Iluga ang Pagkamapainubuson ni Jehova

1. Ngaa dalayawon gid ang pagkamapainubuson ni Jehova?

KON obserbahan mo ang mga lider sang mga gobierno subong, masiling mo bala nga mapainubuson sila? Posible gid nga magsiling ka nga indi. Pero sa bahin ni Jehova, mapainubuson gid sia bisan pa nga sia ang labing gamhanan. (Sal. 113:5-8) Si Jehova ang pinakamapainubuson sa tanan. Wala gid sing bisan gamay lang nga pagkamatinaastaason nga makita sa iya. Sa sini nga artikulo, binagbinagon naton kon paano ginapakita ni Jehova ang iya pagkamapainubuson sa apat ka paagi. Binagbinagon man naton kon paano gin-ilog ni Jesus ang pagkamapainubuson sang iya Amay. Paagi sa pagbinagbinag sini, mapalig-on kita nga mangin suod pa gid kay Jehova kag ilugon ang iya pagkamapainubuson.

MAHAPOS PALAPITAN SI JEHOVA

2. Ano ang ginasugid sa aton sang Salmo 62:8 parte kay Jehova? (Tan-awa man ang piktyur.)

² Sa masami, indi mahapos palapitan ang mga bugalon. Natahap ang iban magpalapit sa ila kay ginapabatyag nila sa iban nga mas maayo sila. Pero indi gid amo sina si Jehova. Bangod mapainubuson ang aton Amay sa langit, gusto niya nga mangamuyo kita sa iya kag isugid naton ang tanan naton nga ginakabalak-an. (Basaha ang Salmo 62:8.) Pareho sa isa ka mahigugmaon nga amay nga gusto gid mabal-an ang ginabatyag kag ginahunahuna sang iya bata, gusto gid ni Jehova pamatian ang aton mga pangamuyo. Ginpasulat pa gani niya sa Biblia ang madamo sa sini nga mga pangamuyo. Ginapakita sini nga mahapos sia palapitan. (Jos. 10:12-14; 1 Sam. 1:10-18) Pero ano abi kon nahuya kita mangamuyo kay Jehova bangod sa aton mga sala?

3. Ngaa makasalig ka nga gusto ni Jehova nga mangamuyo ka pirme sa iya?

³ Puede gid kita makapangamuyo kay Jehova bisan pa pamatyag naton indi kita nagakabagay sa iya pagpalangga. Ngaa masiling naton ina? Sa ilustrasyon ni Jesus parte sa rebelyuso nga anak, ginkumparar niya si Jehova sa isa ka mapinalanggaon nga amay. Nakahimo sing madamo nga sala ang anak, gani abi niya indi na sia pagbatunon sang iya amay. Ano ang ginhimo sang amay sang naghinulsol ang iya anak kag nagbalik sa ila balay? Nagsiling si Jesus nga sang nakita sang amay ang iya anak, ‘nagdalagan ang amay kag ginhakos ang iya anak kag mapinalanggaon nga ginhalukan.’ (Luc. 15:17-20) Pareho sa sina nga amay si Jehova. Kon mangamuyo kita sa iya bangod nasubuan kita sa aton mga sala ukon nabalaka kita, pamatian niya kita dayon bangod mapainubuson sia. (Pan. 3:19, 20) Kag bangod maluluy-on si Jehova, daw nagadalagan man sia pakadto sa aton para paumpawan kita kag ipabatyag sa aton nga palangga niya kita. (Isa. 57:15) Paano ‘nagadalagan’ si Jehova pakadto sa aton? Sa masami, ginagamit niya ang mga gulang, ang aton Saksi nga pamilya, kag ang aton mga kauturan. (Sant. 5:14, 15) Gin-aman ni Jehova ini nga bulig kay gusto niya nga mangin suod kita sa iya.

4. Paano ginpakita ni Jesus nga mahapos sia palapitan?

⁴ Gin-ilog ni Jesus ang iya Amay. Mapainubuson man si Jesus pareho sa iya Amay. Gani sang ari sia sa duta, wala natahap ang mga tawo magpalapit kag magpamangkot sa iya. (Mar. 4:10, 11) Sang ginpamangkot sila ni Jesus kon ano ang ila masiling parte sa isa ka butang, ginsugid nila sa iya kon ano gid ang ara sa ila hunahuna. (Mat. 16:13-16) Kag sang nakahimo sila sang sala, wala sila mahadlok nga basi akigan sila ni Jesus. Kabalo sila nga maluluy-on kag mapinasensiahon si Jesus kag pakitaan niya sila sang kaayo. (Mat. 17:24-27) Bangod gin-ilog gid ni Jesus ang iya Amay, mas nakilala pa gid sang mga disipulo ni Jesus si Jehova. (Juan 14:9) Natun-an nila nga mapainubuson si Jehova kag mahapos sia palapitan, kag indi sia pareho sa mga lider sang relihion nga mga mapintas kag bugalon.

5. Ngaa indi matahap ang iban nga magpalapit sa aton kon mapainubuson kita?

⁵ Paano naton mailog si Jehova? Kon indi kita mapainubuson, posible mahisa kita, mangin bugalon, kag mabudlayan magpatawad. Kon may amo kita sini nga mga kinaiya, likawan kita sang iban. Pero kon mapainubuson kita, buligan kita sini nga mangin mainayuhon, mapinasensiahon, kag mapinatawaron. Gani, indi matahap ang iban nga magpalapit sa aton. (Col. 3:12-14) Sa bahin sang mga gulang, dapat nila ipakita nga mahapos sila palapitan. Para mahimo nila ini, dapat magpakig-upod sila pirme sa mga kauturan. Gani kon posible man lang, panikasugan gid nila nga mag-attend sa mga miting sa Kingdom Hall imbes nga sa videoconference. Kag kon ginatugot sang ila kahimtangan, panikasugan gid nila nga magpakig-upod sa mga kauturan sa pamalaybalay nga pagbantala. Kon makilala sing maayo sang mga kauturan ang mga gulang, indi sila matahap magpabulig sa ila kon may problema sila.

MAKATARUNGANON SI JEHOVA

6-7. Maghatag sing mga halimbawa nga nagapakita nga handa si Jehova nga pamatian ang mga pangabay sang iya mga alagad.

⁶ Sa masami, nagahunahuna ang mga bugalon nga mas maayo sila sangsa iban kag indi nila gusto bag-uhon ang ila panghunahuna. Pero lain gid si Jehova kay mapainubuson sia. Gani bisan pa nga sia ang kabalo kon ano ang pinakamaayo, makatarunganon sia kag handa sia nga bag-uhon ang iya desisyon. Binagbinaga ang iya ginhimo sa utod ni Moises nga si Miriam. Ginpakalain sadto ni Miriam kag ni Aaron si Moises. Sala gid ang ila ginhimo kay representante ni Jehova si Moises. Gani, daw pareho lang nga wala gintahod ni Miriam si Jehova. Bangod sini, naakig gid si Jehova kay Miriam kag ginsilutan sia sing aro. Pero nagpakitluoy si Aaron kay Moises, kag ginpangabay ni Moises si Jehova nga ayuhon si Miriam. Ano ang ginhimo ni Jehova? Kon nangin bugalon si Jehova, wala gid kuntani niya ginbag-o ang iya ginsilot kay Miriam. Pero bangod mapainubuson si Jehova, ginpamatian niya si Moises kag gin-ayo Niya si Miriam.—Num. 12:1-15.

⁷ Makita man naton ang pagkamapainubuson ni Jehova sa ginhimo niya kay Hari Ezequias. Paagi sa iya manalagna, ginpabalo niya kay Ezequias nga mapatay sia. Dayon, nagahilibion nga nagpakitluoy si Ezequias kay Jehova nga ayuhon sia. Naluoy si Jehova sa iya gani gindugangan niya sing 15 pa ka tuig ang iya kabuhi. (2 Hari 20:1, 5, 6) Bangod mapainubuson si Jehova, ginapakitaan niya sing kaluoy ang mga tawo kag handa sia nga pamatian ang ila pangabay.

8. Paano ginapakita ni Jesus nga makatarunganon sia? (Marcos 3:1-6)

⁸ Gin-ilog ni Jesus ang iya Amay. Sang ari si Jesus sa duta, nagahimo gid sia sing maayo sa iban basta makita niya nga makatarunganon ini. Halimbawa, gin-ayo niya ang mga tawo sa Adlaw nga Inugpahuway bisan pa nga ginpamatukan sia sang mga lider sang relihion nga wala sing kaluoy. (Basaha ang Marcos 3:1-6.) Subong, makatarunganon gihapon si Jesus bilang ulo sang Cristianong kongregasyon. Halimbawa, kon nakahimo sang serioso nga sala ang isa ka utod, mapinasensiahon gid si Jesus kay ginahatagan niya sia sang bastante nga tion nga magbag-o.—Bug. 2:2-5.

9. Paano naton mapakita ang pagkamakatarunganon? (Tan-awa man ang mga piktyur.)

⁹ Paano naton mailog si Jehova? Dapat naton panikasugan nga ilugon ang pagkamakatarunganon ni Jehova sa aton panghunahuna kag ginahimo. (Sant. 3:17) Halimbawa, kabalo ang makatarunganon nga mga ginikanan kon ano lang ang masarangan nga himuon sang ila kabataan. Maayo gid nga halimbawa sa sini si Jacob nga mabasa sa Genesis 33:12-14. Wala man ginakumparar sang mapainubuson kag makatarunganon nga mga ginikanan ang ila kabataan. Dapat man mangin makatarunganon ang mga gulang. Halimbawa, indi dapat pag-iinsister sang isa ka gulang ang iya opinyon. Sa baylo, dapat niya suportahan ang desisyon sang kalabanan nga gulang basta wala ini may nalapas nga prinsipio sa Biblia. (1 Tim. 3:2, 3) Sa bahin naton tanan, dapat naton panikasugan nga intiendihon ang ginahunahuna kag ginabatyag sang iban bisan pa nga lain ang aton pagtan-aw sa isa ka sitwasyon. (Roma 14:1) Dapat panikasugan sang kada isa sa aton nga ‘makita sang tanan nga tawo ang aton pagkamakatarunganon.’—Fil. 4:5.

MAPINASENSIAHON SI JEHOVA

10. Paano ginpakita ni Jehova nga mapinasensiahon sia?

¹⁰ Posible natalupangdan mo nga indi gusto sang mga bugalon nga ginapahulat sila kag dali sila matak-an. Lain gid si Jehova kay mapinasensiahon gid sia. Halimbawa, sang panahon ni Noe, nagsiling si Jehova nga mahulat Sia sing 120 ka tuig antes Niya laglagon ang mga malauton. (Gen. 6:3) Gani, may tion si Noe nga padakuon ang iya mga anak kag himuon ang arka sa bulig sang iya pamilya. Sang ulihi, mapinasensiahon nga ginpamatian sang anghel ni Jehova ang mga pamangkot ni Abraham parte sa paglaglag sa Sodoma kag Gomorra. Kon nangin bugalon ang anghel, posible nga ginsilingan niya si Abraham, ‘Sin-o ka para mamangkot sina?’ Pero bangod gin-ilog sang anghel ang pagkamapainubuson ni Jehova, nangin mapinasensiahon sia kay Abraham.—Gen. 18:20-33.

11. Suno sa 2 Pedro 3:9, ngaa mapinasensiahon si Jehova sa aton tion subong?

¹¹ Sa aton tion subong, ginapakita man ni Jehova nga mapinasensiahon sia ukon mapailubon. Ginahulat niya ang iya gintalana nga tion sang katapusan. Ngaa mapinasensiahon sia? “Bangod indi niya luyag nga ang bisan sin-o malaglag kundi luyag niya nga ang tanan mahatagan sang kahigayunan nga maghinulsol.” (Basaha ang 2 Pedro 3:9.) Hunahunaa ini: Bangod nangin mapinasensiahon si Jehova, minilyon ka tawo ang nangin suod sa iya. Kag nagalaum kita nga minilyon pa ka tawo ang magahimo man sini. Pero, may limitasyon ang pagkamapinasensiahon ni Jehova. Palangga ni Jehova ang mga tawo, pero indi sia magpasugot nga himuon lang nila pirme ang ila gusto asta san-o. Indi gid sia magtugot nga magpadayon ang kalainan asta sa wala sing katapusan.—Hab. 2:3.

12. Paano gin-ilog ni Jesus ang pagkamapinasensiahon ni Jehova?

¹² Gin-ilog ni Jesus ang iya Amay. Sa sulod sang linibo ka tuig, gin-ilog ni Jesus ang pagkamapinasensiahon ni Jehova. Nakita ni Jesus kon paano ginpasipalahan ni Satanas si Jehova kag ang matutom nga mga tawo. (Gen. 3:4, 5; Job 1:11; Bug. 12:10) Nakita man ni Jesus ang grabe nga pag-antos sang mga tawo. Gani, sigurado nga gusto na gid ni Jesus nga “gub-on ang mga binuhatan sang Yawa.” (1 Juan 3:8) Ano ang rason kon ngaa nagahulat si Jesus sing mapinasensiahon asta sa tion nga silingan sia ni Jehova nga laglagon na niya ang tanan nga binuhatan sang Yawa? Ang isa ka rason amo nga mapainubuson si Jesus. Kabalo sia nga si Jehova ang nagadesisyon kon san-o maabot ang katapusan.—Binu. 1:7.

13. Paano ginpakita ni Jesus nga mapinasensiahon sia sa iya mga apostoles, kag ngaa mapinasensiahon sia sa ila?

¹³ Sang ari si Jesus sa duta, mapinasensiahon man sia sa iya mga apostoles. Halimbawa, bisan pa sulitsulit sila nga nagbaisay kon sin-o ang pinakamataas sa ila, wala ginhunahuna ni Jesus nga indi na gid sila magbag-o. Sa baylo, nangin mapinasensiahon sia sa ila. (Luc. 9:46; 22:24-27) Ngaa? Kay man, sigurado sia nga matun-an nila nga mangin mapainubuson. May tion bala nga sulitsulit mo nga nahimo ang amo gihapon nga sala? Kon huo, sigurado gid nga nagapasalamat ka kay mapainubuson kag mapinasensiahon ang aton Hari.

14. Ano ang dapat naton himuon para mangin mapinasensiahon kita?

¹⁴ Paano naton mailog si Jehova? Para mailog naton ang panghunahuna kag ang ginahimo ni Jehova, dapat naton tun-an ang “hunahuna sang Cristo.” (1 Cor. 2:16) Paano naton maintiendihan sing maayo ang hunahuna sang Cristo? Ang isa sa dapat gid naton himuon amo ang pagbasa sa mga Ebanghelyo. Dayon, dapat kita magpain sang tion para pamalandungan ang mga ginhimo ni Jesus kag kon ngaa ginhimo niya ini. Kag dapat kita mangabay kay Jehova nga buligan niya kita nga mangin mapainubuson kag mapinasensiahon pareho kay Jesus. Kon matun-an naton nga maghunahuna pareho kay Jesus, mas mailog pa gid naton si Jehova paagi sa pagpakita sing pagkamapinasensiahon sa aton kaugalingon kag sa aton mga kauturan.—Mat. 18:26-30, 35.

GINAPABALORAN NI JEHOVA ANG MGA GINAPAKANUBO SANG IBAN

15. Paano ginpakita ni Jehova nga ginahimo gid niya ang ginasiling sang Salmo 138:6?

¹⁵ Basaha ang Salmo 138:6. Si Jehova ang Soberano sang uniberso, pero ginatalupangod niya ang mga mapainubuson. Binagbinaga ang pila ka halimbawa sang mga tawo nga posible ginpakanubo sang iban, pero ginpabaloran ni Jehova. Posible nga indi naton kilala ang pila sa ila, pero ginpasulat ni Jehova sa Biblia ang ila kasaysayan. Halimbawa, gintuytuyan ni Jehova si Moises nga isulat ang parte kay Debora nga isa ka yaya. Matutom sia nga nag-alagad sa panimalay ni Isaac kag ni Jacob sa sulod sang mga 125 ka tuig. Diutay lang ang aton nabal-an parte sa sining mainunungon nga babayi, pero ginsigurado ni Jehova nga malakip sa Biblia ang isa ka detalye nga nagapakita nga ginpalangga gid si Debora. (Gen. 24:59; 35:8, footnote) Pagligad sang ginatos ka tuig, ginpili ni Jehova ang isa ka manugbantay sang karnero nga si David para mangin hari sang Israel. (2 Sam. 22:1, 36) Wala madugay pagkatapos ginbun-ag si Jesus, nagpadala ang Dios sang mga anghel sa mga manugbantay sang karnero. Paagi sini, ginpadunggan niya sila kay sila ang una nga nakabalo nga nabun-ag na sa Betlehem ang mangin Mesias sa ulihi. (Luc. 2:8-11) Kag sang gindala ni Jose kag ni Maria si Jesus sa templo, ginpadunggan ni Jehova ang tigulang nga sanday Simeon kag Ana kay nakita nila ang Iya Anak. (Luc. 2:25-30, 36-38) Gani, “bisan si Jehova mataas, makita niya ang mapainubuson.”

16. Paano gin-ilog ni Jesus ang iya Amay?

¹⁶ Gin-ilog ni Jesus ang iya Amay. Pareho sa iya Amay, ginpabaloran man ni Jesus ang mga tawo nga ginapakanubo sang iban. Gintudluan niya ang ‘ordinaryo kag indi edukado’ nga mga tawo parte sa Ginharian sang Dios. (Binu. 4:13; Mat. 11:25) Gin-ayo man ni Jesus ang mga nagamasakit. Pero magluwas nga gin-ayo niya sila, ginpabatyag man niya sa ila nga palangga niya sila. (Luc. 5:13) Sang gab-i antes napatay si Jesus, ginhimo niya ang ginaobra sang isa ka alagad paagi sa paghinaw sa mga tiil sang iya mga apostoles. (Juan 13:5) Kag antes sia magpalangit, ginpadunggan niya ang tanan niya nga sumulunod, lakip na kita subong, paagi sa paghatag sa aton sang pinakaimportante nga hilikuton. Ini nga hilikuton amo ang pagbulig sa iban nga makatigayon sing kabuhi nga wala sing katapusan.—Mat. 28:19, 20.

17. Paano naton mapakita nga ginapabaloran naton ang iban? (Tan-awa man ang piktyur.)

¹⁷ Paano naton mailog si Jehova? Mapakita naton nga ginapabaloran naton ang mga tawo paagi sa pagbantala sa ila ano man ang ila estado sa kabuhi, rasa, ukon tinapusan. Paano naman naton mapakita nga ginapabaloran naton ang aton mga kauturan? Kabigon naton nga mas labaw sila sangsa aton ano man ang aton mga ikasarang ukon pribilehiyo. (Fil. 2:3) Kon ginapanikasugan gid naton nga pabaloran ang iban, malipay gid si Jehova kay mapainubuson kita nga ‘nagapanguna’ sa pagpadungog sa isa kag isa.—Roma 12:10; Sof. 3:12.

18. Ngaa gusto mo ilugon ang pagkamapainubuson ni Jehova?

¹⁸ Kon panikasugan naton nga ilugon ang pagkamapainubuson sang aton mahigugmaon nga Amay sa langit, mangin mas mahapos pa gid kita palapitan, mangin mas makatarunganon, kag mangin mas mapinasensiahon. Kag pabaloran man naton ang iban, pareho sa ginahimo ni Jehova. Kon panikasugan naton nga mangin suod pa gid sa aton mapainubuson nga Dios, mangin hamili pa gid kita sa iya.—Isa. 43:4.