Makabenepisyo Ka Bala sa Ginpasimple nga Edisyon?

Ang tulun-an nga edisyon sang Ang Lalantawan matigayon na karon sa ginpasimple nga edisyon sa Ingles. Ini nga edisyon gin-aman para sa mga (1) manugbantala nga nagahambal sing Ingles nga makabenepisyo sa ginpasimple nga pagpaathag, ayhan bangod sa limitado nga tinun-an; (2) manugbantala nga indi ang Ingles ang panguna nga lenguahe; (3) pamatan-on, lakip na ang mga yara sa elementarya kag hayskul; kag (4) ginatun-an sa Biblia nga nagakinahanglan sing mas simple kag direkta sa punto nga lenguahe agod mahangpan ang espirituwal nga mga butang.

Ang kadamuon sang parapo, pamangkot, kag subtitulo pareho man sa regular nga edisyon. Pareho lang ang materyal nga ginatun-an, pero mas simple ang pagpaathag. Gamiton gihapon sang nagadumala sang Pagtinuon sa Lalantawan kag manugbasa sang parapo ang regular nga edisyon luwas lamang kon ang kalabanan sang tumalambong nagagamit sing ginpasimple nga edisyon. Pero, makita man sang mga nagagamit sang ginpasimple nga edisyon ang ginsitar nga mga teksto kag mga ilustrasyon, kag mahimo man nila sundan ang pagbasa sang mga parapo kag makakomento.

Kon sa banta mo makabenepisyo ka sa sini nga edisyon, ihatag ang imo pangabay sa nagatatap sang mga magasin.