Pamangkot

◼ Dapat bala gamiton sang mga manugbantala ang Internet agod magpanaksi ukon magdumala sang pagtuon sa mga indi nila kilala nga nagaistar sa iban nga pungsod?

Ginagamit sang iban nga manugbantala ang Internet agod makadumala sang mga pagtuon sa Biblia sa mga kadutaan nga ginadumilian ang aton hilikuton ukon diutay lang ang manugbantala. Nangin maayo man ang resulta sa pila sa sini. Pero, may mga katalagman kon ang mga manugbantala nagapakig-angot paagi sa e-mail ukon chat sa indi nila kilala. (Tan-awa ang Hulyo 2007 nga Ang Aton Ministeryo sa Ginharian, p. 3.) Bisan pa nga ang tuyo amo ang pagpaambit sang mensahe sang Ginharian sa mga interesado, mahimo ini magdul-ong sa pagpakig-angot sa malain nga kaupdanan, lakip ang mga apostata. (1 Cor. 1:19-25; Col. 2:8) Dugang pa, sa mga kadutaan nga ginadumilian ang hilikuton sang Ginharian, ini nga pagpakig-angot mahimo nga ginabantayan sang mga opisyales kag mabutang sa katalagman ang mga kauturan didto. Gani, ang mga manugbantala indi dapat maggamit sang Internet agod mangita sang mga tawo sa iban nga pungsod nga paambitan sang maayong balita.

Kon nakapanaksi kita sing di-pormal sa indi naton kilala nga nagabakasyon halin sa iban nga pungsod, indi naton dapat pagpalambuon ang iya interes pagpauli niya sa ila pungsod, luwas lang kon may instruksion halin sa lokal nga sanga talatapan. Sa baylo, mahimo naton ipakita sa iya kon paano makakuha sing dugang nga impormasyon sa jw.org ukon kon paano makontak ang sanga talatapan sa iya lugar. Mahimo man naton sia palig-unon nga magkadto sa Kingdom Hall nga malapit sa iya balay. Pero, wala sing Kingdom Hall sa iban nga pungsod. Kon gusto niya nga kadtuan sang mga Saksi, dapat naton pil-apan ang Please Follow Up (S-43) nga pormas kag ihatag ini sa sekretaryo, nga amo ang magapadala sini paagi sa jw.org. Ang sanga talatapan nga nagatatap sang hilikuton sa pungsod nga ginaistaran sang interesado amo ang nakahibalo sa pinasahi nga kahimtangan didto kag amo ang makahatag sang nagakaigo nga espirituwal nga bulig.​—Tan-awa ang Hunyo 2014 nga Ang Aton Ministeryo sa Ginharian, p. 7, kag ang Nobiembre 2011 nga Ang Aton Ministeryo sa Ginharian, p. 2.

Kon ang interesado nga aton ginaduaw subong nagsaylo sa iban nga pungsod ukon kon may ginatun-an kita subong sa iban nga pungsod nga nakilala lang naton paagi sa Internet, dapat naton sundon ang nabinagbinag na nga instruksion. Pero, mahimo naton padayunon ang pagpalambo sang iya interes samtang wala pa sia makontak sang manugbantala sa ila lugar. Apang, kon nagaistar sia sa lugar nga ginadumilian ang aton hilikuton, dapat gid maghalong kon nagaistorya parte sa Biblia nga ginagamit ang sulat, telepono, ukon iban pa nga elektroniko nga paagi.​—Mat. 10:16.