Artificial Intelligence—Makabulig Ukon Makahalit?—Ano ang Ginasiling sang Biblia?

Sining karon lang, ang mga lider sang kalibutan, mga scientist, kag mga technologist nagkomento parte sa masarangan himuon sang artificial intelligence (ukon AI). Nagsiling sila nga madamo ini sang mahimo nga maayo, pero nagakabalaka sila kay puede man ini gamiton sa kalainan.

• “Subong, ang AI isa sa pinakamaayo nga teknolohiya, kay puede gid ini gamiton para mangin mas mahapos ang kabuhi sang tawo . . . Pero, puede man ini magdula sang seguridad kag magbutang sang aton kabuhi sa katalagman, magkuha sang aton privacy kag kinamatarong bilang tawo, kag magpahuyang sang aton pagsalig sa demokrasya.”—Kamala Harris, vice president sang United States, Mayo 4, 2023.

• “Mahimo mapauswag sang artificial intelligence (ukon AI) ang pag-atipan sa ikaayong lawas, pero posible nga may madala man ini nga halit sa aton lawas kag emosyon,” sulat sang grupo sang mga doktor halin sa bilog nga kalibutan nga ginapangunahan ni Dr. Frederik Federspiel, sa isa ka artikulo sang Mayo 9, 2023, sa BMJ Global Health.a

• “Puede gid magamit sang mga tawo ang AI para magpalapta sang sala nga impormasyon. Sa indi madugay, mahimo nga amo na ini ang magatrabaho gani madulaan na sang obra ang mga tawo. Ang pila ka eksperto sa teknolohiya nagakabalaka nga sa palaabuton posible mahalitan gid sang AI ang mga tawo.”—The New York Times, Mayo 1, 2023.

Sa pagligad sang tion, mabal-an pa gid kon bala gamiton sang mga tawo ang AI para sa kaayuhan ukon para sa kalainan. Ano ang ginasiling sang Biblia?

Kon ngaa wala sing kasiguruhan ang mga panikasog sang tawo

Ginasugid sang Biblia kon ngaa indi masigurado sang mga tawo nga ang ila bag-o nga mga teknolohiya gamiton lang sa maayo.

1. 1. Bisan pa maayo man ang intension sang mga tawo, posible nga indi nila makita kon ano ang indi maayo nga epekto sang ila imbension.

   • “May dalanon nga daw husto sa pagtamod sang tawo, apang ang padulungan gali sini kamatayon.”—Hulubaton 14:12.

2. 2. Wala sing kontrol ang isa ka tawo kon bala gamiton sang iban sa maayo ukon sa malain ang iya imbension.

   • ‘Dapat ko ibilin [ang akon hinimuan] sa tawo nga masunod sa akon. Kag sin-o ang nakahibalo kon bala mangin maalamon sia ukon buangbuang? Wala sapayan sina, sia gihapon ang magadumala sang tanan ko nga ginpangabudlayan sa bug-os ko nga kusog kag kaalam sa idalom sang adlaw. Wala man ini sing pulos.’—Manugwali 2:18, 19.

Bangod sini, maathag nga kinahanglan naton ang giya halin sa aton Manunuga.

Ang dapat naton saligan

Ang aton Manunuga nagapromisa nga indi niya pagtugutan ang mga tawo ukon ang bisan ano nga teknolohiya nga ginhimo sang tawo, nga magguba sang duta ukon maghalit sa mga tawo.

• “Ang duta nagapabilin tubtob sa wala sing katubtuban.”—Manugwali 1:4.

• “Ang mga matarong magapanubli sang duta, kag magapuyo sila sa sini sa wala sing katubtuban.”—Salmo 37:29.

Paagi sa Biblia, ang aton Manunuga nagahatag sa aton sang giya para mangin malinong kag sigurado ang aton palaabuton. Para sa dugang nga impormasyon parte sa ginasiling sang Biblia, basaha ang mga artikulo nga “May Masaligan Bala nga Giya Para sa Maayo nga Palaabuton?” kag “Makalaum Kita nga Mangin Maayo ang Aton Sitwasyon sa Palaabuton.”