Kahulugan sang Balita
“Indi sa Panulok”
Ginlig-on sang ulihi nga sientipikong mga pagtilaw nga ang Shroud of Turin isa ka ika-14 ka siglo nga huwad. Apang, “ang mga Katoliko ginpalig-on nga padayunon ang ila pagsimba sa shroud ukon tabon sa bangkay subong laragway nga imahen ni Cristo, nga makasarang gihapon sa paghimo sing mga milagro,” report sang The New York Times. Si Anastasio Ballestrero, ang arsobispo sang Turin, nagsiling: “Ang tumalagsahon nga nagahatag sing gahom nga imahen ni Jesucristo dapat tipigan.”
Ano ang kahulugan sini? Nagakahulugan ini nga bisan pa ginbaton sang iglesia nga ang namantsahan nga imahen sang lawas sang tawo sa shroud indi iya ni Jesucristo, ang debotado nga mga Katoliko walay sapayan dapat magpadayon sa pagtamod sini subong nga daw iya ni Cristo kag busa isa ka butang nga balaan. Ngaa? Suno kay Adam Otterbein, isa ka Katoliko Romano nga pari nga nagadumala sang Holy Shroud Guild, ang mga relikya kaangay sang shroud nagabulig sa mga matinuohon sa paghatag sing dungog sa isa nga ginarepresentar sang imahen.
Indi makakilibot nga, walay sapayan sang pagkadimasaligan sini, ang shroud padayon nga isa ka makusog nga simbulo sang pagtuo para sa Iglesia Katolika. “Ang mga estatwa, mga painting kag mga imahen . . . ginahatagan sing talahuron nga duog sa Katolikong batasan,” siling sang The New York Times.
Ginasakdag bala sang Biblia ang paggamit sinang mga imahen sa pagsimba? Wala! Ang Pulong sang Dios maathag nga nagasiling: “Likawi ang idolatriya.” (1 Corinto 10:14; ipaanggid ang Exodo 20:4-6.) Ang mga Cristiano ginlaygayan nga magsimba sa Dios “sa espiritu kag kamatuoran,” indi paagi sa bulig sang pila ka imahen ukon relikya. (Juan 4:24) Sing nagakaigo, si Pablo nagsulat nga ang matuod nga mga Cristiano “nagalakat sa pagtuo, indi sa panulok.”—2 Corinto 5:7.
Sayop nga Panghunahuna
Nahisuno sa kitaon nga huyog tuhoy sa paghalog sang mga talaksan sang Biblia sa tunga sang mga relihionista, “nagadugang nga mga teologo sa E.U. ang nagabais nga ang Cristianong mga iglesia nagakinahanglan sing seksuwal nga pagbalhin,” report sang Star Tribune. Ining pamantalaan sa Minnesota nagasitar sang mga pagtamod nga ginasakdag sang mga kilala subong ni John Spong, ang obispo sang Newark para sa Episcopal Church of America, kag ni James Nelson, isa ka eksperto sa etika sa sekso sang United Theological Seminary sa New Brighton. Ang pamantalaan nagasiling nga sila kag ang iban pa nga mga teologo nagapati nga ang mga iglesia dapat “magbendisyon sa duha ka homoseksuwal sa mga seremonya sang iglesia, nagakilala sang ila pagsumpaanay sa isa ka mahigugmaon kag moral nga relasyon; . . . nagahatag sa lamharon nga nagsumpaanay nga mga adulto sing bendisyon sang iglesia kon sila nagakabuhi sa mahigugmaon, nagsumpaanay nga mga relasyon, bisan indi kasal”; kag “nagatugot kon ang hamtong nga mga adulto seksuwal nga aktibo sa makatarunganon nga mga paagi, bisan pa indi kasal sa isa kag isa.” Ngaa ining mga teologo nagapati nga kinahanglan inang mga pagbalhin? Si Spong nagasiling nga “ginahatag namon ang amon pagtugot sa salamwanan nga pagkabuhi” kon inang pag-updanay wala ginbendisyonan.
Apang, ang wala matalupangdi ni Spong kag sang iban pa amo nga ini mismo nga pagbendisyon sa sinang mga pag-updanay ang nagapatok sa pagtugot sang mga iglesia sa sinang “salamwanan nga pagkabuhi.” Ang Pulong sang Dios maathag. “Ang makihilawason, . . . mga makihilahion, . . . mga lalaki nga nagahulid sa mga lalaki . . . indi makapanubli sang ginharian sang Dios.” Ang mga sumulunod ni Cristo wala lamang pagsugua nga “indi magpakig-upod” sa ila kundi ginsugo man nga “isikway ang tawo nga malaut” sa tunga nila.—1 Corinto 5:11, 13; 6:9-11.
Isa ka Daku nga Kinahanglanon
Sini nga tuig, ang estadistika nga report sang Free Church Federal Council sang Britanya nagpakita sing dugang nga pagnubo sa iya 15 ka miembro nga denominasyon. Sa nahauna nga tion, ang katapo nagnubo sing ubos sa isa ka milyon, report sang Church Times, pamantalaan sang Church of England. Ang rason? Bisan pa nga ang iglesia nagasiling nga may katungdanan sila sa “kalabanan . . . nga ang daku nga kinahanglanon amo ang paggawad,” ang artikulo nagasiling nga “ang Free Churches padayon nga nagahugod sing daku katama nga tion kag enerhiya sa . . . sosyal nga mga hilikuton.” Suno sa Church Times, “kon ang Iglesia nagausmod, indi ini bangod kay ang ila tuigan nga perya wala magmadinalag-on ukon nga ang ila dramatiko-sosiedad nga mga produksion wala pagsakdaga: bangod ini kay wala nila pagkabiga ang ila ministeryo sang paggawad sing serioso katama.”
Ang relihiosong mga lider sang panahon ni Jesus wala man magkabig sang ila ministeryo sing serioso. Makatarunganon sila nga ginmulay ni Jesus bangod ‘ginpakawalay pulos nila ang pulong sang Dios’ bangod sang ila mga tradisyon. Nagsiling sia nga sila mga salimpapaw, nga ‘nagatahod sang Dios sa ila mga bibig apang ang tagipusuon nila malayo sa akon.’—Marcos 7:6, 7, 13.
Apang, ang matuod nga mga ministro ni Jehova nga Dios debotado “sa ministeryo sang pulong.” Ginakabig nila sing serioso ang mando nga ‘maghimo sing mga disipulo,’ kag ginasunod nila ang halimbawa sang mga apostoles, nga “wala sila mag-untat sa pagpanudlo kag pagwali nahanungod kay Cristo.” Sa matuod nga mga Cristiano, ini nga hilikuton importante gid katama.—Binuhatan 5:42; 6:4; Mateo 28:19, 20.