Pagpauswag sang Aton mga Ikasarang sa Ministeryo—Palambua ang Interes sang Imo Ruta sang Magasin

Kon Ngaa Importante: Madamo nga tawo nga nanamian magbasa sang aton mga magasin ang indi luyag magtuon sang Biblia upod sa aton. Mahimo kontento na sila sa ila relihion, ukon wala sila sang tion para magtuon. Apang kon regular nila nga ginabasa ang aton mga magasin, mahimo magalambo ang ila handum nga tun-an ang Pulong sang Dios. (1 Ped. 2:2) Ang isa ka artikulo mahimo makapukaw sang ila interes, ukon mahimo magbag-o ang ila kahimtangan. Kon pirme kita nagabisita sa ila bisan makadali lang, indi na sila masaw-ahan sa aton kag mahibaluan man naton ang makapainteres sa ila kag ang ila ginakabalak-an. Sa ulihi, mahimo masugdan ang pagtuon sa Biblia.

Kon Paano Ini Himuon:

Kada bulan, mag-iskedyul nga hatagan sila sing pinakabag-o nga Lalantawan kag Magmata! Mahimo mo sila bisitahan sa lain nga tion para mapukaw ang ila interes sa isa ka artikulo sang magasin nga imo ginbilin ukon hatagan sila sang publikasyon nga tanyag sa sina nga bulan. Maghupot sing maayo nga mga rekord.—Tan-awa ang Enero 2014 nga Ang Aton Ministeryo sa Ginharian, p. 3.
Maghanda sa kada pagbisita. Sa baylo nga ibilin lang ang mga magasin, istoryaha ang tagbalay kag tinguhai nga makig-abyan sa iya para mapalambo ang iya interes.
Mangin alisto sa mga kahigayunan nga makasugod sing pagtuon. Kon ang isa nga imo ruta mamangkot kon ano ang ginasiling sang Biblia parte sa isa ka topiko, dal-i sia sang publikasyon nga ginagamit sa pagtuon nga makasabat sang iya pamangkot, kag binagbinagon ninyo. Antes ka maghalin, magpautwas sing pamangkot may kaangtanan sa topiko nga binagbinagon ninyo sa masunod. Kon regular ka nga nagapakig-istorya nga ginagamit ang Biblia ukon isa sang aton mga publikasyon nga ginatun-an, nagadumala ka na sang pagtuon sa Biblia. Natanyagan mo na bala ang tagbalay sang Maayong Balita nga brosyur kag napasundayag sa iya ang pagtuon sa Biblia? Napatan-aw mo na bala sa iya ang mga video nga Ngaa Dapat Tun-an ang Biblia? kag Paano Ginahimo ang Pagtuon sa Biblia? Bisan pa indi sia interesado sa pagtuon sang una, mahimo magbag-o ang kahimtangan. Gani padayon nga tinguhai nga makasugod sing pagtuon sa Biblia.

Tilawi Ini sa Sini nga Bulan:

Ilista ang puede mo mangin ruta sang magasin. Itanyag sa ila ang bag-o nga mga magasin, kag hambala nga hatagan mo sila sang masunod nga mga gua.