Sabton Bala ni Jehova ang Akon mga Pangamuyo?

1-2. Ngaa posible makahunahuna kita nga wala ginasabat ni Jehova ang aton mga pangamuyo?

“MAGKALIPAY ka kay Jehova, kag ihatag niya ang mga handum sang imo tagipusuon.” (Sal. 37:4) Kanami gid sini nga promisa. Pero buot silingon bala sini nga ihatag dayon ni Jehova ang tanan nga pangayuon naton sa iya? Ngaa posible nga mapamangkot naton ini? Binagbinaga ini nga mga sitwasyon. Ginpangamuyo sang isa ka dalaga nga sister ang parte sa pag-eskwela sa School for Kingdom Evangelizers. Madamo nga tinuig sia nga naghulat, pero wala sia gihapon nakabaton sang imbitasyon. Ginpangabay sang isa ka pamatan-on nga brother si Jehova nga ayuhon sia sa iya malala nga balatian para mas madamo sia sang mahimo sa kongregasyon. Pero wala sia nag-ayo. Ginpangamuyo sang isa ka mag-asawa nga buligan ang ila bata nga padayon nga mag-alagad kay Jehova. Pero nag-untat sa pag-alagad kay Jehova ang ila bata.

² Posible nga may ginapangabay ka man kay Jehova, pero wala ini ginhatag sa imo asta subong. Gani, posible makahunahuna ka kon ngaa wala ginasabat ni Jehova ang imo mga pangamuyo, pero ginasabat niya ang mga pangamuyo sang iban. Ukon posible makahunahuna ka nga basi may nahimo ka nga sala. Nahunahuna ini sang isa ka sister nga si Janice.b Ginpangamuyo niya kag sang iya bana ang parte sa ila handum nga mag-alagad sa Bethel. Nagsiling sia: “Nagapati gid ako nga ipatawag kami dayon sa Bethel.” Madamo nga tinuig sila nga naghulat, pero wala gid sila ginpatawag. Nagsiling si Janice: “Nasubuan ako kag natingala. Nahunahuna ko nga basi may nahimo ako nga nagpasubo kay Jehova. Gusto ko gid mag-alagad sa Bethel, gani hanuot ko gid ini nga ginpangamuyo. Pero ngaa wala niya ginsabat ang akon pangamuyo?”

3. Ano ang binagbinagon naton sa sini nga artikulo?

³ Posible may mga tion nga nahunahuna naton kon bala ginapamatian gid man ni Jehova ang aton mga pangamuyo. Nahunahuna man ini sang pila ka matutom nga mga alagad ni Jehova sang una. (Job 30:20; Sal. 22:2; Hab. 1:2) Ano ang puede mo himuon para magsalig ka nga ginapamatian ni Jehova ang imo mga pangamuyo? (Sal. 65:2) Para masabat naton ini, sabton anay naton ang masunod nga mga pamangkot: (1) Ano ang himuon ni Jehova? (2) Ano ang gusto ni Jehova nga himuon naton? (3) Ngaa kinahanglan naton bag-uhon kon kaisa ang pila sa aton mga ginapangabay?

ANO ANG HIMUON NI JEHOVA?

4. Suno sa Jeremias 29:​12, ano ang ginpromisa ni Jehova nga himuon niya?

⁴ Nagapromisa si Jehova nga pamatian niya ang aton mga pangamuyo. (Basaha ang Jeremias 29:12.) Palangga sang aton Dios ang iya matutom nga mga alagad, gani indi gid niya pagbalewalaon ang ila mga pangamuyo. (Sal. 10:17; 37:28) Pero, indi buot silingon sini nga ihatag niya ang tanan naton nga ginapangabay sa iya. Posible nga sa bag-ong kalibutan pa niya ihatag ang pila sa aton mga ginapangabay, gani kinahanglan naton maghulat.

5. Ano ang ginabinagbinag ni Jehova kon ginapamatian niya ang aton mga pangamuyo? Ipaathag.

⁵ Ginabinagbinag ni Jehova kon ano ang epekto sang aton mga ginapangabay sa iya katuyuan. (Isa. 55:​8, 9) Katuyuan niya nga mapuno ang duta sang malipayon kag nahiusa nga mga tawo nga nagapasakop sa iya paggahom. Pero nagsiling si Satanas nga mangin mas malipayon ang mga tawo kon sila ang maggahom sa ila kaugalingon. (Gen. 3:​1-5) Para pamatud-an nga sala ang ginsiling sang Yawa, gintugutan ni Jehova ang mga tawo nga gamhan ang ila kaugalingon. Pero, ang paggahom sang tawo nagresulta sa madamo nga problema nga ginaantos naton subong. (Man. 8:9) Kabalo kita nga indi pa subong ang tion nga dulaon ni Jehova ining tanan nga problema. Kay kon himuon niya ini subong, posible hunahunaon sang iban nga masarangan sang mga tawo nga gamhan ang ila kaugalingon kag masolbar nila ang ila mga problema.

6. Ngaa dapat kumbinsido kita nga pirme mahigugmaon kag matarong ang ginahimo ni Jehova?

⁶ Posible nga sabton ni Jehova sa lainlain nga paagi ang pangamuyo sang mga tawo nga pareho ang ginapangabay. Halimbawa, sang nagmasakit sing grabe si Hari Ezequias, nangabay sia kay Jehova nga ayuhon sia. Ginsabat ini ni Jehova paagi sa pag-ayo sa iya. (2 Hari 20:​1-6) Pero sang nangabay si apostol Pablo kay Jehova nga kuhaon ang iya “tunok sa unod,” nga posible isa ka problema sa panglawas, wala ini ginkuha ni Jehova. (2 Cor. 12:​7-9) Binagbinaga man ang halimbawa sang mga apostoles nga sanday Santiago kag Pedro. Gusto ni Hari Herodes nga patyon sila nga duha. Nangamuyo ang kongregasyon para kay Pedro, kag posible gid nga nangamuyo man sila para kay Santiago. Ginluwas si Pedro paagi sa isa ka milagro, pero ginpatay si Santiago. (Binu. 12:​1-11) Posible mahunahuna naton, ‘Ngaa ginluwas ni Jehova si Pedro, pero ngaa wala niya ginluwas si Santiago?’ Wala ini ginasabat sang Biblia.c Pero makasigurado kita nga “wala gid sing pagkadimatarong” sa mga ginahimo ni Jehova. (Deut. 32:4) Kag kabalo kita nga pareho nga palangga ni Jehova si Pedro kag si Santiago. (Bug. 21:14) Kon kaisa, posible nga lain sa ginapaabot naton ang paagi ni Jehova sa pagsabat sa aton mga pangamuyo. Pero bangod nagasalig kita nga pirme mahigugmaon kag matarong ang ginahimo ni Jehova, wala naton ginakuestyon ang iya paagi.​—Job 33:13.

7. Ano ang indi naton dapat paghimuon, kag ngaa?

⁷ Indi naton dapat pag-ikumparar ang aton sitwasyon sa sitwasyon sang iban. Halimbawa, posible nga may ginpangabay kita kay Jehova, pero wala niya ini ginhatag sa aton. Sang ulihi, nabal-an naton nga may ginpangabay ang isa ka utod nga pareho man sa aton ginpangabay. Nabaton sang utod ang iya ginpangabay, gani pamatyag naton daw ginsabat ni Jehova ang iya pangamuyo. Naeksperiensiahan ini sang isa ka sister nga si Anna. Nangamuyo sia nga kabay pa nga mag-ayo sa kanser ang iya bana nga si Matthew. Sadto nga tion, may kanser man ang duha ka tigulang nga sister. Hanuot nga nangamuyo si Anna para kay Matthew kag para sa mga sister. Nag-ayo ang mga sister, pero napatay si Matthew. Sang primero, nahunahuna ni Anna nga posible gin-ayo ni Jehova ang mga sister. Pero kon gin-ayo sila ni Jehova, ngaa wala gin-ayo ni Jehova ang iya bana? Siempre, wala kita kabalo kon paano nag-ayo ang duha ka sister. Pero kabalo kita nga may permanente nga solusyon si Jehova sa tanan naton nga problema, kag gusto gid niya banhawon ang iya mga abyan nga napatay.​—Job 14:15.

8. (a) Suno sa Isaias 43:​2, paano kita ginabuligan ni Jehova? (b) Paano makabulig ang pangamuyo kon may mabudlay kita nga mga problema? (Tan-awa ang video nga Ang Pangamuyo Makabulig sa Aton nga Masarangan ang Problema.)

⁸ Buligan kita pirme ni Jehova. Bilang aton mahigugmaon nga Amay, indi gusto ni Jehova nga nagaantos kita. (Isa. 63:9) Pero wala niya ginapunggan ang tanan naton nga problema nga daw pareho sa suba ukon kalayo. (Basaha ang Isaias 43:2.) Pero nagpromisa sia nga buligan niya kita nga ‘matabok’ ini nga mga problema. Kag bisan ano pa ang aton problema, siguraduhon niya nga makapadayon kita gihapon sa pag-alagad sa iya. Ginahatagan man kita ni Jehova sang iya gamhanan nga balaan nga espiritu para buligan kita nga makabatas. (Luc. 11:13; Fil. 4:13) Gani, makasalig kita nga buligan gid niya kita pirme para mabatas naton ang aton mga problema kag padayon kita nga mangin matutom sa iya.d

ANO ANG GUSTO NI JEHOVA NGA HIMUON NATON?

9. Base sa Santiago 1:​6, 7, ngaa dapat kita magsalig nga buligan kita ni Jehova?

⁹ Gusto ni Jehova nga magsalig kita sa iya. (Heb. 11:6) May mga tion nga pamatyag naton daw indi naton masarangan ang aton mga problema nga daw pareho sa pader nga indi mataklas. Posible mahunahuna pa gani naton nga daw wala kita ginabuligan ni Jehova. Pero ginapasalig kita sang Biblia nga ‘mataklas naton ang pader’ paagi sa bulig sang gahom sang Dios. (Sal. 18:29) Gani imbes nga magduhaduha, dapat kita magtuo kag magsalig sing bug-os nga sabton ni Jehova ang aton mga pangamuyo.​—Basaha ang Santiago 1:​6, 7.

10. Maghatag sing halimbawa nga nagapakita nga dapat naton himuon ang aton bug-os nga masarangan pagkatapos naton mangamuyo.

¹⁰ Gusto ni Jehova nga himuon naton ang aton bug-os nga masarangan pagkatapos naton mangamuyo sa iya. Halimbawa, ibutang ta nga nangamuyo ang isa ka brother kay Jehova nga buligan sia nga maka-leave sa iya obra para maka-attend sia sa rehiyonal nga kombension. Paano posible sabton ni Jehova ini nga pangamuyo? Puede niya hatagan ang brother sang kaisog para makalisensia sia sa iya boss. Pero kinahanglan gihapon kadtuan sang brother ang iya boss para maglisensia sa iya. Kag posible nga kinahanglan niya nga maglisensia sing madamo nga beses. Mahimo pa gani sia magsiling nga puede sia makaobra sa iban nga adlaw. Kag kon kinahanglan, mahimo sia magsiling nga puede man nga indi sia pagsuelduhan sa iya leave.

11. Ngaa dapat naton ipangamuyo sing madamo nga beses ang aton mga ginakabalak-an?

¹¹ Gusto ni Jehova nga ipangamuyo naton sa iya sing madamo nga beses ang aton mga ginakabalak-an. (1 Tes. 5:17) Mahangpan naton sa ginsiling ni Jesus nga may mga tion nga wala dayon ginahatag ang pila sa aton mga ginapangabay. (Luc. 11:9) Gani indi mag-untat sa pagpangamuyo. Mangamuyo sing hanuot kag sing madamo nga beses. (Luc. 18:​1-7) Kon pirme naton ginapangamuyo kay Jehova ang isa ka butang, ginapakita naton kay Jehova nga importante gid ini sa aton. Ginapakita man naton nga nagatuo kita nga buligan gid niya kita.

NGAA KINAHANGLAN NATON BAG-UHON KON KAISA ANG PILA SA ATON MGA GINAPANGABAY?

12. (a) Kon parte sa aton mga ginapangabay, ano ang isa ka pamangkot nga dapat naton ipamangkot sa aton kaugalingon, kag ngaa? (b) Paano naton masigurado nga ginarespeto naton si Jehova sa aton mga pangamuyo? (Tan-awa ang kahon nga “Makita Bala sa Akon mga Ginapangabay nga Ginarespeto Ko si Jehova?”)

¹² Kon wala ginhatag sa aton ang aton ginapangabay, may tatlo ka pamangkot nga mahimo naton ipamangkot sa aton kaugalingon. Ang una, ‘Husto bala ang akon ginapangamuyo?’ Sa masami, abi naton kabalo kita kon ano ang pinakamaayo para sa aton. Pero posible nga ang ginapangabay naton sa aton mga pangamuyo indi amo ang pinakamaayo para sa aton. Kon nangamuyo kita nga buligan kita sa isa ka problema, posible nga may mas maayo nga solusyon sangsa solusyon nga ginahunahuna naton. Kag posible nga indi suno sa kabubut-on ni Jehova ang pila sa mga ginapangabay naton. (1 Juan 5:14) Binagbinaga ang halimbawa sang mag-asawa nga ginsambit kaina. Nangamuyo sila kay Jehova nga buligan ang ila bata nga padayon nga mag-alagad sa iya. Daw nagakaigo man ang ila pangabay. Pero, indi pagpiliton ni Jehova ang bisan sin-o sa aton nga mag-alagad sa iya. Gusto niya nga kita mismo ang magdesisyon nga simbahon sia. Gusto niya nga amo ini ang himuon naton tanan, lakip na sang aton kabataan. (Deut. 10:​12, 13; 30:​19, 20) Gani puede ipangamuyo sang mga ginikanan kay Jehova nga buligan sila nga malab-ot ang tagipusuon sang ila bata para mapalig-on sia nga higugmaon si Jehova kag mangin abyan Niya.​—Hulu. 22:6; Efe. 6:4.

13. Suno sa Hebreo 4:​16, san-o kita ginabuligan ni Jehova? Ipaathag.

¹³ Ang ikaduha nga pamangkot amo ini, ‘Amo bala ini ang tion para ihatag ni Jehova ang akon ginapangabay?’ Posible ginahunahuna naton nga kinahanglan gid nga masabat dayon ang aton mga pangamuyo. Pero, kabalo si Jehova kon san-o ang pinakamaayo nga tion sa pagbulig sa aton. (Basaha ang Hebreo 4:16.) Kon wala naton dayon mabaton ang aton ginapangabay, posible mahunahuna naton nga ‘Indi’ ang sabat ni Jehova sa aton pangamuyo. Pero ang matuod, posible nga daw ginasilingan kita ni Jehova nga ‘Indi pa ini ang husto nga tion.’ Binagbinaga ang halimbawa sang pamatan-on nga brother nga nangamuyo nga ayuhon sia sa iya malala nga balatian. Kon gin-ayo sia ni Jehova paagi sa milagro, posible magsiling si Satanas nga padayon lang nga nagaalagad kay Jehova ini nga brother bangod gin-ayo Niya sia. (Job 1:​9-11; 2:4) Kag may gintalana na nga tion si Jehova kon san-o niya ayuhon ang tanan nga balatian. (Isa. 33:24; Bug. 21:​3, 4) Samtang wala pa ini nga tion, indi kita makapaabot nga magahimo si Jehova sing milagro para ayuhon kita. Gani puede ipangamuyo sang brother kay Jehova nga hatagan sia sang kusog kag malinong nga hunahuna para mabatas niya ang iya balatian kag padayon sia nga mangin matutom sa Iya.​—Sal. 29:11.

14. Ano ang natun-an mo sa eksperiensia ni Janice?

¹⁴ Binagbinaga ang eksperiensia ni Janice nga nangamuyo parte sa pag-alagad sa Bethel. Pagligad sang lima ka tuig, narealisar niya kon paano ginsabat ni Jehova ang iya pangamuyo. Nagsiling sia: “Gingamit ni Jehova ang nagligad nga mga tion para tudluan ako kag buligan nga mangin mas maayo nga Cristiano. Kinahanglan ko pabakuron ang akon pagsalig sa iya. Kinahanglan ko pauswagon ang akon paagi sa pag-personal study. Kag kinahanglan ko tun-an nga mangin malipayon ano man ang akon sitwasyon.” Sang ulihi, gin-asayn si Janice kag ang iya bana nga mag-alagad sa sirkito. Nagsiling si Janice: “Ginsabat ni Jehova ang akon mga pangamuyo, pero indi sa paagi nga gusto ko. Medyo madugay ko narealisar nga isa gali ka matahom nga regalo ang sabat nga ginhatag ni Jehova. Pero nagapasalamat gid ako kay naeksperiensiahan ko ang iya gugma kag kaayo.”

15. Ngaa mas maayo kon kaisa nga indi espesipiko ang aton mga pangamuyo? (Tan-awa man ang mga piktyur.)

¹⁵ Ang ikatlo nga pamangkot amo ini, ‘Dapat ko bala bag-uhon ang akon ginapangabay?’ Maayo gid kon espesipiko ang aton mga pangamuyo ukon isiling naton kon ano gid ang aton ginapangabay. Pero kon kaisa, mas maayo kon indi espesipiko ang aton mga pangamuyo para mabal-an naton kon ano ang kabubut-on ni Jehova para sa aton. Binagbinaga ang halimbawa sang dalaga nga sister nga nangamuyo parte sa pag-eskwela sa School for Kingdom Evangelizers. Gusto niya nga mag-eskwela sa sini para makaalagad sia sa lugar nga nagakinahanglan sang dugang nga manugbantala. Gani samtang padayon niya ini nga ginapangamuyo, puede man niya ipangamuyo kay Jehova nga buligan sia nga makita ang iban pa nga mga paagi nga madugangan niya ang iya ginahimo sa pag-alagad. (Binu. 16:​9, 10) Pagkatapos niya ipangamuyo ang parte sa sini, puede niya dayon pamangkuton ang circuit overseer kon ano nga kongregasyon ang nagakinahanglan sang dugang nga payunir. Puede man sia makasulat sa branch office para mamangkot kon ano nga kongregasyon ang nagakinahanglan sang dugang nga manugbantala.e

16. Ano ang masaligan naton nga himuon ni Jehova?

¹⁶ Natun-an naton nga makasalig kita nga sabton ni Jehova ang aton mga pangamuyo sa mahigugmaon kag matarong nga paagi. (Sal. 4:3; Isa. 30:18) Kon kaisa, posible nga lain sa ginapaabot naton ang mabaton naton nga sabat. Pero indi gid pagbalewalaon ni Jehova ang aton mga pangamuyo. Palangga gid niya kita, kag indi gid niya kita pagbayaan. (Sal. 9:10) Gani padayon nga ‘magsalig sa iya sa tanan nga tion,’ kag ipangamuyo sa iya ang tanan mo nga ginabatyag.​—Sal. 62:8.