Mainayuhon nga Isugid sa Iban ang Kamatuoran

1. Ano ang dapat naton himuon para mangin bahin kita sang pamilya ni Jehova?

KON nagaistorya kita sa isa ka utod nga bag-o lang naton nakilala, sa masami nagapamangkot kita sa isa kag isa, “Paano mo natun-an ang kamatuoran?” May nagasabat nga “nagdaku ako sa kamatuoran.” May iban naman nga nagasabat nga “bag-o ko lang natun-an ang kamatuoran.” Amo sina ang aton sabat kay ang kamatuoran sa Pulong sang Dios amo ang nagagiya sa aton kabuhi. Ngaa masiling naton ina? Kay kabalo kita nga mangin bahin lamang kita sang pamilya ni Jehova kon ginahigugma naton ang kamatuoran kag ginaaplikar ini. Ang isa ka paagi nga mahimo naton ini amo ang mangin honest sa aton ginahambal kag ginahimo.—Sal. 15:1-3.

2. (a) Ano ang pagkakilala sang mga tawo kay Jesus? (b) Ano ang reaksion sang mga tawo sa kamatuoran nga ginsugid ni Jesus?

² Kamatuoran pirme ang ginahambal ni Jesus. Kabalo ang iya mga kaaway nga kamatuoran gid ang ginahambal niya bisan pa wala sila nanamian sa iya mga ginasiling. (Mat. 22:16) Ginsugid ni Jesus sa iya mga disipulo kon ano ang mangin reaksion sang mga tawo sa kamatuoran. Nagsiling sia: “Nagkari ako sa pagbahinbahin; ang anak nga lalaki batok sa iya amay, ang anak nga babayi batok sa iya iloy, kag ang umagad nga babayi batok sa iya ugangan nga babayi.” (Mat. 10:35) Wala ginapakita sini nga gusto ni Jesus nga pamatukan sang mga tawo ang mensahe nga ginabantala niya kag sang iya mga sumulunod. Pero kabalo sia nga amo sini ang matabo. (Mat. 23:37) Nahibaluan niya nga indi pareho ang mangin reaksion sang mga tawo sa iya mensahe. Ang iban magabaton sang kamatuoran, kag ang iban naman indi.—2 Tes. 2:9-11.

3. Ano nga mga pamangkot ang binagbinagon sa sini nga artikulo?

³ Pareho kay Jesus, ginatinguhaan gid naton nga maghambal sing kamatuoran sa tanan nga tion bisan pa indi manamian ang iban sa aton. Ginabantala kag ginatudlo man naton sa iban ang kamatuoran sa Biblia bisan pa mahimo may maakig sa aton. Buot silingon bala sini nga bangod kamatuoran man ang aton ginasugid, pagusto lang kita kon paano kag san-o naton ini ihambal? Indi. Sa sini nga artikulo, sabton anay naton ining importante nga pamangkot: Diin naton makita ang kamatuoran? Dayon, sabton naton ini nga mga pamangkot: Ngaa dapat naton isugid ang kamatuoran? Paano naton dapat isugid ang kamatuoran? Kag san-o naton dapat isugid ang kamatuoran? Ang sabat sa sini nga mga pamangkot makabulig sa aton kon paano naton masugid sing mas mainayuhon ang kamatuoran, kag mahambal ini sa husto nga tion.

DIIN NATON MAKITA ANG KAMATUORAN?

4. Ngaa makasiling kita nga si Jehova ang ginhalinan sang kamatuoran?

⁴ Si Jehova ang ginhalinan sang kamatuoran. Matuod ang tanan niya nga ginasiling. Halimbawa, matuod gid ang iya ginsiling parte sa kon ano ang husto kag sala. (Sal. 19:9; 119:142, 151) Nagakatabo gid ang tanan nga ginasiling niya parte sa palaabuton. (Isa. 55:10, 11) Ginatuman gid niya ang iya mga promisa. (Num. 23:19) Ang matuod, imposible gid kay Jehova nga magbutig. (Heb. 6:18) Gani may rason gid kon ngaa ginatawag si Jehova nga “ang Dios sang kamatuoran.”—Sal. 31:5.

5. Ngaa indi mabudlay kilalahon “ang Dios sang kamatuoran”? Ipaathag. (Binuhatan 17:27)

⁵ Ang iban nga tawo nagasiling nga mabudlay kilalahon si Jehova, “ang Dios sang kamatuoran.” Pero indi ina matuod, kay makilala naton sia paagi sa tanan niya nga tinuga. (Roma 1:20) Sang nagapakig-istorya si apostol Pablo sa grupo sang edukado nga mga Griego sa Atenas, nagsiling sia nga gusto sang Dios nga “makita nila sia” kag “indi sia malayo sa tagsa sa aton.” (Basaha ang Binuhatan 17:27.) Ang matuod, ginabuyok ni Jehova ang mapainubuson nga mga tawo nga nagapangita sang kamatuoran.—Juan 6:44.

6. Ano nga mga kamatuoran ang ginatudlo sang Biblia, kag ngaa nagapasalamat ka nga natun-an mo ini?

⁶ Ang isa pa gid ka paagi nga makilala naton si Jehova amo ang pagtuon sang Biblia. Ang mga manunulat sang Biblia gingiyahan sang balaan nga espiritu sang Dios. (2 Ped. 1:20, 21) Gani ang tanan nga nakasulat sa Biblia matuod kag masaligan gid. Halimbawa, masaligan gid naton ang ginasiling sini parte sa ginsuguran sang uniberso kag sang kabuhi sa duta. (Gen. 1:1, 26) Masaligan man naton ang ginasiling sini parte sa kon ngaa nangin makasasala kita kag kon ngaa may pag-antos kag kamatayon. (Roma 5:12; 6:23) Masaligan man naton ang ginasiling sini nga gamiton ni Jehova ang iya Anak para dulaon ang tanan nga halit nga ginhimo ni Satanas nga amo ang “amay sang kabutigan.” (Juan 8:44; Roma 16:20) Kag masaligan man naton ang promisa sang Biblia nga laglagon ni Jesus ang malain nga mga tawo, banhawon ang mga patay, himuon liwat nga paraiso ang duta, kag buligan niya kita nga mangin perpekto. (Juan 11:25, 26; 1 Juan 3:8) Nagapasalamat gid kita sa sini nga mga pribilehiyo nga ginhatag ni Jehova. Gintudluan niya kita sang kamatuoran, kag ginhatagan niya kita sang pribilehiyo nga itudlo man ini sa iban.—Mat. 28:19, 20.

NGAA DAPAT NATON ISUGID ANG KAMATUORAN?

7-8. Ngaa importante ang aton motibo sa paghambal sang kamatuoran? Maghatag sing halimbawa. (Marcos 3:11, 12) (Tan-awa man ang mga piktyur.)

⁷ Sa ginsambit na kaina, dapat kita maghambal sing kamatuoran para mangin bahin kita sang pamilya ni Jehova. Pero para malipay sa aton si Jehova, indi lang paghambal sing kamatuoran ang dapat naton himuon. Importante kay Jehova kon ngaa nagahambal kita sang kamatuoran. Binagbinaga ang natabo sa ministeryo ni Jesus diri sa duta. (Basaha ang Marcos 3:11, 12.) Sang nagabantala si Jesus malapit sa Dagat sang Galilea, madamo nga tawo ang nagdugok sa iya. Ang pila sa ila amo ang mga tawo nga ginsudlan sang mga demonyo. Naghapa sila sa atubangan ni Jesus kag nagasinggit: “Ikaw ang Anak sang Dios.” Ngaa ginsugid sang mga demonyo ang kamatuoran parte kay Jesus? Posible nga gusto nila nga magpati sa ila ang mga tawo kag ipalayo sila kay Jehova. Matuod ang ginsiling sang mga demonyo, pero indi maayo ang ila motibo. Kabalo gid sa sini si Jesus, kag wala sia nalipay sa ila ginhimo. Ginsugo pa gani niya ang mga demonyo nga indi magpanaksi parte sa iya.

⁸ Ano ang aton matun-an sa sini? Importante kay Jehova kon ano ang aton motibo sa paghambal sang kamatuoran. Gani importante gid nga ang aton motibo sa pagtudlo sang kamatuoran sa iban amo nga palangga naton si Jehova, kag dapat ihatag naton ang kadayawan sa iya indi sa aton kaugalingon.—Mat. 5:16; ipaanggid ang Binuhatan 14:12-15.

9. Ano ang dapat naton likawan nga himuon, kag ngaa?

⁹ Binagbinaga ang isa pa ka sitwasyon nga dapat naton likawan para indi kita ang dayawon. Ibutang ta nga ginsugid sa imo sang isa ka brother nga may pribilehiyo ang parte sa kompidensial nga butang, kag ginsugid mo ini sa iban. Kon sa ulihi napamatud-an sang imo ginsugiran nga matuod gid man ang imo ginhambal, posible nga maghunahuna sila nga ginsaligan ka sang kompidensial nga mga butang. Posible pa gani nga magdayaw sila sa imo, pero wala gid nalipay si Jehova sa sini. (Hulu. 11:13) Ngaa? Kay magluwas nga ginsugid naton ang kompidensial nga butang, indi man insakto ang aton motibo sa pagsugid sini.

PAANO NATON DAPAT ISUGID ANG KAMATUORAN?

10. Ano ang buot silingon sang paghambal sing “mainayuhon”? (Colosas 4:6)

¹⁰ Basaha ang Colosas 4:6. Ginpahanumdom ni apostol Pablo ang mga Cristiano sa Colosas nga dapat ‘maghambal sila pirme sing mainayuhon.’ Ano ang buot niya silingon? Ang Griego nga tinaga nga gingamit diri nagapahangop nga dapat ang aton ginahambal makabulig sa iban kag indi makasakit sa ila balatyagon.

11-12. Ngaa dapat mainayuhon kita sa pagtudlo sang kamatuoran? Maghatag sing halimbawa. (Tan-awa man ang mga piktyur.)

¹¹ Dapat naton sundon ang laygay ni Pablo nga mangin mainayuhon kon nagatudlo kita sang kamatuoran sa iban. Ginpaanggid ang Biblia sa matalom nga espada nga makapahamulag sang kalag kag espiritu. Buot silingon, paagi sa Biblia, mahibaluan gid naton kon ano ang aton matuod nga ginabatyag kag mga motibo. (Heb. 4:12) Pero kon indi insakto ang aton paggamit sang Biblia, posible nga maakig ang aton kaistorya kag makigbais sia sa aton. Paano ina posible nga matabo?

¹² Halimbawa sa aton pagministeryo, may nakilala kita nga tawo nga pirme gid nagapangamuyo sa mga santos kag nanamian gid sia magselebrar sang Christmas kag Easter upod sa iya pamilya. Puede naton gamiton ang Biblia para ipaathag sa iya nga wala sing pulos ang pagpangamuyo sa mga imahen kag pagano nga selebrasyon ang Christmas kag Easter. (Isa. 44:14-20; 2 Cor. 6:14-17) Kon amo ini ang aton ihambal sa una pa lang naton nga pag-istorya sa iya, masugid naton sa iya ang kamatuoran pero indi epektibo ang aton paggamit sang Pulong sang Dios.

13. Paano naton matimplahan sing asin ang aton ginahambal?

¹³ Nagsiling man si Pablo nga dapat ang aton mga ginahambal daw natimplahan sing asin. Indi buot silingon sini nga para mamati ang mga tawo, patikuon naton ang kamatuoran ukon taguon ini. Sa baylo, ginapalig-on kita sini nga ang aton mga ginahambal dapat “natimplahan” para masugid naton ang kamatuoran sa paagi nga makapainteres sa aton ginasugiran. (Job 12:11) Mahimo mabudlay ini himuon. Kon parte sa literal nga pagkaon, posible nga ginahunahuna naton nga kon nanamitan kita sang timpla sang pagkaon, manamitan man sa sini ang iban. Sing kaanggid, posible nga ginahunahuna naton nga manamian ang tanan sa aton paagi sang pagpakig-istorya. Pero indi ina posible. Halimbawa, may pila ka kultura nga puede sila mangin prangka sa pagpakig-istorya sa iban bisan pa sa mga mas magulang sa ila. Pero sa iban nga kultura, indi ini maayo nga batasan. Nagsiling si Pablo nga dapat kabalo kita “kon paano sabton ang kada isa.” Buot silingon, dapat timplahon naton ang aton ihambal indi suno sa aton panabor ukon nagustuhan, kundi suno sa kon ano ang makapainteres sa aton kaistorya.

SAN-O NATON DAPAT ISUGID ANG KAMATUORAN?

14. Sang ari si Jesus sa duta, gintudlo bala niya sa iya mga disipulo ang tanan niya nga nahibaluan? Ipaathag.

¹⁴ Mainayuhon gid si Jesus sa iya pagpakig-istorya kag pagtudlo sa iya mga disipulo. (Mar. 6:34) Pero madamo pa sila sing dapat matun-an. Wala gintudlo ni Jesus sa ila ang tanan niya nga nahibaluan kay kabalo sia sang ila limitasyon. Kabalo sia nga indi pa sadto ang insakto nga tion para isugid sa ila ang pila ka kamatuoran. Ang matuod, nagsiling sia nga indi pa nila ini mahangpan sadto nga tion. (Juan 16:12) Ano ang matun-an naton sa sini?

15. Dapat bala dayon naton itudlo sa aton Bible study ang tanan naton nga nahibaluan? Ipaathag. (Hulubaton 25:11) (Tan-awa man ang piktyur.)

¹⁵ Matun-an naton sa halimbawa ni Jesus nga bisan pa kabalo kita sang kamatuoran, indi buot silingon sini nga itudlo dayon naton ang tanan naton nga nahibaluan sa aton maistorya. Paano naton mailog ang halimbawa ni Jesus? Dapat naton hunahunaon ang sitwasyon sang aton kaistorya. Hunahunaa liwat ang tawo nga nanamian magselebrar sang Christmas kag Easter upod sa iya pamilya. Kabalo kita nga pagano ini nga mga selebrasyon kag wala nalipay sa sini si Jehova. Pero ibutang ta nga nagpa-Bible study ini nga tawo mga isa ukon duha ka semana antes sang Christmas. Kon ipakita dayon naton sa iya nga ginapakamalaut sang Biblia ang pagano nga mga selebrasyon para untatan niya ang pagselebrar sang Christmas, mangin mainayuhon ayhan ang aton paagi sang paghambal? Matuod nga may pila ka Bible study nga nagaaplikar dayon sang ila natun-an sa Biblia. Pero may iban naman nga nagakinahanglan sang tion para maghimo sing mga pagbag-o. Mabuligan naton ang aton mga Bible study nga mag-uswag kon isugid naton sa ila ang mga dapat nila mahibaluan sa insakto nga tion, ukon sa tion nga mahangpan na nila ini.—Basaha ang Hulubaton 25:11.

16. Paano naton mabuligan ang aton Bible study nga ‘padayon nga maglakat sa kamatuoran’?

¹⁶ Nalipay gid kita kon ginabuligan naton ang iban nga matun-an ang kamatuoran parte kay Jehova. Mabuligan naton sila nga ‘padayon nga maglakat sa kamatuoran’ kon himuon naton ang masunod: Mangin maayo nga halimbawa sa ila. (3 Juan 3, 4) Dapat makita sa imo pagkabuhi nga nagapati ka sa mga promisa sang Dios nga mabasa sa Biblia. Dapat husto ang imo motibo sa pagsugid sang kamatuoran. Maghambal sing mainayuhon, kag isugid ang kamatuoran sa husto nga tion. Kag ihatag ang tanan nga kadayawan kay Jehova. Kon himuon mo ini, mapakita mo nga ginaalagad mo si Jehova, ang Dios sang kamatuoran.