“Pagsab-ug Sing Binhi Sang Ginharian” sa mga Ruta sa Magasin
1 Ang ambahanon 133 sa Sing Praises to Jehovah ginatig-uluhan sing “Sowing Kingdom Seed.” Pasad ini sa ilustrasyon ni Jesus nga nagapaanggid sang paghimo-sing-disipulo nga hilikuton sa pagsab-ug sing binhi. (Mat. 13:4-8, 19-23) Ang liriko sang ambahanon mabasa: “How much of your seed falls on soil that is fine/May often depend much on you.” Paano naton mapauswag ang pagkaepektibo sang aton ministeryo? Ang isa ka paagi amo ang pagsugod kag pagpadayon sing isa ka ruta sa magasin.
2 Madamo nga tulumuron ang matigayon paagi sa ruta sa magasin. (1) Ang tayuyon nga pagduaw kada duha ka semana magabulig sa imo nga matukod ang isa ka mainabyanon nga kaangtanan upod sa interesado. (2) Tayuyon mo sia nga ginahatagan sing nagaluwas-kabuhi nga impormasyon paagi sa Ang Lalantawan kag Magmata! (3) Paagi sa inyo mga paghambalanay ginabuligan mo sia nga mapalambo ang kalangkag sa Makasulatanhon nga kamatuoran, nga mahimo magdul-ong sa isa ka pagtuon sa Biblia.—1 Ped. 2:2.
3 Kon Paano Sugdan ang Isa ka Ruta sa Magasin: Kon may magpakita sing interes sa mga magasin, ipaathag nga may tumalagsahon nga mga artikulo sa kada guwa kag nalipay ka nga idul-ong ini sa iya kada duha ka semana. Paghalin sa ganhaan, isulat ang iya ngalan kag direksion, ang petsa sang pagduaw, ang petsa sang mga guwa nga napahamtang, ang artikulo nga ginpresentar, kag ang mga topiko nga nagawili gid sa iya.
4 Masugdan mo ang ruta sa pila lamang ka tawo. Nian pasangkara ini paagi sa pagdugang sang iban nga napahamtangan mo sing mga magasin. Samtang nagadamo ang imo ruta, maorganisar mo ini suno sa teritoryo agod mas mahapos mo nga madul-ungan ang tanan. Ilista kon ano nga guwa ang napahamtang sa tagsa ka pagduaw kag kon san-o. Idugang ang tuhoy sa inyo mga nahambalan kag tuhoy sa kon paano padayon nga mapalambo ang iya interes sa kamatuoran sa masunod nga pagduaw.
5 Ilakip ang mga Negosyante kag mga Propesyonal: Ginapakita sang eksperiensia nga ang mga nagabantay sa tindahan kag ang iban pa nga mga propesyonal posible nga magabaton sang aton mga magasin sing regular. Nangin ruta pa gani sa magasin sang isa ka gulang ang meyor sa ila banwa. Nasugdan sang isa ka manugbantala ang pagtuon sa 80-anyos nga tag-iya sang isa ka kompanya sang mga materyales sa konstruksion pagkatapos sang napulo ka tuig nga pagdala sing mga magasin sa iya!
6 Isa ka payunir nga sister ang nagsulod sa isa ka tindahan kag nasugilanon niya ang mag-asawa nga wala mag-amuma sa iya sing maayo. Apang, bangod nagkuha sila sing mga magasin, namat-od sia nga ilakip ang mag-asawa sa iya ruta sa magasin. Sang ulihi, luyag na sang sister nga untatan ang pagduaw sa ila bangod daw wala man lang sila nagasapak kag haluson gani maghambal, bisan pangabayon niya ang ila opinyon tuhoy sa pila ka butang. Apang ginpangamuyo ini sang sister kag sang ulihi nakapahamtang sing Mabuhi sing Dayon nga libro sa mag-asawa. Sang mabasa ini, ang asawa nagsiling: “Nakita ko gid man ang kamatuoran!” Isa ka pagtuon sa Biblia ang nasugdan, kag sang ulihi ang mag-asawa nagpabawtismo. Maayo gid ang nabunga sang pagpanikasog sang payunir.
7 Mga Pagduaw Liwat: Kon mabaton mo ang bag-o nga magasin, basaha ang kada artikulo. Pangitaa ang mga punto nga makawiwili sa kada isa sa imo ruta. Nian sa imo pagbalik, makasiling ka: “Samtang ginabasa ko ini nga artikulo, nadumduman ko ikaw kag kon paano ini mahimo nga magawili sa imo.” Ang tanan nga mga manugbantala malipay makatigayon sing isa ka ruta sa magasin. Bisan ang isa ka bata makasiling: “Nalipay ako nga makita ka liwat. Nag-abot na ang imo pinakabag-o nga kopya sang Ang Lalantawan kag Magmata! Sa banta ko maluyagan mo ining artikulo nga natig-uluhan . . .”
8 Pukawa ang kalangkag sa palaabuton nga mga artikulo paagi sa pagpatalupangod sa kahon nga natig-uluhan “Sa Amon Masunod nga Guwa.” Kon ang mga artikulo mangin isa ka serye, ipatalupangod kag palig-una ang bumalasa nga basahon ini. Indi pagkalimti nga kada magdul-ong ka sing mga magasin sa isa ka tawo sa imo ruta sa magasin, mahimo maisip ang isa ka pagduaw liwat. Kag labaw sa tanan, dumduma nga tulumuron naton nga ini nga mga pagduaw mangin mga pagtuon sang Biblia sa puluy-an.
9 Duawa ang mga Tawo sa Imo Ruta Sing Regular: Sarang mo matuptupan ang imo ruta sa magasin sa bisan anong praktikal nga tion—sa aga, kahapunanon, kasisidmon sang ordinaryo nga adlaw sang semana, ukon sa talipuspusan sang semana pagkatapos makapamalaybalay. Kon indi mo makadtuan ang imo ruta bangod nagmasakit ukon nagbakasyon ka, ipadul-ong sa isa pa ka manugbantala sa inyo pamilya ukon sa kongregasyon ang mga magasin. Sa sina nga paagi, mabaton sang mga tawo sa imo ruta ang ila mga magasin sing husto sa tion.
10 Ang isa ka paagi sa pagsab-ug sing binhi sang Ginharian amo ang pagdul-ong sing tayuyon sang Ang Lalantawan kag Magmata! sa tanan nga nalakip sa imo ruta sa magasin. Samtang ginatudluan mo sila sang Makasulatanhon nga kamatuoran, mahimo nila mahantop ang pulong sang Ginharian kag sa ulihi magapamunga sing mga bunga sang Ginharian upod sa imo.—Mat. 13:8, 23.