Magplano Na Karon Agod Pasangkaron ang Imo Ministeryo
1. Ano nga kahigayunan ang bukas sa panag-on sang Memoryal, kag paano naton ini mahandaan?
1 Ang kada panag-on sang Memoryal nagahatag sa aton sing kahigayunan para ‘dayawon gid si Jehova.’ (Sal. 109:30, NW) Mapasangkad mo bala ang imo ministeryo sa Marso agod ipakita nga ginapasalamatan mo ang Dios nga nag-aman sing gawad? Karon na ang tion sa pagplano.—Hulu. 21:5.
2. Ano ang ginbatyag mo kag sang iban parte sa probisyon nga ginpanubuan ang lalab-uton nga oras sang mga auxiliary payunir sang Abril?
2 Pag-auxiliary Payunir: Sang nagligad nga tuig, nalangkag gid ang mga kongregasyon sang mahibaluan nila nga ginpanubuan ang lalab-uton nga oras sang mga auxiliary payunir sa Abril. Ang isa ka utod nga lalaki nagsulat: “Hayskul pa lang ’ko, kag nabudlayan ako magregular payunir. Pero kalitan ko ang 30 ka oras kag tinguhaan nga lab-uton ang 50 ka oras sa Abril.” Nagsiling naman ang isa ka utod nga babayi nga nagaobra sing bug-os tion: “Kahapos lang lab-uton ang 30 ka oras!” Sang ginpahibalo ini nga kahimusan, ang 80 anyos nga payunir anay nagsiling: “Amo gid ini ang akon ginahulat! Nahibaluan ni Jehova nga ang pagpayunir amo ang pinakamalipayon nga tion sang akon kabuhi.” Nangin tulumuron naman sang iban nga indi makaauxiliary payunir nga dugangan ang ila tion sa ministeryo.
3. Ngaa maayo nga binagbinagon ang pag-auxiliary payunir sa Marso, Abril, kag Mayo?
3 Pinakamaayo nga bulan ang Marso sa pag-auxiliary payunir bangod puede kita liwat makapili sing 30 ukon 50 ka lalab-uton nga oras. Dugang pa, sugod sa Sabado, Marso 17, magapakigbahin kita sa pinasahi nga kampanya sa pag-agda sa iban nga magbuylog sa aton sa Memoryal sa Abril 5. Madamo gid ang malipay sa pagpasangkad sa ila ministeryo amo nga luyag nila mag-auxiliary payunir tubtob sa Abril kag Mayo, nga may 50 ka oras nga lalab-uton.
4. Paano naton mapasangkad ang aton ministeryo, kag ano ang resulta sini?
4 Sa inyo masunod nga Pangpamilya nga Pagsimba, maayo nga binagbinagon ninyo kon paano ang kada isa sa pamilya makapasangkad sang iya ministeryo sa panag-on sang Memoryal. (Hulu. 15:22) Ipangamuyo nga pakamaayuhon ni Jehova ang imo mga plano. (1 Juan 3:22) Samtang ginapasangkad mo ang imo ministeryo, wala lamang nagadugang ang imo pagdayaw kay Jehova kundi pati man ang imo kalipay.—2 Cor. 9:6.