Indi Paglimitahi ang Imo Kaugalingon—Masako nga Iskedyul
1. Ngaa nagapangalag-ag ang iban nga magtanyag sing pagtuon sa Biblia?
1 Ang pila nagapangalag-ag nga magtanyag sing pagtuon sa Biblia bangod masako sila. Ang pagbulig sa estudyante sang Biblia nagakinahanglan sing tion. Kinahanglan ang tion sa paghanda para sa pagtuon, pagdumala sini, kag pagbulig sa estudyante nga malandas ang mga kabudlayan. Si apostol Pablo nagsiling nga ginpaambit niya ang iya kaugalingon para buligan ang mga taga-Tesalonica nga makilala si Jehova. (1 Tes. 2:7, 8) Paano kita makadumala sing pagtuon sa Biblia bisan pa masako ang aton iskedyul?
2. Paano ang gugma kay Jehova nagaapektar sa paggamit naton sang aton tion?
2 Ang Pag-alagad Nagakinahanglan sing Tion: Kinahanglan ang tion sa pag-alagad kay Jehova. Halimbawa, nagapain kita sing tion agod tambungan ang mga miting, makigbahin sa ministeryo, magbasa sing Biblia, kag mangamuyo. Bisan pa sa kasakuon, ang isa ka minyo malipayon nga nagahinguyang sing tion upod sa iya tiayon. Mas labi pa gid nga malipay kita sa ‘pagbakal’ sing tion para alagdon si Jehova bangod ginahigugma naton sia. (Efe. 5:15-17; 1 Juan 5:3) Suno kay Jesus, importante nga bahin sang aton pagsimba ang paghimo sing disipulo nga hilikuton. (Mat. 28:19, 20) Ang pagpamalandong sa sini makabulig sa aton nga indi mangalag-ag sa pagbaton sing responsibilidad nga magdumala sing pagtuon sa Biblia.
3. Paano naton matatap ang pagtuon sa Biblia kon maupangan ang aton iskedyul?
3 Pero ano abi kon naupangan ang aton iskedyul bangod sa trabaho, balatian, ukon teokratiko nga mga asaynment? Ang pila ka manugbantala nga panalagsa nga nagakadto sa malayo nagadumala sang ila pagtuon sa Biblia paagi sa telepono ukon sa kompyuter. Ginapangabay sang mga may balatian ang ila estudyante nga magkadto sa ila balay kag didto hiwaton ang pagtuon. Ang pila naman nagahimo sing kahimusan nga tal-usan sila sang kalipikado nga manugbantala kon indi nila anay madumalahan ang pagtuon.
4. Ano nga mga pagpakamaayo ang mahatag sang pagpakigbahin sa hilikuton nga pagdumala sing pagtuon sa Biblia?
4 Nalipay gid si Pablo sa paggamit sang iya tion kag kusog agod buligan ang iban nga makatuon sang kamatuoran. (Binu. 20:35) Sang ginpamalandungan niya ang bunga sang iya pagpangabudlay sa Tesalonica, napahulag sia nga pasalamatan si Jehova. (1 Tes. 1:2) Madugangan man ang aton kalipay sa ministeryo kon indi naton pagtugutan ang masako nga iskedyul nga mag-upang sa aton nga makigbahin sa hilikuton nga pagdumala sing pagtuon sa Biblia.