Ang Makakulugmat nga mga Natabo sa Inaway
Grabe gid ang halit sang inaway kag kinagamo sa mga tawo nga nakaeksperiensia sini. Kabalo gid ang mga soldado kag mga sibilyan sa bilog nga kalibutan kon daw ano kalain ang epekto sang inaway kag kinagamo.
MGA SOLDADO
“Pirme ka lang makakita sang mga tawo sa palibot mo nga nagakapatay ukon nagakapilasan. Wala gid sang kasiguraduhan ang imo kabuhi.”—Gary, Britain.
“Naigo ako sang mga bala sa akon likod kag guya, kag madamo ako sang nakita nga mga tawo nga napatay, lakip na ang mga bata kag mga tigulang. Kon pirme ka makaeksperiensia sang inaway, daw wala na lang sa imo ang pag-antos kag kamatayon.”—Wilmar, Colombia.
“Kon may isa ka tawo nga gintiro sa atubangan mo, indi na ini madula sa imo hunahuna. Pirme mo maaningal ang iya pagsinggitan kag pag-ugayong. Indi mo gid malipatan ato nga tawo, asta san-o.”—Zafirah, United States.
MGA SIBILYAN
“Pamatyag ko indi na gid ako mangin malipayon liwat. Nahadlok ’ko mapatay, pero mas nahadlok ’ko nga basi mapatay ang akon pamilya kag mga abyan.”—Oleksandra, Ukraine.
“Kululbaan gid magpila para sa pagkaon halin alas 2:00 sang kaagahon asta alas 11:00 sang gab-i, kay wala ka kabalo basi maiguan ka sang nagtalang nga bala.”—Daler, Tajikistan.
“Napatay bangod sa inaway ang akon mga ginikanan. Gani, wala na sang nagapaumpaw kag nagaatipan sa akon.”—Marie, Rwanda.
Bisan pa ining ginsambit nga mga tawo nag-antos bangod sa inaway, nakakita sila sang paumpaw kag kalinong subong. Kumbinsido man sila nga ang tanan nga inaway kag kinagamo madali na lang dulaon. Ipaathag sa sini nga isyu sang Ang Lalantawan kon paano ina matabo base sa ginasiling sang Biblia.