2023: Tuig nga Nagresulta sa Kabalaka sang Madamo nga Tawo—Ano ang Ginasiling sang Biblia?

Sang 2023, madamo gid sang natabo sa bilog nga kalibutan ang nagapakita nga nagakabuhi na kita sa tion nga ginatawag sang Biblia nga “katapusan nga mga adlaw.” (2 Timoteo 3:1) Tan-awon naton kon paano ang mga nagakatabo sa aton palibot pareho gid sa ginasiling sang Biblia nga matabo sa aton tion subong.

Ang Biblia kag ang mga hitabo sa bilog nga kalibutan

“Mga inaway sa nagkalainlain nga lugar.”—Mateo 24:6.

• “Nagalala pa gid ang mapintas nga inaway sa madamo nga lugar sa kalibutan.”a

“Mga linog sa nagkalainlain nga lugar.”—Marcos 13:8.

• “Halin sa umpisa sang 2023, may 13 na ka linog nga sobra sa magnitude 7 ang natabo sa bilog nga kalibutan, isa sa pinakamataas nga narekord halin sang una.”b

“Makahaladlok nga mga talan-awon.”—Lucas 21:11.

• “Natapos na ang panahon sang global warming. Panahon na subong sang global boiling.”—António Guterres, UN secretary-general.c

“Kakulang sa pagkaon.”—Mateo 24:7.

• “2023: Isa naman ka tuig nga grabe ang problema para sa mga nabudlayan magpangita sang pagkaon para sa ila pamilya.”d

“Makahalanguyos nga mga tion nga mabudlay atubangon.”—2 Timoteo 3:1.

• “Isa sa walo ka tawo sa bilog nga kalibutan ang may problema sa mental health.”e

Ano ang mapaabot naton sa 2024?

Wala sang makasigurado kon ano ang matabo sa 2024. Pero ang mga nagakatabo sa bilog nga kalibutan nagapakita nga malapit na lang buslan sang Ginharian sang Dios ukon gobierno sa langit, ang gobierno sang mga tawo kag dulaon ang tanan nga rason sang pag-antos kag kabalaka.—Daniel 2:44; Bugna 21:4.

Samtang ginahulat naton ini, kag kon nagakabalaka kita, makasalig kita sa bulig sang Dios. Ang Biblia nagasiling:

“Sa tion nga nahadlok ako, nagasalig ako sa imo.”—Salmo 56:3.

Paano naton mapakita nga nagasalig kita sa Dios? Ginaagda ka namon nga tun-an pa gid ang promisa sa Biblia parte sa isa ka palaabuton nga wala na sang pag-antos. Testingi ang amon libre kag interactive nga pagtuon sa Biblia para mabal-an mo kon paano ka makabenepisyo kag ang imo pamilya sa mga promisa sa Biblia.