Ang Huni sang Japanese Tree Frog

Kilala ang laki nga mga Japanese tree frog sa ila sulitsulit kag daw pataka lang nga huni. Pero, makilal-an ang kada laki bisan pa ara sila sa magahod nga grupo sang mga paka. Sa Japan, nadiskobrehan sang mga researcher nga nagatuon sang mga paka nga bangod ini sa organisado gid nga paagi sang paghuni nga ginahimo sang laki nga mga paka sa isa ka lugar para tawgon ang bayi nga mga paka.

Binagbinaga: Ang laki nga mga Japanese tree frog nagahuni para magpalapit ang bayi nga mga paka. Nagahalin ang huni sa vocal cords sang paka kag nagabaskog pa gid ini sa ila vocal sac, nga isa ka nagahabok nga daw puyopuyo sa ila tutunlan.

Paano makilal-an ang huni sang isa ka laki nga paka sa huni sang iban nga laki nga mga paka? Natun-an sang mga researcher nga imbes pataka nga maghuni, ang mga Japanese tree frog nga lapitanay nagabulosbulos sa paghuni. Bangod sini nga pamaagi, malikawan sang mga paka ang paghuni sing dululungan, gani maathag nga mabatian ang pagpanawag sang kada paka kag makakinot sila sang enerhiya. Dugang pa, paagi sa pagpasunod sang ila huni, indi kinahanglan nga sigesige ang ila pagpanawag.

Nagdayaw gid ang mga researcher sang wireless communications kon paano nagabulosbulos sa pagpanawag ang mga Japanese tree frog. Gani, nagagamit sila sang advance nga mga kalkulasyon para mapanami ang pagpadala sang mga data kag indi ini magdulungan sa iban nga data nga ginapadala. Bilang resulta, mas madasig ang pagpadala sang mga data kag mas makinot ini sa enerhiya.

Ano sa banta mo? Ang ikasarang bala sang mga Japanese tree frog sa pagbulosbulos sa paghuni resulta sang ebolusyon? Ukon gindesinyo ini?