Mga Pamangkot Gikan sa mga Bumalasa

◼ Direkta bala nga naghambal si Jehova nga Dios kay Adan, ukon naghambal bala sia paagi sa Pulong, ang bugtong nga Anak sang Dios?

Wala nagahatag sa aton ang Biblia sing pat-od nga sabat sa sini nga pamangkot. Samtang mahimo naghambal sing direkta ang Dios sa iya himpit nga tawhanon nga anak sa Eden, mahimo gid nga nagkomunikar Sia kay Adan paagi sa Pulong.

Ang Biblia pirme nagahambal tuhoy sa paghimo sang Dios sing mga butang samtang ang matuod ginhimo niya ini paagi sa isa ukon kapin pa nga mga anghel. Halimbawa, ang Genesis 1:1 nagasugid sa aton: “Sa ginsuguran gintuga sang Dios ang mga langit kag ang duta.” Kon amo lamang sina ang ginsiling sang Biblia nahanungod sa ginsuguran sang uniberso, mahinakop naton nga gintuga ini sang Dios sing direkta, nga subong bala paagi sa iya kaugalingon nga mga kamot. Apang, ginpadaku sang Cristianong Griegong Kasulatan ang aton paghangop. Aton mabasa: “Paagi sa [Anak sang Dios] ang tanan nga iban pa nga butang gintuga sa langit kag duta, ang makita kag ang dimakita . . . Ang tanan nga iban pa nga butang gintuga paagi sa iya kag tungod sa iya.” (Colosas 1:​16, 17) Ang iban pa nga teksto nagapamatuod sa papel sang Anak sa pagtuga sa uniberso. (Juan 1:​3, 10; Hebreo 1:​1, 2) Apang sa gihapon, ang iya papel isa ka manugpangabudlay nga nagapasakop kay Jehova, nga amo ang nag-umpisa, naghatag sing gahom, kag nagdiriher sang pagpanuga.​—⁠Salmo 19:⁠1.

Ang Dios nagsiling sa una nga tawo: “Makakaon ka sing hilway gikan sa tagsa ka kahoy sang hardin.” (Genesis 2:​16, 17) Wala magkinahanglan si Jehova sing mekanikal ukon elektroniko nga kasangkapan, subong sang mega­phone, ukon sing short­wave nga radyo. Subong sang ginsiling sang Ang Lalantawan sang Agosto 1, 1989: “Wala sing nakita ang tawo nga nagahambal. Ang tingog naghalin sa duog nga indi makita, kag sia ang ginahambal. Amo yadto ang tingog sang Magbubuhat sang tawo, ang iya Manunuga! . . . Wala nagkinahanglan ang tawo sing modernong sientipiko nga radio re­ceiv­er agod mabatian ang tingog sang Dios. Ang Dios nagpakighambal sa iya sing direkta.”

Naghambal bala ang Dios paagi sa isa ka anghel, ayhan Logos, nga nangin si Jesus? Posible ina. Bisan pa indi dogmatiko, si C. T. Russell nagsulat: “Si Jesus mahimo nga amo ang Tiglawas sang Dios sa Hardin sang Eden kay Adan.” (The Watch Tower, Pebrero 1, 1915) Ang panganay nga Anak sang Dios madugay na nga nagaalagad sa isa ka nabayaw nga katungdanan subong “Pulong,” ukon Humalambal sang iya Amay, sa mga anghel kag sa mga tawo. (Juan 1:​1; 12:​49, 50; Bugna 1:​1, 2) Gani bisan pa ang rekord sang Genesis nagapaalinton sang impresyon nga ang Dios direkta nga naghambal kay Adan nga isahanon sadto, wala ina nagapuwera sang Iya paghambal paagi sa isa ka anghel, lakip ang Pulong, ang langitnon nga Anak ni Jehova. Labi na nga subong gid sini kon binagbinagon naton nga gingamit ni Jehova ang Logos sa pagtuga sa tawo una sa tanan, kag ini sia ‘nalipay sa mga butang nga nagadalahig sa mga anak sang mga tawo.’​—⁠Hulubaton 8:​22, 31; Juan 1:⁠3.

Binagbinaga, halimbawa, ang okasyon sang magtaklad si Moises sa Bukid sang Sinai. Ang Exodo 19:​21-24 nagaasoy: “Si Jehova nagsiling karon kay Moises . . . Kag si Moises nagsiling kay Jehova . . . Apang, si Jehova nagsiling sa iya.” Nian ang rekord tuhoy sa paghatag sing Napulo ka Sugo ginpakilala sa sining paagi: “Ang Dios naghambal sini tanan nga pulong.” (Exodo 20:1) Nagapahangop bala ini nga ang Dios personal nga naghambal sang mga pulong sang Kasuguan? Ina nga impresyon may supurta kay ginasugiran kita nga ang Dios nakighambal kay Moises sing “nawong sa nawong.”​—⁠Exodo 33:⁠11.

May dugang pa nga nagapaathag sini. Si apostol Pablo nagsulat nahanungod sa Kasuguan: “Ginpaalinton ini sang mga anghel paagi sa kamot sang manugpatunga.” (Galacia 3:19) Sang ulihi, ispisipiko nga ginpatuhay ni Pablo ang mga tugon nga ginhatag sang Dios sa Kasuguan kag ang nabaton sang mga Cristiano paagi kay Jesus: “Kay kon ang pulong nga ginhambal paagi sa mga anghel nagmalig-on kag ang tagsa ka paglapas ukon pagkadimasinulundon nakabaton sing matarong nga tumbas . . . , paano bala ang paglikaw ta kon aton ginapatumbayaan ang tama kadaku nga kaluwasan nga ginhambal paagi sa aton Ginuong [Jesus] kag ginpamatud-an sa aton sang mga nakabati sa iya.” (Hebreo 2:​2, 3) Gani wala ginhambal sang Dios ang mga pulong sang Kasuguan paagi sa iya personal nga tingog, ukon gingamit niya ang Logos. Sa baylo, gingamit niya ang iban nga mga anghel.

Apang, ano ang sadsaran nga punto? Sa masami kon mabasa naton nga ang Dios nagahambal sa mga tawo, matalupangdan naton nga ginhimo niya ina paagi sa matinumanon nga espiritu nga mga tinuga nga naghambal para sa iya. (Ipaanggid ang Genesis 18:​2, 3, 33; 19:​1; Exodo 3:​2-4; Hukom 6:​11, 12, 20-22.) Ang ngalan ni Jesus subong Pulong nagapahangop nga sia ang masami nga ginagamit sang Dios sa pagpakighambal sa iya iban nga mga tinuga. Naglakip bala ina sa himpit nga anak sang Dios nga si Adan? Mahimo gid.​—⁠Lucas 3:⁠38.

Matuod nga sang ang Logos nagkari sa duta sang ulihi, ang Amay tatlo ka beses nga nagpakighambal sa iya agod nga makabati ining “katapusan nga Adan.” (1 Corinto 15:​45; Mateo 3:​16, 17; 17:​1-5; Juan 12:​28-30) Sa sining mga okasyon, ngaa pa abi maggamit ang Dios sing anghel sa paghambal sa ukon nahanungod sa iya hamili nga Anak? Makatarunganon gid nga si Jehova direkta nga naghambal; nabatian sang himpit nga Anak sang Dios, kag bisan sang dihimpit nga mga tawo sa malapit ang kaugalingon nga tingog sang Dios. Gani sang gintuga ang himpit nga tawo nga si Adan, mahimo nga ang iya mahigugmaon nga Amay direkta nga nakig-angot sa sining himpit nga bag-ong tinuga. Apang, bangod sang bag-o lang mapaathag, mahimo nga gingamit niya ang Pulong.