryo sa pila ka gab-i ukon dugangan ang ila tion sa pagpanaksi sa mga talipuspusan sang semana.

4. Ano nga mga pagpakamaayo ang mabaton kon dugangan naton ang aton hilikuton sa panag-on sang Memoryal?

⁴ Indi malimtan ni Jehova ang tanan naton nga nahimo sa pag-alagad sa iya kag ginapabaloran niya ang aton mga sakripisyo. (Heb. 6:10) Ang aton paghatag kay Jehova kag sa iban nagaresulta sing kalipay. (1 Cron. 29:9; Binu. 20:35) Madugangan mo bala ang imo hilikuton sa panag-on sang Memoryal agod mabatyagan mo ang daku nga kalipay kag mga pagpakamaayo?