Kon Paano Ginabuligan ang mga Ginsikway sa Kongregasyon

1-2. (a) Ano ang pagtan-aw ni Jehova sa mga hungod nga nagahimo sang serioso nga sala nga wala nagahinulsol? (b) Ano ang gusto ni Jehova nga himuon sang mga nagahimo sang serioso nga sala?

WALA nagsiling si Jehova nga makapagusto lang kita kon ano ang gusto naton nga himuon. Kay man, wala niya ginakunsinti ang sala. (Sal. 5:​4-6) Gusto niya nga tumanon naton ang iya matarong nga mga kasuguan nga makita sa iya Pulong. Siempre, kabalo si Jehova nga indi kita perpekto kag indi naton matuman sing perpekto ang iya mga kasuguan. (Sal. 130:​3, 4) Pero, wala niya ginakunsinti ang ‘indi diosnon nga mga tawo nga ginahimo ang iya wala tupong nga kaayo nga balibad sa matampalason nga paggawi.’ (Jud. 4) Ginsambit pa gani sa Biblia ang parte sa “paglaglag sa mga indi diosnon” sa inaway sang Dios sa Armageddon.​—2 Ped. 3:7; Bug. 16:16.

² Pero, indi luyag ni Jehova nga malaglag ang bisan sin-o. Natun-an naton sa iban pa nga mga artikulo nga maathag nga ginasiling sang Biblia nga “luyag niya nga ang tanan mahatagan sang kahigayunan nga maghinulsol.” (2 Ped. 3:9) Ginailog sang mga gulang si Jehova. Gani, mapinasensiahon nila nga ginabuligan ang nakasala nga maghinulsol kag mangin suod liwat kay Jehova. Pero, may mga tion nga wala nagahinulsol ang nakasala. (Isa. 6:9) May pila nga indi gusto mag-untat sa ila ginahimo nga sala bisan pa sulitsulit sila nga ginabuligan sang mga gulang nga maghinulsol. Kon amo sini ang sitwasyon, ano ang dapat himuon sang mga gulang?

“SIKWAYA ANG MALAUT NGA TAWO”

3. (a) Ano ang ginasiling sang Biblia nga dapat himuon sa nakasala nga wala nagahinulsol? (b) Kon indi maghinulsol ang nakasala, ngaa masiling naton nga daw pareho lang nga gusto niya nga sikwayon sia sa kongregasyon?

³ Kon indi maghinulsol ang nakasala, dapat sundon sang mga gulang ang instruksion sa 1 Corinto 5:13: “Sikwaya ang malaut nga tawo sa tunga ninyo.” Gani, kon indi maghinulsol ang nakasala, kabalo sia nga sikwayon sia. Kabalo sia nga anihon niya ang iya ginsab-ug. (Gal. 6:7) Ngaa masiling naton nga daw pareho lang nga gusto niya nga sikwayon sia sa kongregasyon? Bangod indi niya gusto magbag-o bisan pa madamo nga beses na sia nga ginbuligan sang mga gulang nga maghinulsol. (2 Hari 17:​12-15) Ginapakita niya paagi sa iya mga ginahimo nga indi niya gusto tumanon ang mga kasuguan ni Jehova.​—Deut. 30:​19, 20.

4. Kon ginsikway sa kongregasyon ang nakasala nga wala nagahinulsol, ngaa ginapahibalo ini sa kongregasyon?

⁴ Kon ginsikway sa kongregasyon ang nakasala nga wala nagahinulsol, ginapahibalo sa kongregasyon nga indi na sia isa ka Saksi ni Jehova.a Ginahimo ini nga pahibalo indi para pakahuy-an ang nakasala, kundi para matuman sang mga kauturan ang sugo sang Biblia nga ‘untatan ang pagpakig-upod’ sa iya “bisan sa pagkaon.” (1 Cor. 5:​9-11) May maayo nga mga rason kon ngaa ginsugo ini ni Jehova. Si apostol Pablo nagsulat: “Ang diutay nga lebadura nagapakumbo sa bug-os nga linamas.” (1 Cor. 5:6) Kon indi pagsikwayon sa kongregasyon ang nakasala nga wala nagahinulsol, posible hunahunaon sang iban nga puede man gali nga indi nila pagtumanon ang matarong nga mga kasuguan ni Jehova.​—Hulu. 13:20; 1 Cor. 15:33.

5. Kon ginsikway sa kongregasyon ang isa ka utod, paano naton sia dapat tamdon, kag ngaa?

⁵ Kon ginsikway sa kongregasyon ang isa ka utod, paano naton sia dapat tamdon? Bisan pa indi kita dapat magpakig-upod sa iya, indi naton dapat paghunahunaon nga wala na sia sang paglaum. Sa baylo, dapat naton sia tamdon nga daw pareho sa isa ka nadula nga karnero. Kon nagtalang ang isa ka karnero, puede pa sia makabalik sa panong. Tandaan naton nga gindedikar sining nadula nga karnero ang iya kaugalingon kay Jehova. Makapasubo lang kay wala niya gintuman ang iya promisa nga magapabilin sia nga matutom kay Jehova. Bangod sini, may posibilidad nga indi niya mabaton ang kabuhi nga wala sing katapusan. (Ezeq. 18:31) Pero, samtang may tion pa kag nagapakita pa si Jehova sang kaluoy, may paglaum pa sia nga magbalik kay Jehova. Ti, paano ginapakita sang mga gulang sa ginsikway sa kongregasyon nga may paglaum pa sia?

KON PAANO GINABULIGAN SANG MGA GULANG ANG MGA GINSIKWAY

6. Ano ang himuon sang mga gulang para buligan ang ginsikway sa kongregasyon?

⁶ Kon ginsikway sa kongregasyon ang isa ka indibiduwal, bahala na bala sia nga magpanikasog nga makabalik kay Jehova? Indi amo sina ang matabo. Sa tion nga silingan sang komite sang mga gulang ang nakasala nga sikwayon sia sa kongregasyon, ipaathag man nila sa iya kon ano ang dapat niya himuon para makabalik sia. Pero may himuon pa gid ang mga gulang. Sa kalabanan nga sitwasyon, silingan nila ang ginsikway nga istoryahon nila sia liwat pagligad sang pila ka bulan para hibaluon kon nagbag-o na ang iya panimuot. Pagligad sang pila ka bulan, kon nagsugot ang ginsikway nga istoryahon sia liwat, palig-unon sia sang mga gulang nga maghinulsol kag magbalik. Kon wala niya gihapon ginbag-o ang iya panimuot, silingan sia sang mga gulang nga istoryahon naman nila sia liwat pagligad sang pila ka bulan.

7. Kon ginsikway sa kongregasyon ang isa ka indibiduwal, paano mailog sang mga gulang ang kaluoy ni Jehova? (Jeremias 3:12)

⁷ Kon ginsikway sa kongregasyon ang isa ka indibiduwal, ginapanikasugan sang mga gulang nga ilugon ang kaluoy ni Jehova sa iya. Halimbawa, wala ginhulat ni Jehova nga maghinulsol anay ang iya rebelyuso nga katawhan nga mga Israelinhon antes niya sila ginbuligan. Sa baylo, ginpadala niya ang iya mga manalagna bisan pa wala sila sing may ginhimo nga pagbag-o. Ginbinagbinag sa ikaduha nga artikulo kon paano ginpakita ni Jehova nga maluluy-on gid sia. Halimbawa, ginsilingan ni Jehova si manalagna Oseas nga patawaron niya ang iya asawa kag kuhaon niya sia liwat bisan pa padayon sia nga nagahimo sang serioso nga sala. (Os. 3:1; Mal. 3:7) Bilang pag-ilog kay Jehova, gusto gid sang mga gulang nga makabalik sa kongregasyon ang nakasala, kag wala nila ginapabatyag sa iya nga mabudlay ini himuon.​—Basaha ang Jeremias 3:12.

8. Paano kita ginabuligan sang ilustrasyon ni Jesus parte sa rebelyuso nga anak nga mas mahangpan sing maayo ang kaluoy ni Jehova? (Lucas 15:7)

⁸ Sa ikaduha nga artikulo, ginbinagbinag ang ilustrasyon ni Jesus parte sa rebelyuso nga anak. Dumduma kon ano ang reaksion sang amay sang nagpauli ang iya anak kag nakita niya sia. “Nagdalagan sia kag ginhakos ang iya anak kag mapinalanggaon nga ginhalukan.” (Luc. 15:20) Talupangda nga wala ginhulat sang amay nga mangabay anay ang iya anak nga patawaron sia. Sa baylo, nagdalagan sia pakadto sa iya anak bangod palangga niya sia. Amo gid sina ang ginabatyag ni Jehova sa mga nagbiya sa iya. Ginapanikasugan gid sang mga gulang nga ilugon si Jehova. Gusto nila nga magbalik kay Jehova ang mga nagbiya sa iya. (Luc. 15:​22-24, 32) Kon magbalik ang nakasala, nalipay gid si Jehova, si Jesus, ang mga anghel, kag ang bilog nga kongregasyon.​—Basaha ang Lucas 15:7.

9. Ano ang ginpalig-on ni Jehova nga himuon sang mga nakahimo sang serioso nga sala?

⁹ Nabinagbinag na naton nga wala ginakunsinti ni Jehova ang mga nakasala nga wala nagahinulsol. Pero, padayon niya gihapon sila nga ginabuligan. Kag gusto niya nga magbalik sila sa iya. Kon maghinulsol sila, amo ini ang ginasiling sang Oseas 14:4 nga ginabatyag ni Jehova parte sa ila: “Ayuhon ko ang ila pagkadimatutom. Higugmaon ko sila sing kinabubut-on, kay nadula ang akon kaakig.” Bangod kabalo ang mga gulang sang ginabatyag ni Jehova, ginapanikasugan nila nga makita ang bisan gamay lang nga pagbag-o nga ginahimo sang nakasala. Makapalig-on man ini sa mga nagbiya kay Jehova nga magbalik dayon sa iya kay palangga gid niya sila.

10-11. Paano buligan sang mga gulang ang mga madugay na nga ginsikway sa kongregasyon?

¹⁰ May pila ka indibiduwal nga ginsikway sa kongregasyon madamo nga tinuig na ang nagligad. Paano naman sila buligan sang mga gulang? Ginsikway sila sa kongregasyon bangod may ginhimo sila nga sala. Pero, posible nga gin-untatan na nila ang paghimo sa sini nga sala. Sa pila ka sitwasyon, posible nga indi na gani nila madumduman kon ngaa ginsikway sila. Bisan ano na kadugay sila nga ginsikway sa kongregasyon, panikasugan sang mga gulang nga pangitaon sila kag bisitahan. Sa tion sang pagbisita sang mga gulang sa isa nga ginsikway, magapangamuyo sila upod sa iya kag palig-unon nila sia nga magbalik sa kongregasyon. Kon madamo nga tinuig na sia nga napahilayo sa kongregasyon, sigurado gid nga maluya na sia katama sa espirituwal. Gani, kon magsiling sia nga gusto niya magbalik sa kongregasyon, puede makadesisyon ang mga gulang nga i-Bible study sia bisan wala pa sia nakapanumbalik. Sa tanan nga sitwasyon, ang mga gulang ang dapat magpili sang utod nga maga-Bible study sa iya.

¹¹ Bilang pag-ilog sa kaluoy ni Jehova, ginapanikasugan gid sang mga gulang nga pangitaon ang tanan nga nagbiya sa iya para palig-unon sila nga magbalik sa iya. Kon maghinulsol ang nakasala kag gin-untatan na niya ang ginahimo niya nga malain, puede na sia dayon i-reinstate.​—2 Cor. 2:​6-8.

12. (a) Sa ano nga mga sitwasyon kinahanglan maghalong gid ang mga gulang? (b) Ngaa indi naton dapat paghunahunaon nga indi pagpakitaan ni Jehova sang kaluoy ang pila ka indibiduwal bangod sa klase sang sala nga ila nahimo? (Tan-awa man ang footnote.)

¹² May mga sitwasyon nga kinahanglan maghalong gid ang mga gulang antes nila i-reinstate ang isa ka indibiduwal. Halimbawa, kon pag-abuso sa bata ukon apostasya ang iya sala, dapat siguraduhon sang mga gulang nga sinsero ang iya paghinulsol. Dapat man ini himuon sang mga gulang kon ginplano niya nga tapuson ang iya pag-asawahay, posible paagi sa pagpakighilahi. (Mal. 2:14; 2 Tim. 3:6) Kay man, dapat nila proteksionan ang mga kauturan sa kongregasyon. Pero, dapat naton mahangpan nga batunon ni Jehova ang bisan sin-o nga sinsero nga nagahinulsol kag nag-untat na sa iya ginahimo nga malain. Gani, bisan pa dapat siguraduhon sang mga gulang nga sinsero ang paghinulsol sang isa ka indibiduwal nga hungod nga nagsakit kag nagluib sa iban, indi nila dapat paghunahunaon nga indi sia pagpakitaan ni Jehova sang kaluoy bangod sa klase sang sala nga iya nahimo.b—1 Ped. 2:10.

KON ANO ANG PUEDE HIMUON SANG MGA KAUTURAN

13. Ano ang kinalain sang aton pagtratar sa isa ka utod nga ginsabdong sang mga gulang kag sa aton pagtratar sa isa ka indibiduwal nga ginsikway sa kongregasyon?

¹³ Ginbinagbinag sa nagligad nga artikulo nga may mga tion nga ginapahibalo sa kongregasyon nga ginsabdong ang isa ka utod. Sa sini nga sitwasyon, padayon kita nga makapakig-upod sa iya bangod naghinulsol sia kag gin-untatan na niya ang iya ginahimo nga malain. (1 Tim. 5:20) Bahin gihapon sia sang kongregasyon, kag kinahanglan niya ang pagpalig-on sang iya mga kauturan para padayon niya nga mahimo ang husto. (Heb. 10:​24, 25) Pero, lain ang aton pagtratar sa isa ka indibiduwal nga ginsikway sa kongregasyon. ‘Ginauntatan naton ang pagpakig-upod sa iya,’ kag ‘indi kita magpakig-upod sa iya bisan sa pagkaon.’—1 Cor. 5:11.

14. Kon parte sa mga ginsikway sa kongregasyon, ano nga desisyon ang puede himuon sang kada Cristiano base sa iya konsiensia nga ginagiyahan sang mga prinsipio sa Biblia? (Tan-awa man ang piktyur.)

¹⁴ Ginapahangop bala sang aton nabinagbinag nga indi gid naton dapat pagtamyawon sa tanan nga tion ang isa ka indibiduwal nga ginsikway sa kongregasyon? Indi amo sina ang ginapahangop sini. Siempre, indi kita magpakig-upod sa iya. Pero kon ginahunahuna naton kon bala agdahon naton nga mag-attend sa miting ang isa ka indibiduwal nga ginsikway sa kongregasyon, nga posible paryente naton ukon suod naton nga abyan sang una, dapat magdesisyon ang kada Cristiano kon ano ang iya himuon sa sini nga sitwasyon base sa iya konsiensia nga ginagiyahan sang mga prinsipio sa Biblia. Ano ang himuon naton kon mag-attend sia? Sang una, indi gid naton sia pagtamyawon. Pero sa liwat, dapat magdesisyon ang kada Cristiano kon ano ang iya himuon sa sini nga sitwasyon base sa iya konsiensia nga ginagiyahan sang mga prinsipio sa Biblia. Posible magdesisyon ang iban nga tamyawon sia ukon abiabihon sa miting. Pero, indi kita dapat mag-istorya sa iya sing malawig ukon magpakig-upod sa iya.

15. Sin-o ang ginapatuhuyan sa 2 Juan 9-11? (Tan-awa man ang kahon nga “Pareho Bala nga Klase sang Sala ang Ginpatuhuyan ni Juan kag ni Pablo?”)

¹⁵ Posible magpalibog ang iban, ‘Indi bala nga nagsiling ang Biblia nga kon tamyawon naton ang isa ka indibiduwal nga ginsikway sa kongregasyon, nagapakig-ambit kita sa iya malaut nga mga buhat?’ (Basaha ang 2 Juan 9-11.) Pero, ginapakita sang konteksto sang 2 Juan 9-11 nga nagapatuhoy ini sa mga apostata kag sa mga indibiduwal nga nagaimpluwensia sa iban nga maghimo sing malain. (Bug. 2:20) Gani, kon ginaimpluwensiahan sang isa ka indibiduwal ang iban nga magpati sa panudlo sang mga apostata ukon maghimo sing malain, indi sia dapat pagbisitahan sang mga gulang. Siempre, posible gihapon nga maghinulsol sia. Pero samtang wala pa sia nagahinulsol, indi gid naton sia dapat pagtamyawon kag indi naton sia pag-agdahon nga mag-attend sa miting sang kongregasyon.

ILUGA ANG KALUOY NI JEHOVA

16-17. (a) Ano ang gusto ni Jehova nga himuon sang mga nakahimo sang serioso nga sala? (Ezequiel 18:32) (b) Paano mapakita sang mga gulang nga masigkamanugpangabudlay sila ni Jehova sa pagbulig sa mga nakasala?

¹⁶ Ano ang natun-an naton sa lima ka artikulo? Indi luyag ni Jehova nga malaglag ang bisan sin-o. (Basaha ang Ezequiel 18:32.) Gusto niya nga magbalik sa iya ang mga nakahimo sang serioso nga sala. (2 Cor. 5:20) Gani halin pa sang una, sulitsulit nga ginapalig-on ni Jehova ang iya rebelyuso nga katawhan kag ang iya mga alagad nga nagbiya sa iya nga maghinulsol kag magbalik sa iya. Mapakita sang mga gulang nga masigkamanugpangabudlay sila ni Jehova kon panikasugan nila nga buligan ang mga nakasala nga maghinulsol.​—Roma 2:4; 1 Cor. 3:9.

¹⁷ Imadyina ang grabe nga kalipay sa langit kon maghinulsol ang mga nakasala. Nalipay gid ang aton Amay sa langit, nga si Jehova, sa kada tion nga magbalik sa kongregasyon ang isa sa iya mga karnero nga nadula. Kon pamalandungan naton ang kaluoy kag ang wala tupong nga kaayo ni Jehova, mas palanggaon pa gid naton sia.​—Luc. 1:78.