7 Ginapamatian Bala kag Ginasabat sang Dios ang Pangamuyo?

SARISARI ang sabat sa sini nga pamangkot. Suno sa Biblia, si Jehova nagapamati sa mga pangamuyo. Pero, depende sa aton ginahimo kon bala pamatian niya kita ukon indi.

Ginpakamalaut ni Jesus ang mga lider sang relihion sadto nga nagapakitakita kon mangamuyo para kuno abi matarong sila tan-awon. Nagsiling sia nga “nabaton na nila ang ila bug-os nga padya.” Buot silingon, ang ila lang mabaton amo ang ginapangita nila nga atension sang mga tawo, pero indi gid sila pagpamatian sang Dios. (Mateo 6:5) Subong, ginapangamuyo man sang madamo ang ila lang gusto, imbes nga ang kabubut-on sang Dios. Wala nila ginatuman ang ginasiling sang Biblia, gani indi sila pagpamatian sang Dios.

Kamusta sa imo bahin? Ginapamatian man bala kag ginasabat sang Dios ang imo pangamuyo? Wala niya ginatan-aw ang imo rasa ukon tindog sa pangabuhi. Ang Biblia nagapasalig sa aton: “Ang Dios wala sing ginapasulabi, apang sa tagsa ka pungsod ang tawo nga nagakahadlok sa iya kag nagahimo sang pagkamatarong kalahamut-an sa iya.” (Binuhatan 10:34, 35) Amo ka man bala sini? Kon may kahadlok ka sa Dios, mataas katama ang imo pagtan-aw sa iya kag nahadlok ka nga maakig sia. Kon nagatinguha ka nga mangin matarong, ginatuman mo ang Dios imbes nga ang imo gusto ukon ang iya sang iban. Gusto mo gid bala nga pamatian sang Dios ang imo pangamuyo? Buligan ka sang Biblia nga mahimo ini.a

Gusto sang iban nga magmilagro ang Dios para sabton ang ila pangamuyo. Pero, bisan sa panahon sang Biblia, malaka lang nagamilagro ang Dios. Kon kaisa, ginatos pa ka tuig ang lang-at. Isa pa, suno sa Biblia, wala na sing milagro sang patay na ang mga apostoles. (1 Corinto 13:8-10) Buot bala silingon, wala na subong ginasabat sang Dios ang pangamuyo? Indi! Binagbinaga ang pila ka pangamuyo nga ginasabat sang Dios.

Ang Dios nagahatag sing kaalam. Si Jehova amo lamang ang Ginahalinan sang matuod nga kaalam. Maalwan sia kay ginahatagan niya sing kaalam ang mga nagapagiya kag nagasunod sa iya.—Santiago 1:5.

Ang Dios nagahatag sing balaan nga espiritu kag sang tanan nga kaayuhan sini. Ang balaan nga espiritu amo ang aktibo nga puersa sang Dios. Amo ini ang pinakamakusog nga puersa. Makabulig ini sa aton nga mabatas ang mga kabudlayan, matigayon ang kalinong, kag matun-an ang maayo nga mga kinaiya. (Galacia 5:22, 23) Ginapasalig ni Jesus ang iya mga sumulunod nga maalwan ang Dios sa paghatag sini.—Lucas 11:13.

Ang Dios nagahatag sing kasanagan sa mga nagapangita sini. (Binuhatan 17:26, 27) Sa bilog nga kalibutan, may mga tawo nga nagapangita gid sing kamatuoran. Gusto nila mahibaluan ang parte sa Dios—ang iya ngalan, ang iya katuyuan para sa duta kag sa mga tawo, kag kon paano mangin suod sa iya. (Santiago 4:8) Ang mga Saksi ni Jehova pirme makaistorya sang amo sini nga mga tawo, kag nalipay sila nga isugid ang ginasiling sang Biblia parte sa Dios.

Siguro amo man sini ang rason kon ngaa ginbasa mo ini nga magasin. Ginapangita mo man bala ang Dios? Mahimo amo na ini ang iya sabat sa imo mga pangamuyo.