Ngaa Wala Kamo Nagaselebrar sang Easter?

Sayop nga mga pagpati

Pagpati sang iban: Wala nagaselebrar sang Easter ang mga Saksi ni Jehova bangod indi sila Cristiano.

Kamatuoran: Nagapati kami nga si Jesucristo ang amon Manluluwas, kag ginahimo namon ang amon masarangan para ‘masunod sing maayo ang iya mga tikang.’—1 Pedro 2:21; Lucas 2:11.

Pagpati sang iban: Wala kamo nagapati nga si Jesus ginbanhaw.

Kamatuoran: Nagapati kami nga ginbanhaw si Jesus; ginakilala namon ini subong importante nga bahin sang pagtuo sang mga Cristiano kag ginatudlo namon ini sa amon pagwali.—1 Corinto 15:3, 4, 12-15.

Pagpati sang iban: Indi kamo gusto nga mag-enjoy ang inyo kabataan sa pagselebrar sang Easter.

Kamatuoran: Palangga gid namon ang amon kabataan—ginatinguhaan gid namon nga hanason sila kag buligan nga magmalipayon.—Tito 2:4.

Ngaa wala nagaselebrar sang Easter ang mga Saksi ni Jehova?

• Ang selebrasyon sang Easter wala nabase sa Biblia.

• Nagsugo si Jesus nga selebrahon ang iya kamatayon, indi ang iya pagkabanhaw. Ginaselebrar namon ining Memoryal kada tuig sa anibersaryo sang iya kamatayon suno sa lunar nga kalendaryo sang Biblia.—Lucas 22:19, 20.

• Nagapati kami nga ang kustombre sang Easter, nga naghalin sa ritwal sang pertilidad sadto, wala nahamut-an sang Dios. Ang Dios ‘indi gid gusto nga may ginasimba nga iban’ kag naakig sia kon simbahon sia sa paagi nga wala niya nahamut-an.—Exodo 20:5, Ang Pulong sang Dios, APD; 1 Hari 18:21.

Nagapati kami nga ang amon desisyon nga indi magselebrar sang Easter nabase gid sa Biblia, nga nagalaygay sa aton nga gamiton ang “kaalam kag ihibalo sa pagdesisyon sing husto” imbes nga magsunodsunod lang sa tradisyon sang tawo. (Hulubaton 3:21, APD; Mateo 15:3) Kon may nagapamangkot, ginasugid namon sa iban ang amon pagpati parte sa Easter, pero ginarespeto namon ang kinamatarong sang kada isa sa pagdesisyon.—1 Pedro 3:15.