Kon Paano Magpanaksi Gamit ang Ginadispley nga Literatura

Ang pagpanaksi gamit ang mobile cart ukon lamesa nga may displey nga literatura napamatud-an nga epektibo gid sa pagbuyok sa mga interesado sa kamatuoran. (Juan 6:44) Gani, ginapalig-on ang mga gulang nga mag-organisar sang pangpubliko nga pagpanaksi sa ila teritoryo nga madamo sang nagalabay nga tawo. Bangod masulusaylo ang cart, mahimo indi na kinahanglan nga mangabay sang pahanugot sa awtoridad. Sin-o ang puede makigbahin? Ang mga manugbantala nga mahinantupon, matinahuron, kag may kalantip sa pagpakighambal. Ang masunod amo ang mga dapat himuon kag mga dapat likawan sang mga manugbantala para mangin madinalag-on sila sa pagpanaksi.

Mga Dapat Himuon:

Mangin mainabyanon, maabiabihon, kag mabinuligon sa mga nagalabay. Ang pila ka manugbantala sinsero nga nagayuhum kag mainabyanon nga nagatamyaw. Kon may nagatulok sa displey samtang nagalabay, mahimo ka magsiling, “Puede ka magkuha sang gusto mo.”
Magtindog sa nagakaigo nga kalayuon sa displey. Sa pila ka lugar, ang mga manugbantala may maayo nga eksperiensia bangod nagatindog sila malapit sa displey. Natalupangdan naman sang iban nga isa ini sa mga rason kon ngaa wala nagalantaw ang nagalabay sa displey, gani nagatindog sila sa uluunhan sang displey kag nagapalapit lang kon may magpundo nga nagalabay. Kon may magpalapit sa displey, tinguhai nga maistorya sia, ukon mamangkot, “Nahunahuna mo na bala ina nga pamangkot?”
Gamita pirme ang imo Biblia tubtob posible.
Ipaathag kon paano ginahimo ang pagtuon sa Biblia sa mga nagakuha sang mga publikasyon nga ginagamit sa pagtuon, kaangay sang Ginatudlo sang Biblia nga libro. Pamangkuta kon gusto niya matan-aw ang video nga Ngaa Dapat Tun-an ang Biblia? sa electronic device.
Kon mahimo, pangayua ang impormasyon kon paano makontak ang mga interesado. Kon wala sia nagaistar sa inyo teritoryo, pil-api ang pormas nga Please Follow Up (S-43) kag ihatag ini gilayon sa sekretaryo.