Kabalo Ka Bala sang Kinalain sang Kamatuoran sa Kabutigan?

1. Ano ang ginabatyag mo parte sa kamatuoran?

NANAMIAN gid ang katawhan ni Jehova sa kamatuoran nga makita sa Pulong sang Dios. Amo ini ang pundasyon sang aton pagtuo. (Roma 10:17) Kumbinsido kita nga gintukod ni Jehova ang Cristianong kongregasyon nga “isa ka haligi kag pamakod sang kamatuoran.” (1 Tim. 3:15) Kag nalipay kita magpasakop “sa mga nagapanguna” sa aton. Ginapaathag nila ang kamatuoran halin sa Biblia kag nagahatag sila sang mga instruksion para mahimo naton ang kabubut-on sang Dios.​—Heb. 13:17.

2. Suno sa Santiago 5:​19, ano ang isa ka katalagman pagkatapos naton matun-an ang kamatuoran?

² Ginbaton na naton ang kamatuoran kag kumbinsido kita nga kinahanglan naton sundon ang mga instruksion halin sa organisasyon sang Dios. Pero pagkatapos naton matun-an ang kamatuoran, posible gihapon nga mapatalang kita. (Basaha ang Santiago 5:19.) Gusto gid ni Satanas nga madula ang aton pagsalig sa Biblia ukon sa mga instruksion halin sa organisasyon sang Dios.​—Efe. 4:14.

3. Ngaa dapat gid naton tumanon ang kamatuoran? (Efeso 6:​13, 14)

³ Basaha ang Efeso 6:​13, 14. Sa indi na lang madugay, magagamit ang Yawa sang makagalanyat nga mga kabutigan nga magapatalang sa tanan nga pungsod para pamatukan nila si Jehova. (Bug. 16:​13, 14) Kabalo man kita nga pabaskugon pa gid ni Satanas ang iya mga ginahimo para patalangon ang katawhan ni Jehova. (Bug. 12:9) Gani, importante gid nga hanason naton ang aton kaugalingon para kabalo kita sang kinalain sang kamatuoran sa kabutigan, kag para mangin matinumanon kita sa kamatuoran. (Roma 6:17; 1 Ped. 1:22) Nagadepende sa sini ang aton kaluwasan sa tion sang dakung kapipit-an.

4. Ano ang binagbinagon naton sa sini nga artikulo?

⁴ Sa sini nga artikulo, tun-an naton ang duha ka kinaiya nga kinahanglan naton para mabal-an naton ang kamatuoran nga halin sa Biblia kag para matuman naton ang mga instruksion halin sa organisasyon sang Dios. Dayon binagbinagon naton ang tatlo ka panugda nga dapat naton himuon para padayon naton nga matuman ang kamatuoran.

MGA KINAIYA NGA KINAHANGLAN NATON PARA MABAL-AN NATON ANG KAMATUORAN

5. Paano makabulig ang kahadlok kay Jehova para mabal-an naton ang kamatuoran?

⁵ Kahadlok kay Jehova. Kon may nagakaigo kita nga kahadlok kay Jehova, indi gid kita maghimo sang bisan ano nga makapasubo sa iya bangod palangga gid naton sia. Gusto gid naton nga malipay sa aton si Jehova. Gani gusto gid naton mabal-an ang kinalain sang husto kag sala, kag ang kinalain sang kamatuoran kag kabutigan. (Hulu. 2:​3-6; Heb. 5:14) Indi gid naton pagtugutan nga maglabaw ang aton kahadlok sa tawo sangsa aton gugma kay Jehova. Kon tugutan naton nga maglabaw ini, ang mga tawo amo ang gusto naton nga malipay sa aton. Kag sa masami, naakig si Jehova sa mga butang nga nagapahalipay sa mga tawo.

6. Bangod sa kahadlok sa tawo, paano ginpatiko sang pulo ka pangulo sang Israel ang kamatuoran?

⁶ Kon mas labaw ang aton kahadlok sa tawo sangsa aton kahadlok sa Dios, posible nga mapahilayo kita sa kamatuoran. Binagbinaga ang halimbawa sang 12 ka pangulo nga nag-espiya sa duta nga ginpromisa ni Jehova nga ihatag sa mga Israelinhon. Sa bahin sang pulo ka espiya, mas labaw ang ila kahadlok sa mga Canaanhon sangsa ila gugma kay Jehova. Ginsilingan nila ang pareho nila nga mga Israelinhon: “Indi kita mahimo magpakig-away sa ila, bangod mas makusog sila sangsa aton.” (Num. 13:​27-31) Kon basihan lang ang makita sang mga tawo, matuod gid man nga mas makusog ang mga Canaanhon sangsa mga Israelinhon. Pero sang nagsiling sila nga indi nila mapierde ang ila mga kaaway, ginpakita nila nga wala nila ginhunahuna si Jehova. Mas maayo kuntani kon nagpokus ang pulo ka espiya sa gusto ni Jehova nga himuon sang mga Israelinhon. Mas maayo man kon ginpamalandungan nila ang mga ginhimo ni Jehova para sa ila. Kon ginhimo nila ini, narealisar nila kuntani nga bisan pa makusog ang mga Canaanhon, wala gid sing makatupong sa gahom ni Jehova. Pero sa bahin ni Josue kag ni Caleb, gusto nila nga malipay sa ila si Jehova. Gani, lain gid sila sa mga espiya nga wala sing pagtuo. Ginsilingan nila ang katawhan: “Kon nahamuot si Jehova sa aton, dalhon niya kita sa sini nga duta kag ihatag niya sa aton ini nga duta.”​—Num. 14:​6-9.

7. Paano naton mapabakod ang aton kahadlok kay Jehova? (Tan-awa man ang piktyur.)

⁷ Para mapabakod naton ang aton kahadlok kay Jehova, dapat kita magpokus sa kon ano ang makapahalipay sa iya sa kada tion nga may himuon kita nga desisyon. (Sal. 16:8) Kon nagabasa ka sang mga kasaysayan sa Biblia, pamangkuta ang imo kaugalingon, ‘Kon ako ang ara sa sini nga sitwasyon, ano ayhan ang akon himuon nga desisyon?’ Halimbawa, imadyina nga nagapamati ka samtang ginasiling sang pulo ka pangulo sang Israel ang ila negatibo nga report. Patihan mo bala ang ila report kag mahadlok ka sa tawo, ukon mas mangibabaw ang imo gugma kay Jehova kag ang imo handum nga mapahalipay sia? Wala ginpatihan sang bilog nga henerasyon sang mga Israelinhon ang kamatuoran nga ginsiling sa ila ni Josue kag ni Caleb. Bangod sini, wala sila nakasulod sa Ginsaad nga Duta.​—Num. 14:​10, 22, 23.

8. Ano nga kinaiya ang dapat naton panikasugan nga ipakita, kag ngaa?

⁸ Pagkamapainubuson. Ginapahayag ni Jehova ang kamatuoran sa mga mapainubuson. (Mat. 11:25) Mapainubuson kita nga nagbaton sang bulig para matun-an naton ang kamatuoran. (Binu. 8:​30, 31) Pero, dapat kita maghalong para indi kita mangin bugalon. Kay kon mangin bugalon kita, posible hatagan naton sing importansia ang aton personal nga mga opinyon. Kag bisan pa nagapati kita nga husto ang mga prinsipio sa Biblia kag ang mga instruksion halin sa organisasyon ni Jehova, posible hunahunaon naton nga husto man ang aton mga opinyon gani depende na sa aton kon diin ang aton sundon.

9. Ano ang himuon naton para mangin mapainubuson kita pirme?

⁹ Para mangin mapainubuson kita pirme, dapat naton dumdumon kon daw ano kita kagamay kon ikumparar kay Jehova. (Sal. 8:​3, 4) Puede man kita makapangamuyo kay Jehova nga buligan niya kita nga mangin mas mapainubuson pa gid kag batunon pirme ang iya pagtudlo. Buligan kita ni Jehova nga mas pabaloran ang iya panghunahuna sangsa aton panghunahuna. Mabal-an naton ang iya panghunahuna paagi sa iya Pulong kag sa iya organisasyon. Sa imo pagbasa sang Biblia, pangitaa ang mga punto nga nagapamatuod nga palangga ni Jehova ang mga mapainubuson kag naakig sia sa mga bugalon, sa mga hambog, kag sa mga matinaastaason. Kag kon makabaton ka sang mga pribilehiyo kag madamo na ang makakilala sa imo, panikasugi gid nga mangin mapainubuson pirme.

KON PAANO NATON PADAYON NGA MATUMAN ANG KAMATUORAN

10. Sin-o ang gingamit ni Jehova para maghatag sang instruksion sa iya katawhan?

¹⁰ Padayon nga saligi ang mga instruksion halin sa organisasyon ni Jehova. Sa Israel sang una, gingamit ni Jehova si Moises sa paghatag sang mga instruksion sa Iya katawhan. Sang ulihi, gingamit man niya si Josue. (Jos. 1:​16, 17) Ginpakamaayo ang mga Israelinhon sang ginkabig nila ini nga mga lalaki bilang mga representante ni Jehova nga Dios. Pagligad sang pila ka gatos ka tuig, gintukod ang Cristianong kongregasyon. Sa sini nga tion, ang 12 ka apostoles amo ang nagahatag sang mga instruksion. (Binu. 8:​14, 15) Sang ulihi, ginlakip sa mga nagahatag sang mga instruksion ang iban pa nga mga gulang sa Jerusalem. Paagi sa pagsunod sa mga instruksion halin sa sining matutom nga mga lalaki, “padayon nga naglig-on sa pagtuo ang mga kongregasyon kag nagdugang ang ila kadamuon adlaw-adlaw.” (Binu. 16:​4, 5) Sa aton tion subong, ginapakamaayo man kita ni Jehova kon ginasunod naton ang mga instruksion halin sa iya organisasyon. Pero ano ayhan ang mabatyagan ni Jehova kon indi naton pagkilalahon ang iya mga gintangdo nga magpanguna sa aton? Para masabat ini, binagbinagon naton ang natabo sa mga Israelinhon sang nagapakadto sila sa Ginsaad nga Duta.

11. Ano ang natabo sa mga Israelinhon sang una bangod ginkuestyon nila si Moises nga ginpili sang Dios nga magpanguna sa ila? (Tan-awa man ang piktyur.)

¹¹ Samtang nagalakbay ang mga Israelinhon pakadto sa Ginsaad nga Duta, ginkuestyon sang bantog nga mga lalaki si Moises kag ang iya responsibilidad nga ginhatag ni Jehova sa iya. Nagsiling sila: “Balaan ang bug-os nga katilingban [indi lang si Moises], kag si Jehova yara sa tunga nila.” (Num. 16:​1-3) Matuod gid man nga balaan ang “bug-os nga katilingban” sa pagtan-aw ni Jehova, pero ginpili niya si Moises para pangunahan ang Iya katawhan. (Num. 16:28) Gani sang ginpakalain sang mga rebelde si Moises, si Jehova ang ila ginpakalain. Wala sila nagpokus sa gusto ni Jehova. Sa baylo, nagpokus sila sa gusto nila. Gusto nila sang dugang nga awtoridad kag mangin bantog pa gid sila. Ginpatay ni Jehova ang mga lider sa sini nga pagrebelde pati na ang linibo ka Israelinhon nga nagdampig sa ila. (Num. 16:​30-35, 41, 49) Subong, makasigurado kita nga wala nalipay si Jehova sa mga nagakuestyon sa mga instruksion halin sa iya organisasyon.

12. Ngaa masaligan gid naton pirme ang organisasyon ni Jehova?

¹² Masaligan gid naton pirme ang organisasyon ni Jehova. Kon kinahanglan bag-uhon ang aton paghangop sa isa ka kamatuoran sa Biblia ukon ang aton pag-organisar sa hilikuton sang Ginharian, wala nagapangalag-ag ang nagapanguna nga mga brother nga maghimo sang mga pagbag-o. (Hulu. 4:18) Ang panguna nga rason kon ngaa ginahimo nila ini amo nga gusto gid nila nga malipay sa ila si Jehova. Ginasigurado man nila nga nabase sa Pulong sang Dios ang ila mga desisyon kay amo ini ang talaksan nga dapat sundon sang tanan nga katawhan ni Jehova.

13. Ano “ang talaksan sang maayo nga mga pulong,” kag ano ang dapat naton himuon sa sini?

¹³ “Padayon nga sunda ang talaksan sang maayo nga mga pulong.” (2 Tim. 1:13) “Ang talaksan sang maayo nga mga pulong” nagapatuhoy sa Cristianong mga panudlo nga makita sa Biblia. (Juan 17:17) Ini nga mga panudlo amo ang aton ginabasihan sa tanan naton nga ginapatihan. Gintudluan kita sang organisasyon ni Jehova nga dapat manguyapot kita sa sini nga talaksan. Kon himuon naton ini pirme, pakamaayuhon gid kita.

14. Ngaa wala nakapadayon sa pagpanguyapot sa “talaksan sang maayo nga mga pulong” ang pila ka Cristiano?

¹⁴ Ano ang posible matabo kon mag-untat kita sa pagpanguyapot sa “talaksan sang maayo nga mga pulong”? Binagbinaga ini nga halimbawa. Sang unang siglo, may pila ka Cristiano nga nagpalapta sang kabutigan nga nag-abot na ang adlaw ni Jehova. Posible may isa ka sulat nga abi sang mga tawo ginsulat ni apostol Pablo nga nagapaathag parte sa sini. Bangod wala nila gin-usisa kon bala matuod ini ukon indi, may pila ka Cristiano sa Tesalonica nga nagpati sa sini kag ginsugid man nila ini sa iban. Wala kuntani sila nalimbungan kon gindumdom nila ang mga gintudlo sa ila ni Pablo sang kaupod pa nila sia. (2 Tes. 2:​1-5) Ginlaygayan ni Pablo ang iya mga kauturan nga indi dayon magpati sa tanan nga mabatian nila. Kag para buligan sila sa palaabuton, amo ini ang ginsiling ni Pablo sa katapusan sang iya ikaduha nga sulat para sa mga taga-Tesalonica: “Ako mismo si Pablo ang nagsulat sini nga pangamusta. Makilala ninyo ang akon mga sulat paagi sa sini nga agi; amo ini ang akon panulat.”​—2 Tes. 3:17.

15. Paano naton maproteksionan ang aton kaugalingon sa mga kabutigan nga daw masal-an nga matuod? Maghatag sing halimbawa. (Tan-awa man ang mga piktyur.)

¹⁵ Ano ang matun-an naton sa ginsiling ni Pablo sa mga taga-Tesalonica? Kon makabati kita sang impormasyon nga wala nagahisanto sa aton natun-an sa Biblia ukon sang tumalagsahon nga mga istorya, dapat naton gamiton ang aton ikasarang sa paghantop. Sa Soviet Union sang una, nagpalapta ang aton mga kaaway sang isa ka sulat nga halin kuno sa world headquarters. Bangod sa sini nga sulat, nagdesisyon ang pila ka brother nga maghimo sang ila kaugalingon nga organisasyon. Daw matuod gid nga halin sa world headquarters ini nga sulat. Pero wala nagpalimbong ang matutom nga mga brother. Narealisar nila nga ang mensahe sang sulat wala nagahisanto sa mga butang nga gintudlo sa ila. Subong, ginagamit kon kaisa sang mga kaaway sang kamatuoran ang Internet kag social media para magduhaduha kita kag para mabahinbahin kita. Para indi kita “madali malingkang sa [aton] pangatarungan,” dapat naton proteksionan ang aton kaugalingon. Dapat naton usisaon sing maayo kon bala ang aton nabatian ukon nabasahan nagahisanto sa mga kamatuoran nga natun-an naton.​—2 Tes. 2:2; 1 Juan 4:1.

16. Suno sa Roma 16:​17, 18, ano ang dapat naton himuon kon may pila nga nagapalapta sang mga impormasyon nga wala nagahisanto sa kamatuoran?

¹⁶ Magpabilin nga nahiusa sa mga mainunungon kay Jehova. Gusto sang Dios nga nahiusa kita sa aton pagsimba sa iya. Magapabilin kita nga nahiusa kon padayon kita nga manguyapot sa kamatuoran. Kon may nagapalapta sang mga impormasyon nga wala nagahisanto sa kamatuoran, puede ini makapabahinbahin sa kongregasyon. Gani, ginapaandaman kita sang Dios nga “likawan” naton ang mga nagahimo sini. Kon indi naton ini paghimuon, posible patihan naton ang mga kabutigan kag mapahilayo kita sa kamatuoran.​—Basaha ang Roma 16:​17, 18.

17. Ano ang mga benepisyo kon kabalo kita sang kamatuoran kag nagapanguyapot kita sing hugot sa sini?

¹⁷ Kon kabalo kita sang kamatuoran kag nagapanguyapot kita sing hugot sa sini, magapabilin kita nga suod kay Jehova kag mangin malig-on pirme ang aton pagtuo. (Efe. 4:​15, 16) Maproteksionan kita sa butig nga mga panudlo kag mga impormasyon nga ginapalapta ni Satanas, kag sigurado nga proteksionan gid kita ni Jehova sa tion sang dakung kapipit-an. Gani padayon nga manguyapot sing hugot sa kamatuoran, “kag ang Dios sang paghidait mangin kaupod [mo].”​—Fil. 4:​8, 9.