4 | Ang Biblia May Praktikal nga Laygay

Ang Buot Silingon

Ang Biblia indi libro parte sa pagpabulong, pero may praktikal ini nga mga laygay nga makabulig gid. Ini nga mga laygay makabulig sa tawo nga nagaantos bangod sa problema sa mental health. Binagbinaga ang pila ka halimbawa.

Kon Paano Ini Makabulig

“Ang mga mapagros wala nagakinahanglan sing manugbulong, kundi ang mga masakiton.”—MATEO 9:12.

Ginasiling sang Biblia nga mahimo kinahanglan naton magpakonsulta sa doktor. Madamo nga tawo nga may problema sa mental health ang nabuligan sang nabal-an nila ang insakto nga impormasyon parte sa ila ginabatyag kag sang nagpadoktor sila.

“May pulos ang pag-ihersisyo sang aton lawas.”—1 TIMOTEO 4:8, Ang Pulong sang Dios, APD.

Ang paghatag sang tion para atipanon ang imo panglawas mahimo nga may daku nga mabulig sa imo mental health. Nalakip sa sini ang regular nga pag-exercise, pagkaon sang masustansia nga pagkaon, kag bastante nga tulog.

“Ang tagipusuon nga malipayon maayo nga bulong, apang ang nadugmok nga espiritu nagaubos sang kusog.”—HULUBATON 17:22.

Ang pagbasa sang makapalig-on nga mga teksto sa Biblia kag ang pagtinguha sa mga goal nga masarangan mo lab-uton makabulig para mangin malipayon ka. Ang pagpokus sa maayo nga mga butang sa kabuhi kag maglaum nga sa ulihi magaayo ang imo sitwasyon makabulig sa imo nga masarangan ang mga problema sa mental health.

“Ang kaalam yara sa mga maugdang.”—HULUBATON 11:2.

Posible narealisar mo nga indi mo mahimo ang tanan nga gusto mo himuon kon ikaw lang, gani batuna ang bulig sang iban. Mahimo gusto ka buligan sang imo mga abyan kag pamilya pero indi sila kabalo kon ano ang himuon. Pabal-a sila kon ano ang makabulig gid sa imo. Pero indi mag-expect nga mahimo nila ang tanan para sa imo, kag pasalamati pirme ang ila bulig.

Kon Paano Nakabulig ang Praktikal nga Laygay sang Biblia sa mga May Problema sa Mental Health

“Pamatyag ko may problema gid sa akon, gani nagpakonsulta ako sa doktor. Na-diagnose sang doktor kon ano ang akon problema. Gani naintiendihan ko kon ano ang akon ginabatyag, kag nabal-an ko man kon ano nga mga paagi sa pagbulong ang akon mapilian para mag-ayoayo ang akon pamatyag.”—Nicole,a nga may bipolar disorder.

“Kada aga, ginabasa namon sang akon asawa ang Biblia, kag natalupangdan ko nga nakabulig ini para mangin positibo kag makapalig-on ang umpisa sang akon adlaw. Kag sa mga adlaw nga indi gid ako mapahamtang, may ara pirme teksto nga makapaumpaw sa akon.”—Peter, nga may depresyon.

“Kabudlay isugid sa iban ang akon ginaantos kay nahuya gid ako. Pero may abyan ako nga namati gid sing maayo kag gintinguhaan niya nga intiendihon ako. Nakabulig ini nga maghaganhagan ang akon pamatyag kag nabatyagan ko nga wala ako nagaisahanon.”—Ji-yoo, nga may eating disorder.

“Ang Biblia nakabulig sa akon kon paano balansehon ang pag-obra kag ang pagpahuway. Ang kaalam sa sini nakabulig sa akon kon paano atubangon ang akon mga problema sa emosyon.”—Timothy, nga may obsessive-compulsive disorder.