Mga Paagi sa Pagpasangkad sang Imo Ministeryo

SANG ipadala na ni Jesus ang iya mga disipulo subong mga manugbantala sang Ginharian, nagsiling sia sa ila: “Huo, madamo ang alanyon, apang diutay lamang ang mangangani.” Madamo pa ang dapat himuon, gani nagdugang sia: “Pakiluoy kamo sa Agalon sang alanyon nga magpadala sia sang mga mangangani sa iya alanyon.” (Mat. 9:37, 38) Gintudluan ni Jesus ang mga disipulo kon paano himuon ang ila ministeryo. Mabatyagan ang pagkahilingagawon sa iya ginsiling: “Sa wala pa ninyo malibot ang mga siudad sang Israel, ang Anak sang tawo magaabot.”—Mat. 10:23.

² Madamo man subong ang hilikuton sa ministeryo sa latagon. Malip-ot na lang ang tion, kag dapat ibantala ining maayong balita sang Ginharian sa wala pa mag-abot ang katapusan! (Mar. 13:10) Sanglit ang latagon amo ang kalibutan, maathag nga nagaatubang kita sing sitwasyon nga kaanggid sa naeksperiensiahan anay ni Jesus kag sang iya mga disipulo, apang sa mas daku nga kasangkaron. Bisan diutay lang kita kon ipaanggid sa binilyon ka tawo sa kalibutan, makasiguro kita nga buligan kita ni Jehova. Ang maayong balita sang Ginharian ibantala sa bug-os nga duta, kag sa gintalana nga tion ni Jehova, magaabot ang katapusan. Unahon bala naton sa aton kabuhi ang Ginharian sang Dios agod matuman sing bug-os ang aton ministeryo? Ano nga teokratiko nga mga tulumuron ang panikasugan naton para mahimo ini?

³ Agod ipabutyag kon ano ang ginapangabay ni Jehova sa tagsa ka nadedikar nga alagad Niya, si Jesus nagsiling: “Higugmaa si Jehova nga imo Dios sa bug-os mo nga tagipusuon kag sa bug-os mo nga kalag kag sa bug-os mo nga hunahuna kag sa bug-os mo nga kusog.” (Mar. 12:30) Dapat tanan kita mangin bug-os kalag sa pag-alagad sa Dios. Nagakahulugan ini nga ginapakita naton nga madalom katama ang aton debosyon kag matuod gid ang aton dedikasyon paagi sa paghimo sang aton bug-os nga masarangan sa pag-alagad kay Jehova. (2 Tim. 2:15) Madamo sing kahigayunan nga bukas sa kada isa sa aton, suno sa aton mga kahimtangan kag ikasarang. Binagbinaga ang pila sa sini, kag magpamat-od kon ano nga teokratiko nga mga tulumuron ang imo panikasugan agod matuman ang imo ministeryo.

PAG-ALAGAD SUBONG MANUGBANTALA SANG KONGREGASYON

⁴ Ang tanan nga nagabaton sang kamatuoran may pribilehiyo sa pagbantala sing maayong balita. Amo ini ang panguna nga hilikuton nga ginsugo ni Jesus sa iya mga disipulo. (Mat. 24:14; 28:19, 20) Ang isa ka disipulo ni Jesucristo kinaandan na nga nagapakigsugilanon gilayon sa iban parte sa maayong balita sa tapos nga mabatian ini. Amo sini ang ginhimo nanday Andres, Felipe, Cornelio, kag sang iban pa. (Juan 1:40, 41, 43-45; Binu. 10:1, 2, 24; 16:14, 15, 25-34) Buot bala silingon nga ang isa mahimo na makaistorya parte sa maayong balita antes pa sia mabawtismuhan? Huo! Kag kon kalipikado na sia nga mangin di-bawtismado nga manugbantala sa kongregasyon, mahimo na sia makapakigbahin sa pamalaybalay nga pagbantala. Nahisuno sa iya ikasarang kag kahimtangan, mahimo man sia makapakigbahin sa iban nga porma sang pagministeryo.

⁵ Sa tapos nga mabawtismuhan ang isa ka manugbantala, pat-od gid nga interesado sia nga himuon ang tanan niya nga masarangan para mabuligan ang iban nga mahibaluan ang maayong balita. Ang mga lalaki kag babayi may pareho nga pribilehiyo nga makigbahin sa pagbantala. Isa gid ka pagpakamaayo nga bisan sa gamay lang nga paagi, makaamot kita sa pagpasanyog sang intereses sang Ginharian sang Dios. Pat-od gid nga mangin malipayon ang bisan sin-o nga makapasangkad sang iya ministeryo paagi sa pagpakigbahin sa dugang pa nga porma sang pag-alagad.

PAG-ALAGAD KON DIIN MAS DAKU ANG KINAHANGLANON

⁶ Mahimo nga ang teritoryo sang inyo kongregasyon pirme ginakobrehan kag napanaksihan na sing maayo. Kon amo sina, ayhan luyag mo pasangkaron ang imo ministeryo paagi sa pagsaylo sa lugar diin mas daku ang kinahanglanon sa latagon. (Binu. 16:9) Kon gulang ka ukon ministeryal, mahimo nga may iban nga kongregasyon nga nagakinahanglan sang imo bulig. Ang inyo manugtatap sang sirkito mahimo may mga panugda kon paano ka makabulig sa iban nga kongregasyon sa sirkito. Kon luyag mo mag-alagad sa iban nga lugar sa inyo pungsod, ang sanga talatapan makahatag sa imo sang mapuslanon nga impormasyon.

⁷ Luyag mo bala mag-alagad sa iban nga pungsod? Kon huo, dapat mo ini binagbinagon sing maayo. Maayo nga ipakighambal ini sa mga gulang sang inyo kongregasyon. Pat-od nga ina nga desisyon may daku nga epekto sa imo pati na sa magaupod sa imo. (Luc. 14:28) Pero kon wala ka man lang sing plano nga mag-alagad sing malawig didto, mas maayo nga mag-alagad ka na lang sa lugar nga sakop sang inyo pungsod.

⁸ Sa pila ka pungsod, ang mga utod nga lalaki nga ginagamit nga manugtatap bag-uhan lang sa kamatuoran. Ining mapainubuson nga lokal nga mga utod handa nga magbaton sang pagpanguna sang mas eksperiensiado nga mga gulang nga magasaylo sa ila kongregasyon. Kon gulang ka kag nagahunahuna nga magsaylo sa sina nga pungsod, tandai nga ang imo tulumuron indi nga buslan ining lokal nga mga utod. Sa baylo, tulumuron mo nga mag-alagad kaupod nila. Palig-una sila nga lab-uton kag batunon ang mga responsibilidad sa kongregasyon. (1 Tim. 3:1) Mangin mapinasensiahon kon may mga butang nga wala ginahimo suno sa ginahimo sa imo ginhalinan nga pungsod. Gamita ang imo eksperiensia subong gulang nga mabuligan ang kauturan. Kag kon mag-abot ang tion nga kinahanglanon na nga magpauli ka sa inyo pungsod, handa na ang lokal nga mga gulang sa pag-atipan sa kongregasyon.

⁹ Antes ihatag sa imo sang sanga talatapan ang mga ngalan sang mga kongregasyon nga mahimo mo mabuligan, ang inyo Komite sang Pag-alagad sang Kongregasyon dapat magpadala anay sing sulat sang rekomendasyon. Ini nga sulat kinahanglan bisan pa nagaalagad ka subong gulang, ministeryal, payunir, ukon manugbantala. Ipadala sing direkta sang Komite sang Pag-alagad ang sulat sang rekomendasyon upod sa imo mga pamangkot sa sanga talatapan sang pungsod nga luyag mo alagaran.

PAGBANTALA SA IBAN NGA LENGUAHE

¹⁰ Agod pasangkaron ang imo ministeryo, ayhan luyag mo magtuon sing iban nga lenguahe, lakip ang sign language. Kon amo sina ang imo tulumuron, ipakighambal ini sa mga gulang kag sa manugtatap sang sirkito. Makahatag sila sing mga panugda kag pagpalig-on. Paagi sa pagdumala sang sanga talatapan, ang pila ka sirkito nag-organisar sang mga klase agod hanason ang kalipikado nga mga manugbantala kag payunir sa pagbantala sa iban nga lenguahe.

PAYUNIR NGA PAG-ALAGAD

¹¹ Dapat pamilyar ang tanan nga manugbantala sang mga kinahanglanon para sa auxiliary, regular, kag espesyal payunir nga pag-alagad kag sa iban pa nga sahi sang bug-os tion nga pag-alagad. Ang payunir dapat isa ka huwaran nga bawtismado nga Cristiano kag ginatugot sang iya kahimtangan nga makahinguyang sing espesipiko nga kadamuon sang oras sa pagbantala sing maayong balita. Ginaaprobahan sang Komite sang Pag-alagad sang Kongregasyon ang mga aplikasyon para sa auxiliary kag regular payunir nga pag-alagad, samtang ang sanga talatapan naman ang nagatangdo sa mga espesyal payunir.

¹² Ang mga auxiliary payunir mahimo aprobahan sa pag-alagad sa isa ka bulan, sa pila ka sagunson nga binulan, ukon sing dalayon, depende sa ila kahimtangan. Madamo nga manugbantala sang Ginharian ang naga-auxiliary payunir sa pinasahi nga mga okasyon, subong sang panahon sang Memoryal ukon sa bulan sang pagduaw sang manugtatap sang sirkito. Ginapili naman sang iban ang mga bulan sang bakasyon. Ang bawtismado kag nagaeskwela nga mga manugbantala mahimo mag-auxiliary payunir kon sira-klase. Ang mga manugbantala puede maka-auxiliary payunir nga may ginpanubo nga oras nga lalab-uton kada Marso kag Abril kag sa bulan sang pagduaw sang manugtatap sang sirkito. Bisan ano ang imo kahimtangan, kon maayo ang imo tindog sa moral kag pamatasan, kon makahimo ka sing kahimusan sa paglab-ot sang ginapatuman nga oras sa sulod sang isa ka bulan ukon kapin pa subong auxiliary payunir, malipay ang mga gulang nga binagbinagon ang imo aplikasyon para sa sini nga pribilehiyo sang pag-alagad.

¹³ Agod makalipikar subong regular payunir, ang imo kahimtangan dapat nagatugot nga malab-ot mo ang ginapatuman nga oras kada tuig. Subong regular payunir, dapat ka mag-alagad upod sa inyo kongregasyon. Ang makugi nga mga payunir pagpakamaayo sa kongregasyon, nga nagapapagsik sang pagministeryo sa latagon kag nagapalig-on pa gani sa iban nga magpayunir. Apang antes ka mag-aplay subong regular payunir, dapat nga huwaran ka nga manugbantala nga nabawtismuhan sa indi magkubos sa anom ka bulan.

¹⁴ Ang mga espesyal payunir kinaandan na nga ginapili sa mga regular payunir nga nagpakita sang pagkaepektibo sa ministeryo. Dapat makasarang sila mag-alagad bisan diin man sila iasayn sang sanga talatapan. Sa masami, ginaasayn sila sa naligwin nga mga lugar nga may interesado kag may posibilidad nga makatukod sang bag-o nga mga kongregasyon. Kon kaisa, ginapadala sila sa mga kongregasyon nga kinahanglan buligan para makobrehan ang ila teritoryo. Ang pila ka espesyal payunir nga gulang ginaasayn sa pagbulig sa magagmay nga mga kongregasyon, bisan pa wala sila nagakinahanglan sang dugang nga manugpangabudlay sa latagon. Ang mga espesyal payunir nagabaton sing iguigo nga allowance para sa ila mga kinahanglanon. Ang pila ka espesyal payunir ginatangdo sing temporaryo lang.

MGA MISYONERO SA LATAGON

¹⁵ Ang Komite sang Pag-alagad sang Nagadumala nga Hubon amo ang nagatangdo sa mga misyonero sa latagon kag ang lokal nga Komite sang Sanga amo ang nagaasayn sa ila nga mag-alagad sa madamo sing tawo nga mga lugar. Daku gid ang ila nahimo agod palig-unon kag pauswagon ang pagbantala kag mga hilikuton sang kongregasyon. Sa masami, ang mga misyonero sa latagon nagabaton sing paghanas sa School for Kingdom Evangelizers. Ginaamanan sila sang dalayunan kag iguigo nga allowance para sa ila mga kinahanglanon.

PAG-ALAGAD SA SIRKITO

¹⁶ Ang mga gintangdo sang Nagadumala nga Hubon subong mga manugtatap sang sirkito una nga nagabaton sing paghanas kag eksperiensia paagi sa pag-alagad subong tal-us nga mga manugtatap sang sirkito. Ginahigugma nila ang ministeryo kag ang ila kauturan. Makugi sila nga mga payunir, maukod nga mga estudyante sang Biblia, kag epektibo nga mga humalambal kag manunudlo. Makita gid sa ila ang bunga sang espiritu. Balanse man sila, makatarunganon, kag mahinantupon. Kon ang utod may asawa, ang iya payunir nga asawa dapat maayo gid nga huwaran sa paggawi kag pagpakig-angot sa iban. Dapat nga epektibo sia sa pagbantala. Nahangpan man niya ang iya papel subong mapinasakupon nga Cristianong asawa, kag wala niya ginapangunahan sa paghambal ang iya bana ukon ginadominahan ang mga paghambalanay. Tuman kasako sang iskedyul sang mga manugtatap sang sirkito kag sang ila asawa, amo nga dapat mapagros gid ang mga nagalab-ot sa sini nga pribilehiyo. Ang mga payunir wala nagaaplay para sa pag-alagad sa sirkito. Sa baylo, ginapahibalo nila ang ila handum nga mag-alagad sa sirkito sa ila manugtatap sang sirkito, nga magahatag sa ila sing mga panugda.

TEOKRATIKO NGA MGA ESKWELAHAN

¹⁷ School for Kingdom Evangelizers: Madamo pa nga manugbantala ang kinahanglan agod makobrehan ang talagsa lang mapanghikutan nga mga teritoryo kag mahatagan sing espirituwal nga bulig ang mga kongregasyon. Gani, ang indi minyo nga mga utod nga lalaki kag babayi ukon mag-asawa mahimo mag-aplay agod makabaton sing pinasahi nga paghanas sa School for Kingdom Evangelizers. Pagkagradwar sa sini nga eskwelahan, ginapadala sila subong mga regular payunir sa mga lugar sa ila pungsod diin mas daku ang kinahanglanon. Apang, ang mga handa sa pag-alagad mahimo hatagan sing iban pa nga asaynment sa ila pungsod ukon sa iban nga pungsod. May pila nga ginapadala subong temporaryo ukon permanente nga espesyal payunir. Ang mga payunir nga interesado sa sini nga eskwelahan makakuha sing impormasyon paagi sa pagtambong sa miting para sa sini nga eskwelahan sa tion sang rehiyonal nga kombension.

¹⁸ Watchtower Bible School of Gilead: Ang indi minyo nga utod nga lalaki, babayi, kag mag-asawa nga ginpili agod mag-eskwela sa sini nga eskwelahan makahibalo mag-Ingles kag yara sa espesyal nga bug-os tion nga pag-alagad. May ikasarang sila sa pagpalig-on kag pagpabakod sa latagon ukon sa pag-organisar sa sanga. Napakita na nila nga nalipay sila sa pag-alagad sa kauturan kag mabuligan sing mainayuhon ang iban nga matun-an kag masunod ang base sa Kasulatan kag teokratiko nga panuytoy. Ang lokal nga Komite sang Sanga amo ang nagaagda sa potensial nga mga estudyante nga magsumiter sang aplikasyon. Ang mga naggradwar sa sini nga eskwelahan ginaasayn sa latagon ukon sa sanga talatapan sa iban nga pungsod ukon sa ila mismo nga pungsod.

PAG-ALAGAD SA BETHEL

¹⁹ Ang pag-alagad sa Bethel isa ka pinasahi nga pribilehiyo. Ang ngalan nga Bethel nagakahulugan nga “Balay sang Dios,” kag nagakaigo gid ini sa sini nga mga duog nga sentro sang teokratiko nga hilikuton. Ang kauturan sa Bethel may importante nga papel sa paghimo, pagbadbad, kag pagpanagtag sing literatura nga pasad sa Biblia. Mapuslanon katama ang ila pag-alagad sa Nagadumala nga Hubon, nga nagatatap kag nagahatag sing giya sa mga kongregasyon sa bug-os nga duta. Madamo nga Bethelite nga translator ang nagaistar kag nagatrabaho sa lugar nga sakop sang sanga diin ginahambal ang lenguahe nga gina-translate nila. Gani, mabatian nila ang lenguahe nga ginahambal adlaw-adlaw. Mahibaluan man nila sing personal kon bala nahangpan sang mga tawo ang lenguahe nga ila ginagamit sa pag-translate sang mga publikasyon.

²⁰ Kalabanan nga hilikuton sa Bethel mabug-at nga trabaho. Bangod sini, ang kalabanan nga ginapatawag sa Bethel amo ang dedikado, bataon nga mga bawtismado nga lalaki, mapagros, kag makusog sa pisikal. Kon may kinahanglanon sa sanga nga nagadumala sa inyo pungsod kag luyag mo mag-alagad sa Bethel, makakuha ka sing dugang nga impormasyon sa mga gulang sa inyo kongregasyon.

PAG-ALAGAD SA KONSTRUKSION

²¹ Ang pagpatindog sing teokratiko nga mga pasilidad isa ka sahi sang sagrado nga pag-alagad, kaangay sang pagpatindog anay sang templo ni Solomon. (1 Hari 8:​13-​18) Madamo nga kauturan ang nagapakita sing tumalagsahon nga kakugi sa paghatag sang ila tion kag ikasarang agod makigbahin sa sini nga hilikuton.

²² Makabulig ka bala sa sini? Kon bawtismado ka nga manugbantala nga handa makigbahin sa sini, pabaloran gid sang mga utod nga nagatatap sang konstruksion sa inyo lugar ang imo bulig kag handa man sila nga hanason ka bisan limitado lang ang imo ikasarang. Pahibalua ang inyo mga gulang nga luyag mo magbulig. Ang pila ka bawtismado nga manugbantala nakaboluntaryo pa gani sa pagpatindog sing teokratiko nga mga pasilidad sa iban nga pungsod.

²³ Madamo sing kahigayunan nga makapakigbahin sa pag-alagad sa konstruksion. Ang huwaran nga bawtismado nga mga manugbantala nga may ikasarang kag makabulig sa mga proyekto nga malapit sa ila ginapuy-an mahimo makaalagad subong Local Design/Construction volunteer. Ang iban makabulig sa mas malayo nga mga proyekto sa limitado nga tion kag ginatangdo sang sanga talatapan nga mag-alagad subong mga construction volunteer sa sulod sang mga duha ka semana pakadto sa tatlo ka bulan. Ang mga gintangdo nga mag-alagad sa malawig nga tion ginatawag nga mga construction servant. Ang construction servant nga ginhatagan sang asaynment sa iban nga pungsod nagaalagad subong expatriate construction servant. Ang Construction Group nga ginahuman sang mga construction servant kag construction volunteer amo ang nagadumala sang tagsa ka proyekto kag ginabuligan sila sang mga Local Design/Construction volunteer kag mga boluntaryo halin sa mga kongregasyon nga nadalahig sa proyekto. Nagasaylo ang mga Construction Group halin sa isa ka proyekto pakadto sa masunod nga proyekto sa teritoryo nga sakop sang sanga.

ANO ANG IMO ESPIRITUWAL NGA MGA TULUMURON?

²⁴ Kon nadedikar mo na ang imo kabuhi kay Jehova, ang imo handum amo ang pag-alagad sa iya sa wala sing katapusan. Apang ano ang imo espirituwal nga mga tulumuron para mahimo ini? Ang espirituwal nga mga tulumuron makabulig sa imo nga magamit sing maalamon ang imo kusog kag iban pa nga yara sa imo. (1 Cor. 9:26) Ang pagpahamtang sang kaangay nga mga tulumuron makabulig sa imo nga mag-uswag sa espirituwal kag magkonsentrar sa mas importante nga mga butang samtang ginatinguhaan mo nga malab-ot ang dugang nga pribilehiyo sa pag-alagad.​—Fil. 1:​10; 1 Tim. 4:​15, 16.

²⁵ Si apostol Pablo nagpahamtang sing maayo nga halimbawa nga mailog naton sa aton pag-alagad sa Dios. (1 Cor. 11:1) Nagpanikasog gid si Pablo sa pag-alagad kay Jehova. Nakita niya nga ginhatagan sia ni Jehova sing madamo nga kahigayunan sa pag-alagad. Nagsulat sia sa kauturan sa Corinto: “Nabuksan sa akon ang daku nga puertahan sang kahigayunan para sa madamo nga hilikuton.” Matuod man bala ini sa aton? Huo, madamo kita sing kahigayunan nga maalagad si Jehova upod ang kongregasyon, ilabi na sa pagbantala sing maayong balita sang Ginharian. Apang kaangay ni Pablo, dapat naton dumdumon nga ang pagsulod sa “daku nga puertahan” nagalakip sang pag-atubang sa “madamo nga nagapamatok.” (1 Cor. 16:9) Handa si Pablo nga disiplinahon ang iya kaugalingon. Talupangda ang ginsiling niya: “Ginasakit ko ang akon lawas kag ginahimo ini nga ulipon.” (1 Cor. 9:24-27) Amo man bala kita sina?

²⁶ Ang kada isa ginapalig-on nga lab-uton ang teokratiko nga mga tulumuron nahisuno sa iya kahimtangan. Madamo subong ang yara sa lainlain nga porma sang bug-os tion nga pag-alagad bangod nagpahamtang sila sing mga tulumuron sang pamatan-on pa sila. Bisan sang mga bata pa sila, ginapalig-on na sila sang ila mga ginikanan kag sang iban nga himuon ini. Gani, natigayon nila ang bugana nga hilikuton sa pag-alagad kay Jehova—nga wala gid nila ginahinulsulan. (Hulu. 10:22) Ang iban nga tulumuron amo ang pagpakigbahin sa paggua sa latagon kada semana, pagsugod kag pagdumala sing mga pagtuon sa Biblia, ukon paghinguyang sing dugang nga tion sa paghanda sa mga miting. Ang importante amo nga nagapabilin kita nga malig-on kag ginatuman sing bug-os ang aton ministeryo. Kon himuon naton ini, ginapadunggan naton si Jehova kag ginalab-ot ang aton panguna nga tulumuron, nga alagaron sia sa wala sing katapusan.​—Luc. 13:24; 1 Tim. 4:7b, 8.