Ang Shroud of Turin Bala ang Tela nga Ginputos kay Jesus sang Ginlubong Sia?

Ang sabat sang Biblia

Ang Shroud of Turin indi mabasa sa Biblia. Isa ini ka linen nga tela nga ginapatihan sang madamo nga ginputos kay Jesucristo sang ginlubong sia. Bangod sini nga pagpati, ginatamod sang iban ang shroud nga isa sa sagrado gid nga butang sang Cristiandad. Makita subong sa katedral sa Turin, Italy, ang shroud nga naproteksionan gid sing maayo.

May rekord bala sa Biblia nga nagasuporta nga matuod ang Shroud of Turin? Wala.

Binagbinaga ang tatlo ka aspekto sang shroud nga lain sa ginasiling sang Biblia.

1. Ang shroud isa ka tela nga nagalaba sing 442 ka sentimetros, kag nagalapad sing 113 ka sentimetros kag ginsugpunan sing 8 ka sentimetros nga tela palaba.

   Ang ginasiling sang Biblia: Ang patay nga lawas ni Jesus ginputos, indi sang isa lang ka tela, kundi sang mga tela. Lain nga tela ang ginsambod sa iya ulo. Sa tapos nabanhaw si Jesus, ang isa sa iya mga apostoles nagkadto sa lulubngan kag ‘nakita niya ang mga tela nga linen.’ Nagsiling pa ang Biblia: “Ang tela nga ginsambod sa ulo ni Jesus wala nahamtang upod sa mga tela nga linen kundi nabalulon ini.”—Juan 20:6, 7.

2. Ang shroud may mga mantsa nga ginapatihan nga dugo sang patay nga wala mahugasan.

   Ang ginasiling sang Biblia: Sang napatay si Jesus, ginhanda sang iya mga disipulo ang iya bangkay “suno sa kinabatasan sang mga Judiyo sa paglubong.” (Juan 19:39-42) Lakip sa sini nga kinabatasan amo ang pagpaligo sa bangkay kag pagbubo sang lana kag mahamot nga mga tanom antes ini ilubong. (Mateo 26:12; Binuhatan 9:37) Gani mahimo gid nga ginpaliguan sang mga disipulo ni Jesus ang iya lawas antes nila ini ginputos sang mga tela.

3. Ang shroud may larawan sang atubang kag likod sang tawo nga nagahigda siling sang Encyclopædia Britannica.

   Ang ginasiling sang Biblia: Gin-istoryahan sang mga disipulo ni Jesus ang iya kamatayon, ang iya lulubngan, kag ang ginsugid sang mga babayi nga may “nakita sila nga mga anghel, nga nagsiling nga buhi si Jesus.” (Lucas 24:15-24) Kon ang shroud ara sa lulubngan ni Jesus, sigurado nga istoryahan ini sang iya mga disipulo kag ang larawan sini. Pero, wala ginsambit sa Biblia nga gin-istoryahan nila ang parte sini.

Dapat bala simbahon ang shroud?

Indi. Bisan pa matuod ini, sala gihapon nga simbahon ini. Binagbinaga ang mga prinsipio sa Biblia nga nagapaathag sang rason.

1. Indi ini kinahanglan. Si Jesus nagsiling: “Ang Dios Espiritu, kag ang mga nagasimba sa iya dapat magsimba sa espiritu kag kamatuoran.” (Juan 4:24) Ang matuod nga pagsimba wala nagagamit sang relihioso nga mga butang ukon sang imahen.

2. Ginadilian ini. Ang Napulo ka Sugo nagadumili sa pagsimba sa mga diosdios. (Deuteronomio 5:6-10) Nagsugo man ang Biblia sa mga Cristiano: “Magbantay kamo batok sa mga diosdios.” (1 Juan 5:21) Mahimo magsiling ang iban nga ang shroud indi man isa ka diosdios kundi isa ka imahen, ukon simbulo, sang ila pagtuo. Pero, ang isa ka imahen mangin diosdios sang tawo nga nagasimba sini.a Gani kon gusto sang isa nga mapalipay ang Dios, indi gid sia magsimba sa bisan ano nga butang, lakip sa shroud.