Mga Pamangkot Gikan sa mga Bumalasa
◼ Ginsilingan ni Moises ang mga Israelinhon nga “ang mga butang nga napahayag aton kag sa aton mga anak sa gihapon.” (Deuteronomio 29:29) Ining “butang nga napahayag” nagalakip bala sa kapawa nga ginahatag sa Pulong sang Dios sa sining katapusan nga mga adlaw?
Wala, indi husto nga ang paghangop sa mga tagna nga ginahatag naton sa sining katapusan nga mga adlaw mangin kaangay sa “mga butang nga napahayag” nga ginahambal ni Moises.
Suno sa konteksto sang ginsiling ni Moises, ang “mga butang nga napahayag” nga ginhambalan niya may kahilabtanan sa Kasugoan nga katipan. (Deuteronomio 29:25) Ginpakita ni Moises nga ining “mga butang nga napahayag” nagadala sing mga responsabilidad. Ang indi pagtuman sa sining mga responsabilidad nagtiklod sa pagdisiplina ni Jehova sa iya katawhan.
Sa pagkamatuod, ang Kasugoan nga katipan, isa ka pagpahayag halin kay Jehova nga Dios. Ginsundan sini ang iban pa nga mga pagpahayag sa mga patriarka, kay Noe, kag tubtob pa kay Adan. Gingamit si Moises sa pagsulat sang mga butang nga napahayag tubtob sa panahon niya, kag gintipigan ini para sa aton sa nahaunang lima ka tolon-an sang Biblia. Sang ulihi, subong ginapaathag sang artikulo nga “Ang mga Butang nga Napahayag Aton” (Ang Lalantawan, Mayo 15, 1986), ining “mga butang nga napahayag” naglakip sa tanan nga impormasyon nga narekord sa Biblia.—2 Timoteo 3:16.
Busa, ang Biblia nagaunod sang “balaan nga pinamulong sang Dios,” ang mga butang nga ginpahayag paagi sa iya. (Roma 3:2) Sang ang kinaugali nga mga Judiyo nangin dimatutom, ang hinaplas nga mga Cristiano nangin mga tulugyanan sining “mga butang nga napahayag,” kag ang Cristianong kongregasyon nangin “haligi kag pamakud” para sa ila. (1 Timoteo 3:15; 1 Corinto 4:1) Gani, ang mga katapo sina nga kongregasyon karon nagakabagay nga makapalanog sang pinamulong ni Moises, nga “ang mga butang nga napahayag aton.”
Sa karon, ginhatagan ni Jehova sing kapawa ining “mga butang nga napahayag.” Subong sang gintagna ni Daniel, ang katawhan ni Jehova ‘nagdalagan pakadto-pakari’ sa inspirado nga Pulong, kag ang ‘matuod nga ihibalo magabugana.’ (Daniel 12:4) Busa, nakilala naton karon ang “iban nga mga karnero.” (Juan 10:16) Nakilala naton ang “dakung kadam-an.” (Bugna 7:9-17) Nakita naton ang katumanan sang parabola nahanungod sa mga karnero kag mga kanding. (Mateo 25:31-46) Ina nga mga butang ginsugid, ukon ginpahibalo, sa aton apang indi sa kahulugan sang “mga butang nga napahayag” subong sang narekord sa inspirado nga Pulong ni Jehova.
Busa, indi husto nga hangpon ina nga pag-uswag nga pareho sa inspirado nga mga pagpahayag nga nagahuman sang “mga butang nga napahayag” nga narekord sa Biblia. Sa baylo, paagi sa maid-id nga pagtuon sang Biblia, mapangamuyuon nga ginapangita sang katawhan ni Jehova ang husto nga paghangop sa sinang “mga butang nga napahayag.” Si Jehova, paagi sa balaan nga espiritu, nagahatag sina nga paghangop sa iya gintangdo nga tion.
Ang Biblia nagasiling nga “ang banas sang matarong kaangay sang masanag nga kapawa nga nagasilak sing labi kag labi tubtob mahimpit ang adlaw.” (Hulubaton 4:18) Ang dugang nga kapawa nga ginasilak ni Jehova sa “mga butang nga napahayag” nagapakita nga ina nga “adlaw” malapit na kaayo, kag nagapamatuod nga ang iya pagpakamaayo yara sa Cristianong kongregasyon karon.