Photo by Zhai Yujia/China News Service/VCG via Getty Images
PADAYON NGA MAGBANTAY!
Makahalalit nga Baha—Ano ang Ginasiling sang Biblia?
Sa bilog nga kalibutan, madamo nga tawo ang nahalitan sang grabe nga baha. Binagbinaga ini nga mga report:
“Sang nagligad nga pila ka adlaw, ginrekord ang pinakamabunok nga ulan sa sulod sang halos 140 ka tuig sa kapital sang China sang ginwaswasan ini sang ulan nga may kataason nga . . . 744.8 ka milimetro (29.3 ka pulgada) halin sang Sabado asta sang Mierkoles.”—AP News, Agosto 2, 2023.
“Sang Huebes, duha ka adlaw na nga nagdala sang mabunok nga ulan kag mabaskog nga hangin sa bagatnan sang Japan ang bagyo nga Khanun, nga nagpatay sang indi magnubo sa duha ka tawo. . . . Ang bagyo ginapaabot nga magaresulta sa pag-ulan nga may kataason nga asta sa 0.6 ka metro sa kabukiran sang central Taiwan.”—Deutsche Welle, Agosto 3, 2023.
“Ang baha sang weekend [sa Nova Scotia] resulta sang pinakamabunok nga ulan sa Atlantic Canada sa sulod sang 50 ka tuig.”—BBC News, Hulyo 24, 2023.
Ano ang ginasiling sang Biblia parte sa sini nga mga hitabo?
Tanda sang “katapusan nga mga adlaw”
Ginapakita sang Biblia nga nagakabuhi na kita sa tion nga ginatawag “katapusan nga mga adlaw.” (2 Timoteo 3:1) Gintagna ni Jesus nga sa aton tion, makakita kita sang “makahaladlok nga mga talan-awon,” ukon makakululba nga mga hitabo. (Lucas 21:11) Ang pagbag-o sang klima nagresulta sa makakululba kag indi mapaktan nga pagbag-o sang tiempo, nga mas nagalala na gid kag pirme na nagakatabo.
May rason para maglaum
Ginasugid sa aton sang Biblia nga bisan pa madamo sang makahaladlok nga nagakatabo sa duta subong, may rason para maglaum. Ngaa? Si Jesus nagsiling: “Kon makita ninyo nga nagakahanabo ini, mahibaluan ninyo nga malapit na ang Ginharian sang Dios.”—Lucas 21:31; Mateo 24:3.
Ginapakita sang mga nagakatabo subong nga malapit na kontrolon sang Ginharian sang Dios ang natural nga mga puersa sa duta, lakip na ang water cycle.—Job 36:27, 28; Salmo 107:29.
Para mahibaluan ang dugang nga impormasyon kon paano solbaron sang Ginharian sang Dios ang mga problema sa aton duta, tan-awa ang artikulo nga “Sin-o ang Magasalbar sa Duta?”