Kon Paano Ginailog sang Kongregasyon ang Pagtamod ni Jehova sa mga Makasasala

1. Ano ang gusto ni Jehova para sa tanan nga tawo?

SANG gintuga ni Jehova ang mga tawo, ginhatagan niya sila sang kahilwayan sa pagdesisyon. Ginagamit naton ini nga regalo adlaw-adlaw kon nagahimo kita sang mga desisyon. Ang pinakaimportante nga desisyon nga puede himuon sang isa ka tawo amo ang pagdedikar sang iya kaugalingon kay Jehova kag mangin bahin sang Iya pamilya. Gusto ni Jehova nga himuon ini sang tanan nga tawo. Ngaa? Bangod palangga niya ang mga tawo kag gusto niya ang pinakamaayo para sa ila. Gusto niya nga mangin abyan nila sia kag magkabuhi sila sing wala sing katapusan.​—Deut. 30:​19, 20; Gal. 6:​7, 8.

2. Ano ang gusto ni Jehova nga himuon sang mga nagahimo sang serioso nga sala nga wala nagahinulsol? (1 Juan 2:1)

² Pero, wala kita ginapilit ni Jehova nga mag-alagad sa iya. Gusto niya nga ang kada isa amo ang magdesisyon kon ano ang gusto niya nga himuon. Ti, ano abi kon makahimo sang serioso nga sala ang isa ka bawtismado nga utod? Kon indi sia maghinulsol, dapat sia sikwayon sa kongregasyon. (1 Cor. 5:13) Pero bisan pa amo sini ang matabo, gusto gid ni Jehova nga maghinulsol ang ginsikway kag magbalik sa Iya. Ang matuod, gusto gid ni Jehova nga patawaron ang mga nagahinulsol sa ila mga sala, kag amo ini ang isa ka importante nga rason kon ngaa gin-aman ni Jehova ang gawad. (Basaha ang 1 Juan 2:1.) Mahigugmaon gid ang aton Dios kay gusto niya nga maghinulsol ang mga nakahimo sang serioso nga sala.​—Zac. 1:3; Roma 2:4; Sant. 4:8.

3. Ano ang binagbinagon naton sa sini nga artikulo?

³ Gusto ni Jehova nga ilugon naton ang iya pagtamod sa sala kag sa mga nakahimo sang serioso nga sala. Binagbinagon naton sa sini nga artikulo kon paano naton ini mahimo. Binagbinagon naton (1) kon paano gin-asikaso ang kaso sang isa ka utod nga nakahimo sang serioso nga sala sa Corinto sang unang siglo, (2) kon ano ang ginsiling ni Pablo sa kongregasyon sang naghinulsol ang tawo nga nakahimo sang serioso nga sala, kag (3) kon ano ang pagtamod ni Jehova sa mga utod nga nakahimo sang serioso nga sala.

KON PAANO GIN-ASIKASO ANG KASO SANG ISA KA UTOD SANG UNANG SIGLO

4. Ano ang nangin problema sang kongregasyon sa Corinto sang unang siglo? (1 Corinto 5:​1, 2)

⁴ Basaha ang 1 Corinto 5:​1, 2. Sang ikatlo nga paglakbay ni Pablo bilang misyonero, daw indi sia makapati sa iya nabalitaan parte sa bag-o nga kongregasyon sa Corinto. May isa ka utod sa kongregasyon nga may imoral nga relasyon sa asawa sang iya amay. “Sobra pa sa ginahimo sang mga pungsod” ini nga buhat. Magluwas nga ginakunsinti sang kongregasyon ang ginahimo sang utod, daw ginapabugal pa nila ini. Posible nahunahuna sang pila ka kauturan sadto nga ginailog nila si Jehova kay naluoy sila sa utod kag ginaintiende nila sia. Pero wala ginakunsinti ni Jehova ang iya katawhan nga nagahimo sang sala. Bangod sa sining makahuluya nga ginahimo sang utod, sigurado gid nga naguba ang reputasyon sang kongregasyon. Kag posible nga nahunahuna sang iban nga kauturan nga ilugon man sia. Gani, ano ang ginsiling ni Pablo nga dapat himuon sang kongregasyon?

5. Ano ang ginsiling ni Pablo nga dapat himuon sang kongregasyon? (1 Corinto 5:13) (Tan-awa man ang piktyur.)

⁵ Basaha ang 1 Corinto 5:13. Gintuytuyan ni Jehova si Pablo nga sulatan ang mga taga-Corinto para silingan sila nga dapat sikwayon sa kongregasyon ang tawo nga nakahimo sang serioso nga sala nga wala naghinulsol. Paano dapat trataron sang matutom nga mga Cristiano ini nga tawo? Ginsilingan sila ni Pablo nga “untatan [nila] ang pagpakig-upod” sa iya. Ginpaathag ni Pablo nga nalakip sa sini ang ‘indi pagpakig-upod sa iya bisan sa pagkaon.’ (1 Cor. 5:11) Ngaa pati sa pagkaon? Bangod ang pagpakig-upod sa isa ka tawo sa pagkaon magaresulta sa mas madamo pa gid nga pagpakig-upod sa iya. Ano ang benepisyo kon untatan nila ang pagpakig-upod sa iya? Maproteksionan ang kongregasyon sa iya malain nga impluwensia. (1 Cor. 5:​5-7) Makabulig man ini para marealisar sini nga tawo nga grabe kalain sang iya sala, makabatyag sia sang kahuya, kag maghinulsol sia.

6. Ano ang reaksion sang kongregasyon sa sulat ni Pablo, kag ano ang ginhimo sang tawo nga nakahimo sang serioso nga sala?

⁶ Sang napadala na ni Pablo sa mga taga-Corinto ang iya sulat, nagpalibog sia kon ano ang mangin reaksion nila sa sini. Sang ulihi, nalipay gid si Pablo sa ginbalita sa iya ni Tito. Ginsunod sang kongregasyon ang instruksion ni Pablo kag ginsikway nila ang tawo nga nakahimo sang serioso nga sala. (2 Cor. 7:​6, 7) Kag pagligad sang pila ka bulan pagkatapos napadala ni Pablo ang iya sulat, naghinulsol ini nga tawo. Gin-untatan niya ang iya ginahimo nga malain, ginbag-o niya ang iya panimuot, kag ginsunod niya ang matarong nga mga kasuguan ni Jehova. (2 Cor. 7:​8-11) Bangod sini, ano naman ang ginsiling ni Pablo nga dapat himuon sang kongregasyon?

KON PAANO NILA DAPAT TRATARON ANG TAWO NGA NAGHINULSOL

7. Sang ginsikway sa kongregasyon ang tawo nga nakahimo sang serioso nga sala, ano ang maayo nga resulta sini? (2 Corinto 2:​5-8)

⁷ Basaha ang 2 Corinto 2:​5-8. Nagsiling si Pablo nga ‘ang pagsabdong nga nabaton sang tawo halin sa kalabanan sa ila tuman na para sa iya.’ Ginapahangop sini nga bangod gindisiplina ang tawo, napalig-on sia nga maghinulsol. Kag bangod naghinulsol na sia, indi na kinahanglan nga padayon pa sia nga disiplinahon.​—Heb. 12:11.

8. Ano naman ang ginsiling ni Pablo nga dapat himuon sang kongregasyon?

⁸ Bangod naghinulsol ang tawo, ginsilingan ni Pablo ang kongregasyon: “Patawara ninyo sia kag palig-una” kag “ipakita ninyo nga ginahigugma ninyo sia.” Talupangda nga magluwas nga gusto ni Pablo nga batunon sang kongregasyon ang tawo, may dapat pa gid sila himuon. Gusto ni Pablo nga ipakita nila paagi sa ila ginasiling kag ginahimo nga tuodtuod gid ang pagpatawad nila sa tawo kag palangga nila sia. Paagi sa sini, mapabatyag nila sa iya nga nalipay gid sila nga nagbalik sia sa kongregasyon.

9. Ngaa posible nabudlayan ang iban nga patawaron ang mahinulsulon nga tawo?

⁹ May mga kauturan bala sa Corinto nga posible wala nalipay sa pagbalik sang mahinulsulon nga tawo? Posible nga may ara. Ngaa masiling naton ini? Kay man, posible may mga kauturan nga akig gihapon sa iya bangod nagresulta sa problema sa kongregasyon ang iya ginhimo. Kag posible may mga kauturan nga personal nga naapektuhan sa iya ginhimo nga sala. Ginpanikasugan gid sang mga kauturan nga tumanon ang mga kasuguan ni Jehova. Gani, posible may pila sa ila nga nagbatyag nga indi husto nga batunon liwat sa kongregasyon ang nakahimo sang serioso nga sala. (Ipaanggid ang Lucas 15:​28-30.) Pero, ngaa importante nga ipakita sang mga kauturan nga palangga nila ang ila utod nga naghinulsol?

10-11. Ano ang posible matabo kon indi pagpatawaron sang mga gulang ang mahinulsulon nga tawo?

¹⁰ Ano ayhan ang posible nabatyagan sang mahinulsulon nga tawo kon wala nagsugot ang mga gulang nga pabalikon sia sa kongregasyon? Ukon ano ayhan ang nabatyagan niya kon wala ginpakita sang mga kauturan nga palangga nila sia bisan pa nakapanumbalik na sia? Posible nga makabatyag sia sang “tuman nga kasubo.” Posible nga mapensaran niya nga wala na sia sang paglaum. Kag posible hunahunaon niya nga indi gid sia mapatawad ni Jehova gani wala sing rason nga maghimo pa sia sang mga pagbag-o.

¹¹ Ang mas malain pa, posible maguba ang kaangtanan sang mga kauturan kay Jehova kon indi nila pagpatawaron ang mahinulsulon nga tawo. Ngaa masiling naton ini? Kay man, kon indi sila magpatawad, wala nila ginailog si Jehova nga handa magpatawad sa mahinulsulon nga mga makasasala. Sa baylo, ginailog nila si Satanas nga mapintas kag wala sing kaluoy. Gani, daw pareho lang nga nagpagamit sila sa Yawa para pauntaton ang isa ka tawo sa pag-alagad kay Jehova.​—2 Cor. 2:​10, 11; Efe. 4:27.

12. Paano mailog sang kongregasyon si Jehova?

¹² Ano ang dapat himuon sang kongregasyon sa Corinto para mailog nila si Jehova kag indi nila mailog si Satanas? Dapat nila patawaron ang mahinulsulon nga mga makasasala pareho sa ginahimo ni Jehova. Talupangda ang ginsiling sang pila ka manunulat sang Biblia parte kay Jehova. Halimbawa, si David nagsiling: “Maayo [sia] kag handa sa pagpatawad.” (Sal. 86:5) Si Miqueas nagsiling: “Sin-o nga Dios ang kaangay sa imo, nga nagapatawad sang sala kag nagapasaylo sang paglapas.” (Miq. 7:18) Kag si Isaias nagsiling: “Magbiya ang malauton sa iya dalanon kag bag-uhon niya ang iya panghunahuna; magbalik sia kay Jehova, nga magakaluoy sa iya, sa aton Dios nga nagapatawad sing bugana.”​—Isa. 55:7.

13. Ngaa husto nga batunon liwat sa kongregasyon ang mahinulsulon nga makasasala? (Tan-awa ang kahon nga “San-o Nakapanumbalik ang Tawo sa Kongregasyon sa Corinto?”)

¹³ Para mailog sang kongregasyon sa Corinto si Jehova, dapat nila ipakita sa mahinulsulon nga tawo nga palangga nila sia kag nalipay sila nga nakapanumbalik sia. Nagsiling si Pablo nga kon patawaron nila ang mahinulsulon nga tawo, mapakita nila nga “matinumanon [sila] sa tanan nga butang.” (2 Cor. 2:9) Bisan pa mga pila pa lang ka bulan nga ginsikway sia sa kongregasyon, naghinulsol sia bangod sa pagdisiplina sa iya. Gani, wala sing rason nga padugayan pa sang mga gulang ang pagpanumbalik niya sa kongregasyon.

KON PAANO NATON MAILOG ANG KATARUNGAN KAG KALUOY NI JEHOVA

14-15. Ano ang matun-an naton sa natabo sa Corinto? (2 Pedro 3:9) (Tan-awa man ang piktyur.)

¹⁴ Ginlakip sa Biblia kon paano gin-asikaso ang kaso sadto sa Corinto kay ‘makatudlo ini sa aton.’ (Roma 15:4) Matun-an naton sa sini nga wala ginakunsinti ni Jehova ang iya katawhan nga nagahimo sang serioso nga sala. Posible ginahunahuna sang iban nga bangod maluluy-on si Jehova, tugutan niya nga magpabilin sa kongregasyon ang nagahimo sang sala nga wala nagahinulsol. Pero, indi amo sina ang paagi ni Jehova sa pagpakita sang kaluoy. Maluluy-on si Jehova, pero wala ini nagapahangop nga ginapabay-an lang niya ang mga tawo sa gusto nila himuon. Kag wala man niya ginabag-o ang iya mga kasuguan parte sa husto kag sala. (Jud. 4) Kon tugutan ni Jehova nga magpabilin sa kongregasyon ang nagahimo sang sala nga wala nagahinulsol, wala sia nagapakita sang kaluoy kay posible mahalitan ang kongregasyon.​—Hulu. 13:20; 1 Cor. 15:33.

¹⁵ Pero, natun-an man naton nga indi gusto ni Jehova nga malaglag ang bisan sin-o. Gusto gid niya nga luwason ang mga tawo. Ginapakitaan niya sang kaluoy ang mga tawo nga nagahimo sang mga pagbag-o para mangin maayo liwat ang ila kaangtanan sa iya. (Ezeq. 33:11; basaha ang 2 Pedro 3:9.) Gani, sang naghinulsol ang tawo sa Corinto kag gin-untatan niya ang iya ginahimo nga malain, gingamit ni Jehova si Pablo para ipaathag sa kongregasyon nga dapat nila patawaron ang tawo kag dapat nila sia batunon liwat.

16. Ano ang masiling mo parte kay Jehova pagkatapos naton mabinagbinag ang natabo sa Corinto?

¹⁶ Ginabuligan kita sang natabo sa Corinto nga makita ang gugma, pagkamatarong, kag katarungan ni Jehova. (Sal. 33:5) Bangod sini, gusto gid naton nga dayawon ang aton Dios. Makasasala kita tanan kag kinahanglan naton ang pagpatawad ni Jehova, gani nagapasalamat gid kita kay maluluy-on sia. Nagapasalamat man kita sa iya kay gin-aman niya ang gawad para mapatawad niya ang aton mga sala. Makapaumpaw gid mabal-an nga palangga gid ni Jehova ang iya katawhan kag gusto niya ang pinakamaayo para sa ila.

17. Ano ang binagbinagon naton sa masunod nga mga artikulo?

¹⁷ Paano naman ginaasikaso ang mga kaso sa kongregasyon subong? Paano mailog sang mga gulang ang gugma ni Jehova para buligan ang nakahimo sang serioso nga sala nga maghinulsol? Kag ano dapat ang reaksion sang mga kauturan kon magdesisyon ang mga gulang nga sikwayon ukon ipanumbalik ang isa ka tawo sa kongregasyon? Binagbinagon sa masunod nga mga artikulo ini nga mga pamangkot.