KON PAANO MATAPOS ANG WALA UNTAT NGA PAGDUMTANAY

1 | Indi Magpasulabi

Panudlo sang Biblia:

“Ang Dios wala sing ginapasulabi, apang sa tagsa ka pungsod, nahamuot sia sa [kada isa] nga nagakahadlok sa iya kag nagahimo sing matarong.”—BINUHATAN 10:34, 35.

Ang Buot Silingon:

Wala kita ginahukman ni Jehovaa nga Dios base sa aton pungsod, rasa, kolor sang panit, ukon kultura. Kundi nagapokus sia sa kon ano gid ang ara sa sulod naton ukon sa kon ano gid kita nga klase sang tawo. Ang Biblia nagsiling man nga “ang tawo nagatan-aw sa makita sang mata, apang si Jehova nagatan-aw sa tagipusuon.”—1 Samuel 16:7.

Ang Puede Mo Himuon:

Bisan pa indi naton mabal-an kon ano gid ang ara sa tagipusuon sang iban nga tawo, puede naton tinguhaan nga ilugon ang Dios kag indi magpasulabi sa iban. Tinguhai nga makilala ang isa kon sin-o gid sia, imbes nga magbase lang sa iya ginhalinan nga pungsod ukon rasa. Kon mabatyagan mo nga may kaugot ka sa iban, halimbawa sa iban nga lain sing rasa ukon pungsod, mangamuyo sa Dios nga buligan ka nga madula ina nga balatyagon. (Salmo 139:23, 24) Kon sinsero ka nga mangabay kay Jehova nga hatagan ka sing kusog nga indi magpasulabi, makasigurado ka nga pamatian niya ang imo pangamuyo kag buligan ka.—1 Pedro 3:12.

a Si Jehova ang ngalan sang Dios.—Salmo 83:18.

“Wala pa gid ako makaupod sa isa ka puti nga tawo . . . Karon, nangin bahin na ako sang matuod nga internasyonal nga paghiliutod.”—TITUS

Eksperiensia—TITUS

Nasarangan Niya nga Dulaon ang Iya Dumot

Si Titus miembro sang isa ka bayolente nga gang nga akig gid sa mga kasuguan nga indi puede mag-updanay ang mga puti kag itom. Nagsiling sia: “Nagakadto kami sa mga lugar nga ginadilian ang mga negro, kaangay sang mga hotel kag mga bar, agod lang mangita sang away.” Si Titus nagsiling nga bayolente sia bangod sa grabe nga dumot nga iya nabatyagan. Nagsiling pa sia: “Kon may magbais gani sa akon, lalaki man ukon babayi, ginatapungol ko dayon.”

Nagsugod sa pagbag-o si Titus sang nagtuon sia sang Biblia upod sa mga Saksi ni Jehova. Daku gid ang epekto sa iya sang iya pagbasa sang Biblia. Nanamian gid sia sa promisa nga sa ulihi diri sa duta “wala na sing kamatayon, ukon paglalaw ukon paghibi ukon kasakit pa.”—Bugna 21:3, 4.

Sang primero, nabudlayan si Titus nga untatan ang pagdumot. “Nabudlayan gid ako nga bag-uhon ang akon panghunahuna kag paggawi,” siling niya. Pero nabuligan gid sia sang iya natun-an sa Binuhatan 10:34, 35, nga nagasiling nga ang Dios wala sing ginapasulabi.

Ano ang resulta? Si Titus nagsiling: “Sang nakita ko ang paghigugmaanay sa tunga sang mga Saksi ni Jehova bisan ano man ang ila rasa ukon kolor sang panit, nakumbinsi ako nga amo na ini ang matuod nga relihion. Antes pa ako nabawtismuhan, gin-imbitar ako sang isa ka puti nga Saksi nga magkaon sa ila balay. Daw nagadamgo lang ako. Wala pa gid ako makaupod sa isa ka puti nga tawo, ilabi na sa pagkaon sa ila balay. Karon, nangin bahin na ako sang matuod nga internasyonal nga paghiliutod.”