Pamangkot

◼ Sin-o ang dapat magsulat sang mga kupon ukon magpadala sang mga pangabay paagi sa Internet?

Ang aton mga publikasyon masami nga nagaunod sing mga kupon nga mahimo sulatan kag ipadala sa sanga talatapan agod mangabay sing literatura ukon pagduaw sang mga Saksi ni Jehova. Dugang pa, ang aton Web site nga www.watchtower.org mahimo gamiton agod mangabay sing pagtuon sa Biblia. Madamo ang nabuligan sini nga mga probisyon nga matun-an ang kamatuoran. Pero, may mga problema nga nag-utwas sang gingamit ini sang mga manugbantala agod makahimo sing kahimusan nga mabuligan sa espirituwal ang ila mga paryente ukon ang iban.

Nagreklamo ang pila nga nakabaton sang wala ginpangabay nga literatura gikan sa sanga talatapan. Nagbatyag sila nga ginadisturbo sila sang aton organisasyon ukon nalakip sila sa listahan sang mga ginapadalhan sing mga impormasyon ukon pasayod sang isa ka kompanya. May mga manugbantala nga nakabaton sing abiso nga duawon ang isa nga indi man personal nga nangabay sa amo nga pagduaw. Nabutang sila sa alang-alang bangod nangakig ang tagbalay. Gani, ang mga pangabay gikan sa aton Web site ukon paagi sa mga kupon dapat maghalin mismo sa mga interesado. Kon mahibaluan nga ini nga mga pangabay ginhimo sang mga manugbantala para sa iban, indi ini pag-asikasuhon.

Nian, paano naton mabuligan sa espirituwal ang aton mga paryente ukon kakilala? Kon luyag mo nga makatigayon sila sing literatura, ngaa indi mo ini pag-ihatag sing personal sa ila subong regalo? Kon nagpakita sila sing interes kag luyag nga duawon sang mga Saksi apang wala ka nakahibalo kon paano kontakon ang mga gulang sa lokal nga kongregasyon, dapat ka magsumiter sang Please Follow Up (S-43) nga pormas sa sekretaryo sang inyo kongregasyon. Repasuhon niya ini kag ipadala sa sanga talatapan. Apang kon ang interesado yara sa prisuhan, rehab, ukon ospital, indi mo dapat pagkontakon ang sanga talatapan para sa iya. Sa baylo, palig-una sia nga kontakon ang mga utod nga nagaduaw sa pasilidad ukon personal nga magsulat sa sanga talatapan.