Madumduman Mo Bala?

Nabasa mo na bala sing maayo ang bag-o nga mga isyu sang Ang Lalantawan? Kon amo, tilawi kon masabat mo ang masunod nga mga pamangkot:

Ngaa ginahimaya naton si Jehova?

Ginahimaya naton sia bangod sang aton tudok nga pagtahod sa iya kag palangga gid naton sia. Ginahimaya man naton sia bangod gusto naton nga makilala sia sang iban.—w25.01, p. 3.

Kon nasakit sang iban ang aton balatyagon, ano ang himuon naton para mangin mas mapinatawaron pa gid kita?

Wala naton ginabalewala ang aton ginabatyag. Pero kon dulaon naton ang aton kaakig kag indi kita maghinakit, indi maapektuhan ang aton kaangtanan sa iban.—w25.02, p. 15-16.

Ngaa maayo gid nga halimbawa si disipulo Marcos para sa pamatan-on nga mga brother?

Handa si Marcos nga mag-alagad para sa iban. Bisan pa may sitwasyon nga posible nasakitan kag naluyahan si Marcos, wala sia nag-untat sa pag-alagad. Nagpakig-upod man si Marcos kay Pablo kag sa iban pa nga hamtong nga mga Cristiano.—w25.04, p. 27.

Ano ang buot silingon ni Jesus sang nangamuyo sia: “Ginpakilala ko ang imo ngalan sa ila”? (Juan 17:26)

Kabalo na nga daan ang iya mga disipulo sa ngalan sang Dios. Pero ginbuligan sila ni Jesus nga mas makilala sing maayo si Jehova. Nalakip sa sini ang katuyuan ni Jehova, ang iya mga ginhimo, kag ang iya mga kinaiya.—w25.05, p. 20-21.

Kon mapainubuson kita, ano ang ginabaton naton?

Ginabaton naton nga may pila ka butang nga wala kita kabalo. Halimbawa, wala kita kabalo kon san-o maabot ang katapusan ukon kon ano ang himuon ni Jehova sa sina nga tion. Wala man kita kabalo kon ano ang matabo buas ukon kon daw ano kita ka kilala ni Jehova.—w25.06, p. 15-18.

Ano ang puede naton himuon para makabenepisyo kita sa pangpubliko nga artikulo ukon pamulongpulong?

Pamangkuton naton ang aton kaugalingon: ‘Ano nga mga pamatuod ang gingamit para mangin makapakumbinsi ang pagpresentar sang kamatuoran sa Biblia? May gingamit bala nga mga ilustrasyon nga puede ko gamiton sa pagtudlo sa iban? Sin-o ayhan ang interesado sa sini nga topiko?’—w25.07, p. 19.

Ano ang matun-an naton parte sa Dios sang ginpatawad niya si David?

Nakahimo si David sing serioso nga mga sala. Pero sinsero nga naghinulsol si David, gani ginpatawad sia ni Jehova. (1 Hari 9:4, 5) Kag kon ginpatawad na kita sang Dios, indi na niya kita pagsukton ukon pagsilutan bangod sini.—w25.08, p. 17.

Kon nabudlayan ang imo Bible study nga maintiendihan ang isa ka punto, ano ang puede mo himuon?

Kon nabudlayan sia gihapon nga maintiendihan ang isa ka punto bisan pa ginpaathag mo ini sing maayo gamit ang Biblia, laktawi lang ini anay kag baliki ini sa ulihi.—w25.09, p. 24.

Ang Biblia nagasiling nga may “madaya nga gahom” ang sala. (Heb. 3:13) Ano ang buot silingon sini?

Ginasulay kita sang sala nga maghimo sing malain. Isa man ini sa posible nga rason kon ngaa pirme kita nagaduhaduha kon bala palangga kita ni Jehova.—w25.10, p. 16.

Ano ang tatlo ka butang nga makabulig sa aton para mangin tinagipusuon pa gid ang aton mga pangamuyo?

(1) Pamalandungan naton ang mga kinaiya ni Jehova. (2) Hunahunaon naton kon ano ang aton problema kag sambiton naton ini. Halimbawa, posible nabudlayan kita nga patawaron ang iban. (3) Indi kita magdali sa aton pagpangamuyo. Makabulig ini para mapabutyag naton kon ano gid ang aton ginabatyag.—w25.10, p. 19-20.

Paano naton mabuligan ang mga tigulang?

Puede naton sila bisitahan ukon tawgan. Puede man naton sila updan kon magpadoktor sila. Ukon updan naton sila sa lainlain nga paagi sang pagministeryo.—w25.11, p. 6-7.

Ano ang mga dapat himuon para makapadungog kay Jehova ang isa ka kasal?

Kompletuha ang mga requirement sang gobierno. Tinguhai nga makita sa seremonya kag punsion ang mga kinaiya nga ginapatubas sang espiritu sang Dios. Dapat maugdang ang imo suksukon, kag likawi ang mga tradisyon nga ginapakamalaut sang Biblia. Mangin matinahuron kon nagaistorya parte sa plano sa kasal.—w25.12, p. 21-24.