Kon Paano Ka Makabatyag sang Kalinungan Bisan May Inaway kag Kinagamo
“Sang wala pa ’ko nakatuon sa Biblia,” siling ni Gary, nga isa ka soldado sadto, “wala gid ’ko kabalo kon ngaa grabe gid ang pagpamintas, inhustisya, kag problema sa kalibutan. Pero subong, may kalinong na ako sa panghunahuna. Kay kabalo ’ko nga sa ulihi, himuon ni Jehova nga Dios nga malinong ang bilog nga duta kag indi na delikado.”
Indi lang si Gary ang nakabatyag sini. Binagbinaga kon paano nakabulig ang Biblia sa iban.
ANG GINASILING SANG BIBLIA: “Ikaw, O Jehova, maayo kag handa sa pagpatawad.”—Salmo 86:5.
KON PAANO INI NAKABULIG: “Ini nga teksto nagpasalig sa akon nga may kaluoy si Jehova. Kabalo ’ko nga handa sia magpatawad sang tanan ko nga nahimo sadto sang soldado pa ako.”—Wilmar, Colombia.
ANG GINASILING SANG BIBLIA: “Nagatuga ako sing bag-o nga langit kag bag-o nga duta; kag ang nagligad nga mga butang indi na pagdumdumon, ukon magpabilin sa tagipusuon.”—Isaias 65:17.
KON PAANO INI NAKABULIG: “May post-traumatic stress disorder ako kag depression bangod sa mga inagyan ko sa military. Pero ini nga teksto nagapahanumdom sa akon nga sa indi madugay, panason ni Jehova ang tanan ko nga malain nga inagyan kag indi ko na gid ini madumduman liwat. Madula na ini sa akon hunahuna kag tagipusuon. Kanami gid kon matabo ini!”—Zafirah, United States.
ANG GINASILING SANG BIBLIA: “Sa tion sang iya paggahom magalambo ang matarong, kag magabugana ang paghidait tubtob wala na ang bulan.”—Salmo 72:7.
KON PAANO INI NAKABULIG: “Pirme ko gid ginapamensar ini nga mga tinaga. Sa indi madugay, madula na ang inaway kag ang tanan nga malain nga epekto sini, kag indi na kita mabalaka sa seguridad sang aton mga pinalangga.”—Oleksandra, Ukraine.
ANG GINASILING SANG BIBLIA: “Ang imo mga patay mabuhi. . . . Magmata kamo kag magsinggit sa kalipay, kamo nga mga pumuluyo sang yab-ok!”—Isaias 26:19.
KON PAANO INI NAKABULIG: “Halos tanan nga miembro sang akon pamilya ang ginpatay sang gintinguhaan sang isa ka tribo nga pamatyon ang Tutsi nga tribo. Ini nga teksto nagapasalig sa akon nga makita ko gid sila liwat. Gusto ko na gid mabatian ang ila masadya nga mga tingog kon mabanhaw na sila!”—Marie, Rwanda.
ANG GINASILING SANG BIBLIA: “Sa indi na lang madugay, madula na ang mga malauton . . . Apang ang mga mahagop magapanubli sang duta, kag mangin malipayon gid sila sa bugana nga paghidait.”—Salmo 37:10, 11.
KON PAANO INI NAKABULIG: “Bisan pa tapos na ang isa ka inaway, may ara gihapon inhustisya kag malain nga mga tawo. Napabakod gid ako sini nga mga teksto. Nakita ni Jehova ang tanan nga nagakatabo kag naintiendihan niya ang akon sitwasyon. Nagapromisa sia nga sa indi madugay, madula gid ang tanan nga pag-antos kag indi na ini madumduman.”—Daler, Tajikistan.
Ang mga tawo nga ginsambit sa sini nga magasin nalakip sa minilyon ka Saksi ni Jehova nga nabuligan sang Biblia nga makabatyag sang kalinong. Natun-an nila nga dulaon ang dumot bangod lain ang rasa, pungsod, ukon tribo sang iban, ukon bangod sa ila personal nga kaakig. (Efeso 4:31, 32) Ang mga Saksi ni Jehova neutral sa pulitika kag wala nagahimo sang bisan ano nga klase sang pagpamintas.—Juan 18:36.
Sa bilog nga kalibutan, ginapakita sang mga Saksi ni Jehova ang gugma kag pagsuporta sa isa kag isa nga daw pareho sa isa ka pamilya. (Juan 13:35) Halimbawa, si Oleksandra, nga ginsambit sa sini nga magasin, nagpalagyo pakadto sa iban nga pungsod upod sa iya utod nga babayi bangod sa inaway. Sia nagsiling: “Sang nakatabok na kami sa border, nakita dayon namon ang mga Saksi didto nga nagahulat sa amon para abiabihon kami. Ang ila suporta nakabulig sa amon nga maka-adjust sa bag-o nga pungsod nga ginaistaran namon subong bilang mga refugee.”
Ginaagda ka gid namon nga mag-attend sa amon mga miting. Diri namon ginatun-an ang mensahe sang Biblia parte sa kalinong kag kon paano ini sundon. Kadtui ang jw.org para makita mo ang lokasyon nga malapit sa imo. Puede ka man mangabay sang libre nga interactive nga pagtuon sa Biblia upod sa isa sa mga Saksi ni Jehova, gamit ang publikasyon nga Magkabuhi sing Wala Katapusan!