Roma 12:2—“Magbalhin Kamo Paagi sa Pagbag-o sang Inyo Painoino”

“Untati na ninyo ang pagpadihon sa mga dalanon sang katawhan sini nga sistema sang mga butang, kundi bag-uha na ninyo ang inyo panghunahuna, agod mapamatud-an ninyo sa inyo kaugalingon kon ano ang maayo kag kalahamut-an kag himpit nga kabubut-on sang Dios.”—Roma 12:2, Bag-ong Kalibutan nga Badbad.

“Dili kamo magpauyon sa sining kalibutan kondi magbalhin kamo paagi sa pagbag-o sang inyo painoino, agud nga inyo matilawan kon ano ang maayo kag kalahamut-an kag himpit nga kabubut-on sang Dios.”—Roma 12:2, Ang Biblia sang Philippine Bible Society.

Kahulugan sang Roma 12:2

Gusto sang madamo nga tawo nga mapalipay ang Dios. Pero para mahimo ini, dapat nila isikway ang indi maayo nga mga batasan kag bag-uhon ang ila personalidad. Wala sila ginapilit sang Dios nga magbag-o. Ginahimo nila ini bangod palangga nila sia kag kabalo sila nga ang iya mga sugo maayo, masarangan nila tumanon, kag para sa ila kaayuhan.—Isaias 48:17.

“Untati na ninyo ang pagpadihon sa mga dalanon sang katawhan sini nga sistema sang mga butang.” Ang “sistema sang mga butang” nga ginsiling diri amo ang mga tawo sa sini nga kalibutan lakip ang ila mga pagsulundan, paggawi, ginapatihan, kag mga batasan nga wala gid nahisuno sa mga kasuguan kag panghunahuna sang Dios. (1 Juan 2:15-17) Padayon sini nga ginaimpluwensiahan ang batasan kag panghunahuna sang mga tawo. Gani para batunon sang Dios ang pagsimba sang isa ka tawo, dapat niya batuan nga indi sia maimpluwensiahan sang kalibutan. Kay kon indi niya ini paghimuon, maimpluwensiahan sia sang malain nga mga paggawi nga makahalit sa iya kaugalingon kag makapaakig sa Dios.—Efeso 2:1-3; 4:17-19.

“Bag-uha na ninyo ang inyo panghunahuna.” Dapat man panikasugan sang isa nga padayon nga bag-uhon ang iya batasan kag balatyagon. Maathag nga isa gid ini ka daku nga pagbag-o base sa Griego nga tinaga nga gin-translate nga “bag-uha.” Ginalaragway sini ang pagbag-o nga nagakatabo sa isa ka atataro nga mangin alibangbang sa ulihi. Ang mga gusto magsimba sa Dios dapat magsuklob sang “bag-o nga personalidad.”—Efeso 4:23, 24; Colosas 3:9, 10.

“[Pamatud-i] ninyo sa inyo kaugalingon kon ano ang maayo kag kalahamut-an kag himpit nga kabubut-on sang Dios.” Gusto sang Dios nga ang mga nagasimba sa iya dapat kumbinsido gid sa ila ginapatihan. Ginahimo nila ini paagi sa pagtuon sa Pulong sang Dios, pag-aplikar sa ginatudlo sini, kag pagkabuhi suno sa mga kasuguan sang Dios para maeksperiensiahan nila ang kaayuhan sa pagsunod sa sini. Gani, napamatud-an nila sa ila kaugalingon nga ang pagtuman sa Dios amo gid ang pinakamaayo nga himuon.—Salmo 34:8.

Kaingod nga mga Teksto sang Roma 12:2

Ginapaathag sang kapitulo 12 kon ano ang dapat himuon sang isa ka tawo para batunon sang Dios ang iya pagsimba. Nalakip sa sini nga pagsimba ang tanan nga bahin sang kabuhi sang isa ka tawo. Dapat man niya gamiton ang iya “ikasarang sa pagpangatarungan” imbes nga magsunodsunod lang sa ginapatihan sang iban ukon sa sala nga balatyagon. (Roma 12:1, 3) Mabasa man sa sini nga kapitulo ang praktikal nga mga laygay kon paano mapakita sang isa ka tawo ang diosnon nga mga kinaiya, kon paano makigbagay sa iban, kag kon ano ang iya himuon kon himuan sia sing malain sang iban.—Roma 12:9-21.