Himua nga Makalilipay ang Panahon sang Memoryal!

1. Ano ang isa ka paagi nga madugangan ang imo kalipay sa panahon sang Memoryal?

¹ Luyag mo bala madugangan ang imo kalipay sa bulan sang Marso, Abril, kag Mayo? Ang isa ka paagi nga mahimo ini amo ang pagpasangkad sang imo ministeryo kag, kon posible, ang pag-auxiliary payunir. Paano ini makadugang sang imo kalipay?

2. Ngaa nagadugang ang aton kalipay kon mas madamo ang aton tion sa ministeryo?

² Dugangi ang Imo Kalipay: Gintuga kita ni Jehova nga may ikasarang nga magkalipay sa pagsimba sa iya samtang ginapun-an naton ang aton espirituwal nga kinahanglanon. (Mat. 5:3) Gindesinyo man niya kita nga makabatyag sing kalipay bangod sa paghatag sa iban. (Binu. 20:35) Ang kalipay sa pagsimba sa Dios kag pagbulig sa mga tawo matigayon naton paagi sa pagministeryo. Gani, kon mas madamo kita sing tion sa ministeryo, nagadugang ang aton kalipay. Kon pirme kita nagabantala, nagauswag ang aton kalantip. Samtang nagauswag ang aton kalantip, mas may kompiansa kita kag nagahaganhagan ang aton kakulba. Bilang resulta, mas madamo kita sing kahigayunan nga makapanaksi kag makasugod sing pagtuon sa Biblia. Amo ini ang mga rason kon ngaa mas makalilipay ang ministeryo.

3. Ngaa ang Marso kag Abril ang pinakamaayo nga bulan sa pag-auxiliary payunir?

³ Ang Marso kag Abril amo ang pinakamaayo nga bulan sa pag-auxiliary payunir bangod makapili kita sing 30 ukon 50 ka lalab-uton nga oras. Dugang pa, sugod sa Sabado, Marso 22, kag padayon asta sa Memoryal sa Lunes, Abril 14, magapakigbahin kita sa makalilipay nga kampanya sa pag-agda sa iban nga magtambong sa Memoryal. Malipay gid ang mga kongregasyon samtang madamo ang magapanghikot sing “nahiusa” agod makobrehan ang madamo nga teritoryo suno sa ginatugot sang tion.—Sof. 3:9, NW.

4. Kon luyag mo mag-auxiliary payunir, ano ang dapat mo himuon?

⁴ Maghanda na Subong: Kon wala mo pa mahimo, tan-awa ang imo iskedyul kag hibalua kon ano ang imo himuon nga pagbag-o agod mapasangkad ang imo ministeryo sa sulod sang isa ukon pila ka bulan. Ipangamuyo ini. (Sant. 1:5) Ipahibalo ini sa imo pamilya kag sa iban sa kongregasyon. (Hulu. 15:22) Masapwan mo nga bisan pa may problema ka sa panglawas ukon masako sa trabaho, maeksperiensiahan mo ang kalipay sa pag-auxiliary payunir.

5. Ano ang resulta kon pasangkaron naton ang aton ministeryo sa panahon sang Memoryal?

⁵ Luyag ni Jehova nga mangin malipayon ang iya mga alagad. (Sal. 32:11) Kon pasangkaron naton ang aton ministeryo sa panahon sang Memoryal, indi lamang kita mangin mas malipayon kundi ilabi na ang aton Amay sa langit.—Hulu. 23:24; 27:11.