“Ang Inaway Iya ni Jehova”

Sang 1999, nagsiling ang gobierno sang France nga dapat magbayad sing buhis ang aton branch office didto. Buhis kuno ini sa mga donasyon nga nabaton naton halin sang 1993 asta sang 1996. Nagdesisyon ang mga korte sa France nga dapat kita magbayad sing buhis. Gin-apelar namon ini, pero napierde gihapon kami sa kaso. Gani ginkuhaan sang gobierno ang kuarta sang branch sa bangko sing sobra apat kag tunga ka milyon ka euro (mga 270 ka milyon ka peso). Ang pag-apelar sa ECHR amo na lang ang amon tsansa. Pero antes nila pamatian ang kaso, ginpatawag kami sang ECHR pati na ang mga abogado sang gobierno. Ginpaatubang kami sa representante sang European Court para istoryahan kon puede pa madala sa areglo ang kaso.

Ginapaabot namon nga hambalan kami sang representante sang European Court nga aregluhon na lang ang kaso, ukon bayaran na lang namon ang gobierno sang kantidad nga mas manubo sangsa ginapangayo nila. Pero kon magbayad kami bisan isa lang ka euro, kabalo kami nga may malapas gid kami nga mga prinsipio sa Biblia. Kay man, indi para sa gobierno ang ginahatag nga donasyon sang mga kauturan, kundi para ini sa hilikuton sang Ginharian. (Mat. 22:21) Pero bilang pagtahod sa mando sang European Court, nagkadto kami gihapon.

Nag-atubangay kami sa isa ka manami nga conference room sang European Court. Sa umpisa pa lang, nagsiling dayon ang representante sang European Court nga dapat bayaran sang mga Saksi ni Jehova ang pila ka buhis nga ginapangayo sang France. Dayon ginpamangkot sia namon, “Kabalo ka bala ma’am nga ginkuhaan na sang gobierno ang amon kuarta sa bangko sing sobra apat kag tunga ka milyon ka euro?” Ang balaan nga espiritu ni Jehova ang nagbulig sa amon nga mahunahuna ini nga pamangkot.

Nakita namon nga nakibot gid sia. Sang nag-aku ang mga abogado sang gobierno nga ginhimo gid man nila ini, nagbag-o ang iya pagtan-aw sa kaso. Gin-akigan niya sila kag gintapos niya dayon ang amon miting. Narealisar ko nga ginbag-o gid ni Jehova ang sitwasyon para magdaug kami sa sini nga kaso. Nalipay gid kami pagkatapos sang miting kag daw indi kami makapati sang natabo.

Sang Hunyo 30, 2011, nagdesisyon ang tanan nga judge sang ECHR pabor sa aton. Nagsiling sila nga ilegal ang pagkuha sang gobierno sang aton kuarta. Gani, ginmanduan sila nga ibalik ini nga may interes. Ining importante nga desisyon nakabulig para maproteksionan ang matuod nga pagsimba sa France asta subong. Paagi sa isa lang ka pamangkot nga wala namon nahunahuna nga ipamangkot gali namon, nagbag-o ang resulta sang kaso. Daw pareho ini sa bato nga nagpatay kay Goliat. Ngaa nagdaug kami sa kaso? Kay pareho sa ginsiling ni David kay Goliat, “ang inaway iya ni Jehova.”​—1 Sam. 17:​45-47.

Indi lang amo ini ang kaso nga nagdaug kita. Bisan pa ginapamatukan kita sang gamhanan nga mga gobierno kag mga relihion, nagdaug kita sa 1,225 ka mga kaso sa pinakamataas nga mga korte sa 70 ka mga pungsod kag sa pila ka internasyonal nga mga korte. Bangod sini, naproteksionan ang aton mga kinamatarong nga marehistro bilang isa ka relihion, makabantala sing hilway, mangindi nga mag-entra sa mga seremonya nga nagapadungog sa pungsod, kag mangindi sa pagpatughong sang dugo.

Sadto nga tion, nagaalagad ako sa World Headquarters sang mga Saksi ni Jehova sa New York, U.S.A. Ti, ngaa nangin isa ako sa mga abogado nga nagbulig sa kaso sa Europe?

MAKUGI NGA MGA MISYONERO ANG AKON MGA GINIKANAN

Naggradweyt sa ika-12 nga klase sang Gilead ang akon mga ginikanan nga sanday George kag Lucille. Nagaalagad sila sa Ethiopia sang ginbun-ag ako sang 1956. Ginngalanan nila ako nga Philip kay gin-ilog nila ini sa ngalan sang isa ka ebanghelisador sang unang siglo. (Binu. 21:8) Pagkasunod nga tuig, gindumilian sang gobierno ang aton hilikuton. Bisan bata pa ako sadto, madumduman ko nga patago nga nagamiting kag nagabantala ang amon pamilya, kag daw nasadyahan pa gani ako sa sini. Makapasubo nga sang 1960, ginpahalin kami sang mga opisyal sang gobierno sa Ethiopia.

Nagsaylo ang amon pamilya sa Wichita, Kansas, U.S.A., kag makugi gihapon ang akon mga ginikanan sa pagbantala pareho sang mga misyonero pa sila. Gintudluan nila ako nga palanggaon si Jehova kag alagaron sia sing bug-os tagipusuon. Amo man sini ang gintudlo nila sa akon magulang nga babayi nga si Judy kag sa akon manghod nga lalaki nga si Leslie nga sa Ethiopia man ginbun-ag. Nabawtismuhan ako sang 13 anyos ako. Pagligad sang tatlo ka tuig, nagsaylo ang amon pamilya sa bululigan nga kongregasyon sa Arequipa, Peru.

Sang 1974, sang 18 anyos ako, gin-asayn ako sang branch sa Peru kag ang apat pa ka brother nga mag-alagad bilang espesyal payunir. Nalakip sa amon teritoryo ang mga lugar sa Andes Mountains nga wala pa mabantalaan. Bantalaan man namon ang mga tumandok nga nagahambal sang Quechua kag Aymara. Ang salakyan nga amon ginagamit sa pagbiyahe amo man ang amon balay. Ginatawag namon ini nga Arka kay daw daku nga kahon ang korte sini. Nalipay gid ako kon madumduman ko ang mga tion nga ginagamit namon ang Biblia para tudluan ang mga tumandok nga malapit na lang dulaon ni Jehova ang kapigaduhon, balatian, kag kamatayon. (Bug. 21:​3, 4) Madamo ang nagbaton sang mensahe sang Ginharian sa sini nga mga lugar.

GIN-ASAYN AKO SA WORLD HEADQUARTERS

Sang 1977, nagkadto sa Peru ang isa ka miembro sang Nagadumala nga Hubon sang mga Saksi ni Jehova nga si Brother Albert Schroeder. Ginpalig-on niya ako nga mag-aplay sa Bethel sa world headquarters. Gani nag-aplay ako. Dayon sang Hunyo 17, 1977, nag-alagad ako sa Bethel sa Brooklyn. Sa sulod sang apat ka tuig, gin-asayn ako sa Cleaning kag Maintenance nga mga department.

Sang Hunyo 1978, nakilala ko si Elizabeth Avallone sa isa ka internasyonal nga kombension sa New Orleans, Louisiana. Matutom man nga nagaalagad kay Jehova ang iya mga ginikanan. Apat ka tuig na nga nagaalagad si Elizabeth bilang regular payunir sang nagkilalahay kami, kag gusto niya mag-alagad sing bug-os tion kay Jehova sa bilog niya nga kabuhi. Sugod sadto, padayon ang amon komunikasyon. Sang ulihi, nagluyagay kami. Nagpakasal kami sang Oktubre 20, 1979, kag magkaupod kami nga nag-alagad sa Bethel.

Brooklyn Spanish ang amon una nga kongregasyon kag ginpalangga gid kami sang mga kauturan. Kag pagligad sang mga tinuig, nag-alagad kami sa tatlo pa ka mga kongregasyon. Gin-abiabi gid kami sang mga kauturan sa sini nga mga kongregasyon, kag ginpalig-on nila kami nga padayon nga mag-alagad sa Bethel. Naapresyar gid namon ang ila bulig. Nagapasalamat man kami sa amon mga abyan kag pamilya sa pagbulig sa pag-atipan sa amon mga ginikanan nga tigulang na.

ANG AKON TRABAHO SA LEGAL DEPARTMENT

Sang Enero 1982, wala ko gid ginpaabot nga iasayn ako sa Legal Department sa Bethel. Pagligad sang tatlo ka tuig, ginpaeskwela ako sa unibersidad para mangin isa ka abogado. Ginbinagbinag sing maayo sa amon klase ang importante nga mga kaso nga nadaug sang mga Saksi ni Jehova. Nakabulig ini nga mga kaso para mapangapinan ang mga kinamatarong nga ginapakigbato sang mga tawo sa United States kag sa iban pa nga mga pungsod. Nakibot gid ako kag nalipay sang nabal-an ko ini.

Sang 1986, sang 30 anyos ako, gin-asayn ako nga overseer sang Legal Department. Nalipay gid ako nga ginsaligan ako sang Bethel sa sini nga pribilehiyo bisan pa bataon pa lang ako. Pero nabalaka man ako kay madamo pa ako sang wala nabal-an, kag kabalo ’ko nga indi ini mahapos nga asaynment.

Nangin abogado ako sang 1988. Pero wala ko gid narealisar ang epekto sang akon pag-eskwela sa akon kaangtanan kay Jehova. Kon nakaeskwela sa unibersidad ang isa ka tawo, posible nga mangin ambisyuso sia kag magbatyag nga mas maayo sia sangsa iban. Maayo lang kay ginpatalupangod ini sa akon ni Elizabeth. Ginbuligan niya ako nga makapokus liwat sa akon mga ginahimo sang una sa pag-alagad kay Jehova antes ako nag-eskwela sa unibersidad. Gani, amat-amat ako nga nangin suod liwat kay Jehova. Mapamatud-an ko gid nga indi ang aton kaalam ang pinakaimportante sa aton kabuhi, kundi ang aton suod nga kaangtanan kay Jehova kag ang aton gugma sa iya kag sa iya katawhan.

PAGPANGAPIN KAG LEGAL NGA PAGPAMATUOD SA MAAYONG BALITA

Sang naggradweyt na ako, nagpokus ako sa akon asaynment sa Bethel parte sa legal nga mga butang kag sa pagpangapin sa korte sang aton mga hilikuton. Nanamian ako sa akon trabaho, pero may mga kabudlayan man ini bangod madasig ang mga pagbag-o sa aton organisasyon. Ang isa ka halimbawa sini nga pagbag-o amo ang instruksion nga nabaton namon sang 1990. Sadto, may espesipiko nga kantidad para sa kontribusyon sa aton mga publikasyon. Pero ginpangabay ang Legal Department nga maghatag sing panugda kon ano ang maayo nga paagi para bag-uhon ini. Gani, libre na subong ang mga publikasyon sang mga Saksi ni Jehova. Ginpasimple sini ang trabaho sa Bethel kag ang aton pagbantala. Nakabulig man ini nga malikawan ang problema parte sa buhis. Naghunahuna ang iban nga bangod sini nga pagbag-o, posible nga kulangon ang aton kuarta para sa paghimo sang aton mga publikasyon. Kag kon matabo ini, diutay na lang nga tawo ang makatuon parte kay Jehova. Pero indi amo sini ang natabo. Kay man, kon ikumparar ang kadamuon sang mga nagaalagad kay Jehova sang 1990 sa kadamuon nila subong, sobra pa gani ini sa doble. Kag subong, matun-an na sang tanan nga tawo ang nabase sa Biblia nga mga publikasyon nga wala sing bayad. Natun-an ko nga nagamadinalag-on lang ang mga pagbag-o sa aton organisasyon bangod sa bulig ni Jehova kag sa mga instruksion nga aton nabaton paagi sa matutom nga ulipon.​—Ex. 15:2; Mat. 24:45.

Nagadaug kita sa korte indi lang bangod may maayo kita nga mga abogado. Sa masami, bangod man ini sa maayo nga paggawi sang katawhan ni Jehova. Ang isa ka halimbawa sini amo ang natabo sang 1998 sa Cuba. Nagtambong ang tatlo ka miembro sang Nagadumala nga Hubon upod ang ila mga asawa sa mga kombension didto. Bangod sa ila kaayo kag pagkamatinahuron, nakumbinsi ang mga opisyal sang gobierno nga neutral kita sa pulitika. Mas daku ang epekto sang ila paggawi sangsa amon mga ginhambal sa sini nga mga opisyal.

Pero kon kaisa, kinahanglan naton ‘pangapinan kag legal nga pamatud-an ang maayong balita’ sa korte. (Fil. 1:7) Halimbawa, sa sulod sang madamo nga tinuig, wala ginkilala sang mga awtoridad sa Europe kag sa South Korea ang aton kinamatarong nga mangindi nga magsoldado. Bangod sini, mga 18,000 ka brother sa Europe kag sobra 19,000 ka brother sa South Korea ang nakaeksperiensia nga mapriso.

Pero sang Hulyo 7, 2011, ginpagua sang ECHR ang desisyon sini sa kaso nga Bayatyan v. Armenia. Ginamanduan sini ang tanan nga pungsod sa Europe nga tugutan ang alternative civilian service. Kag sang Hunyo 28, 2018, pareho man sa sini ang ginpagua nga desisyon sang South Korean Constitutional Court. Kon wala nagpabilin nga neutral bisan ang pila lang sa aton pamatan-on nga mga brother, wala gid kuntani kita nagdaug sa sini nga mga kaso.

Ginahimo gid sang legal department sa headquarters kag sa mga branch sa bilog nga kalibutan ang ila bug-os nga masarangan nga pangapinan ang aton mga hilikuton. Pribilehiyo gid namon nga buligan ang mga utod nga ginapamatukan sang gobierno. Madaug man kami sa korte ukon indi, ang amon pagpangapin nagahatag sing panaksi sa mga gobernador, sa mga hari, kag sa mga pungsod. (Mat. 10:18) Kay man, dapat usisaon sang mga judge, sang mga representante sang gobierno, kag sang media ang mga teksto nga ginasambit naton sa aton mga dokumento kag mga argumento para suportahan ang aton kaso. Puede man gani ini usisaon sang ordinaryo nga mga tawo. Bangod sini, nabal-an sang sinsero nga mga tawo kon sin-o gid ang mga Saksi ni Jehova kag kon diin naton ginabase ang aton mga ginapatihan. Mga utod na naton subong ang pila sa ila.

SALAMAT GID KAY JEHOVA

Sa nagligad nga sobra 40 ka tuig, nakapribilehiyo ako nga makabulig sa mga branch office sa bilog nga kalibutan parte sa legal nga mga butang. Nakapribilehiyo man ako nga makaatubang sa madamo nga mataas nga korte kag sa mataas nga mga opisyal. Palangga ko gid ang akon mga kaupod sa Legal Department sa world headquarters kag sa legal department sang mga branch sa bilog nga kalibutan. Napalig-on gid ako sa ila. Ginpakamaayo gid ako ni Jehova kag nangin malipayon gid ako.

Sa nagligad nga 45 ka tuig, mainunungon kag mahigugmaon gid ako nga ginsuportahan ni Elizabeth bisan sa mabudlay nga mga sitwasyon. Ginsuportahan gid niya ako bisan pa may ginaantos sia nga balatian kag limitado na lang ang iya mahimo. Bangod sini, mas ginpalangga ko pa gid sia.

Nasaksihan gid namon nga nagadaug kita sa mga kaso indi bangod sa amon kaugalingon nga kusog kag ikasarang. Sa baylo, pareho sa ginsiling ni David, “Si Jehova amo ang kusog sang iya katawhan.” (Sal. 28:8) Huo, “ang inaway iya ni Jehova.”