Nakatuon Sia sa mga Priso

Sang 2011, ang isa ka tawo halin sa Eritrea nagkadto sa Norway bilang refugee. Sang naistorya sia sang mga Saksi ni Jehova sa Norway, ginsugiran niya sila nga may nakilala sia nga mga Saksi sang didto pa sia sa Eritrea. Ginsugid niya nga sang soldado pa sia sa Eritrea, nakita niya nga ang mga Saksi didto nga ginpriso bangod sang ila pagtuo padayon nga nagapangindi nga magsoldado, bisan pa ginapintasan sila.

Pero gulpi lang nagbag-o ang sitwasyon, kag ini nga tawo napriso. Sa prisuhan, nakaupod niya ang tatlo ka Saksi—si Paulos Eyasu, si Negede Teklemariam, kag si Isaac Mogos—nga ginpriso halin pa sang 1994 bangod sang ila pagtuo.

Sa prisuhan, nasaksihan mismo sini nga tawo nga ginahimo gid sang mga Saksi ni Jehova ang ila ginatudlo sa iban. Nakita niya nga honest gid sila kag ginahatagan pa gani nila sing pagkaon ang iban nga mga priso. Natalupangdan niya nga updanay ang mga Saksi nga nagatuon sing Biblia kada adlaw kag ginaagda nila ang iban nga mag-upod sa ila. Kon ginatanyagan sila nga makagua basta mapirma lang sila nga ginapanghiwala na nila ang ila pagtuo, nagapangindi sila.

Ining eksperiensia nagtandog gid sa sini nga tawo, amo nga pagsaylo niya sa Norway, gusto niya mabal-an kon ngaa mabakod gid ang pagtuo sang mga Saksi ni Jehova. Sang nakadtuan na sia sang mga Saksi didto, nagsugod sia dayon sa pagtuon sa Biblia upod sa ila kag nagtambong sa ila mga miting.

Sang Septiembre 2018, nabawtismuhan sia bilang isa sa mga Saksi ni Jehova. Ginagamit niya subong ang tanan nga kahigayunan nga mapanaksihan ang mga tawo sa Eritrea kag Sudan para palig-unon sila nga magtuon sa Biblia kag magbakod man ang ila pagtuo.