Madinalag-on nga Likawi ang Siod sang Kakagod
“Ang mga determinado magmanggaranon nagakahulog sa pagsulay kag sa siod.”—1 TIMOTEO 6:9.
1. Ngaa dapat kita mabalaka sa mga siod?
ANG tinaga nga “siod” mahimo nga magapahanumdom sa imo sang isa ka mangangayam nga nagahimo sing nagapakunokuno nga kasangkapan agod dakpon ang wala nagasuspetsa nga dalakpon. Apang, maathag nga ginapakita sa aton sang Dios nga para sa aton ang labing makatalagam nga mga siod, indi ang subong sina nga literal nga mga kasangkapan, kundi ang mahimo magsiod sa aton sa espirituwal ukon sa moral. Eksperto ang Yawa sa paghimo sina nga mga siod.—2 Corinto 2:11; 2 Timoteo 2:24-26.
2. (a) Paano kita ginabuligan ni Jehova agod malikawan ang makatalagam nga mga siod? (b) Ano nga sahi sang partikular nga siod ang ginahatagan karon sing igtalupangod?
2 Ginabuligan kita ni Jehova paagi sa pagpakilala sang pila sang madamo kag nanuhaytuhay nga mga siod ni Satanas. Halimbawa, nagapaandam ang Dios nga ang aton mga bibig, ukon baba, mahimo mangin isa ka siod kon maghambal kita sing dimaalamon, padasudaso, ukon sang indi nagakadapat. (Hulubaton 18:7; 20:25) Ang bugal mahimo mangin isa ka siod, subong sang pag-upod-upod man sa mga tawo nga madali mangakig. (Hulubaton 22:24, 25; 29:25) Apang hambalan naton ang isa pa ka siod: “Ang mga determinado magmanggaranon nagakahulog sa pagsulay kag sa siod kag sa madamo sang walay pulos kag mahaliton nga mga kailigbon, nga nagatugdang sang mga tawo sa kalaglagan kag sa kahalitan.” (1 Timoteo 6:9) Ang butang nga yara sa likod sang siod ukon ang sadsaran sini sarang mabilog sa tinaga nga “kakagod.” Bisan pa ang kakagod masami nga ginapakita sang determinasyon sa pagmanggaranon, ang kakagod sa pagkamatuod isa ka siod nga may madamo nga mga bahin.
Si Jehova Nagapaandam sa Aton sang Katalagman
3, 4. Ano nga leksion nahanungod sa kakagod ang masapwan sa dumaan nga maragtas sang tawo?
3 Sa kabilugan, ang kakagod isa ka dinagakaigo ukon sobra nga handum sa pagtigayon sing dugang pa, kuwarta man ini, mga pagkabutang, gahom, sekso, ukon iban pa nga mga butang. Sa pagkamatuod, indi kita ang una nga yara sa katalagman nga masiod sang kakagod. Madugay na sa hardin sang Eden, nasiod sang kakagod si Eva kag dayon si Adan man. Ang bana ni Eva, nga mas eksperiensiado sa kabuhi sangsa iya personal nga gin-instruksionan ni Jehova. Ginhatagan sila sang Dios sing paraiso nga puluy-an. Makakaon sila sing bugana sang maayo kag nanuhaytuhay nga pagkaon, nga gintanom sa walay dagta nga duta. Makapaabot sila sa pagtigayon sing himpit nga mga anak, nga upod sa ila sila makakabuhi kag makaalagad sa Dios sing dayon. (Genesis 1:27-31; 2:15) Indi bala tuman na ina kuntani sa pagpaayaw sa bisan sin-o nga tawo?
4 Apang, ang tuman na nga butang nga yara sa isa wala nagapugong sa kakagod nga mangin siod. Nasiod si Eva sang posibilidad nga mangin kasubong sia sang Dios, may kapin nga kahilwayan kag makahimo sang iya kaugalingon nga mga talaksan. Daw subong bala nga indi luyag ni Adan nga madula ang iya matahom nga asawa, bisan ano man ang matabo. Sanglit bisan ining himpit nga mga tawo nasiod sang kakagod, sarang mo mahangpan kon ngaa ang kakagod mahimo man mangin katalagman para sa aton.
5. Daw ano ka importante para sa aton nga likawan ang siod sang kakagod?
5 Dapat kita magbantay batok sa pagsiod sang kakagod bangod si apostol Pablo nagapaandam sa aton: “Wala bala kamo makahibalo nga ang dimatarong nga mga tawo indi makapanubli sang ginharian sang Dios? Dili kamo magtalang. Bisan ang mga makihilawason, ukon mga diwatahan, ukon mga makihilahion, ukon babayinhon, ukon mga sodomanhon, ukon mga makawat, ukon makagod nga mga tawo . . . indi makapanubli sang ginharian sang Dios.” (1 Corinto 6:9, 10) Ginsugiran man kita ni Pablo: “Ang pagkamakihilawason kag ang tanan nga kahigkuan ukon kakagod dili gid pagsambiton sa inyo.” (Efeso 5:3) Gani indi dapat himuon nga topiko ang kakagod bisan sa paghambalanay lamang agod busgon ang aton dihimpit nga unod.
6, 7. (a) Ano nga mga halimbawa sa Biblia ang nagapadaku kon daw ano kabaskog mahimo mangin amo ang kakagod? (b) Ngaa dapat mangin paandam sa aton yadtong mga halimbawa?
6 Nagrekord man si Jehova sing madamo nga halimbawa agod paalistuhon kita sa katalagman sang kakagod. Dumduma ang kakagod ni Acan. Nagsiling ang Dios nga ang Jerico laglagon, apang ang mga bulawan sini, ang pilak, saway, kag salsalon ibutang sa Iya bahandianan. Mahimo nga sang primero gintuyo ni Acan nga sundon yadto nga sugo, apang nasiod sia sang kakagod. Sang didto na sia sa Jerico, daw subong bala nga nagapamalaklon sia diin nakita niya ang daw indi mapatihan ka barato nga mga butang, lakip ang isa ka matahom nga panapton nga igo gid sa iya. Ginpudyot ang mga bulawan kag mga pilak nga linibo dolyares ang bili, mahimo naghunahuna sia, ‘Daw ano nga manggad! Daw nakapangawat ako.’ Sa pagkamatuod, pagpangawat yadto! Sa paghamkon sang butang nga dapat kuntani ginlaglag ukon ginbutang sa bahandianan, nangawat sia sa Dios, kag nagbili yadto kay Acan sang iya kabuhi. (Josue 6:17-19; 7:20-26) Binagbinaga man, ang mga halimbawa ni Gehazi kag ni Judas Iscariote.—2 Hari 5:8-27; Juan 6:64; 12:2-6.
7 Indi naton dapat kalipatan ang katunayan nga ang tatlo nga bag-o lang ginsambit indi mga pagano nga ignorante sa mga talaksan ni Jehova. Sa baylo, may dedikado sila nga kaangtanan sa Dios. Sila tanan nakasaksi sang mga milagro nga dapat kuntani nagpadulot sa ila hunahuna sang gahom sang Dios kag sang pagkaimportante nga huptan ang iya kahamuot. Apang sa gihapon, napukan sila sang siod sang kakagod. Mahimo man naton maguba ang aton kaangtanan sa Dios kon tugutan naton ang aton kaugalingon nga masiod sang kakagod sa bisan ano nga porma sini. Ano nga mga sahi ukon mga porma sang kakagod ang mahimo labi na nga makatalagam para sa aton?
Ginsiod sang Kakagod sa Manggad ukon mga Pagkabutang
8. Ano nga paandam ang ginahatag sang Biblia tuhoy sa manggad?
8 Ang kalabanan sang mga Cristiano nakabati na sang maathag nga mga paandam gikan sa Biblia batok sa pagpalambo sing gugma sa kamanggaran, sing paghingamo sa manggad. Ngaa indi repasuhon ang pila sini, subong sang masapwan sa Mateo 6:24-33; Lucas 12:13-21; kag 1 Timoteo 6:9, 10? Samtang mahimo ginabatyag mo nga ginabaton mo kag ginasunod ina nga laygay, indi bala mahimo nga sanday Acan, Gehazi, kag Judas nagsiling man nga ugyon sila sa sini? Sing maathag, dapat nga indi lamang sa hunahuna kita mag-ugyon. Dapat kita maghalong nga ang siod sang kakagod sa manggad ukon mga pagkabutang wala nagaapektar sang aton pagkabuhi sa adlaw-adlaw.
9. Ngaa dapat naton usisaon ang aton panimuot sa pagpamalaklon?
9 Sa adlaw-adlaw nga pagkabuhi, masunson nga dapat kita magpamalaklon—sing pagkaon, mga bayo, kag iban pa nga mga butang para sa balay. (Genesis 42:1-3; 2 Hari 12:11, 12; Hulubaton 31:14, 16; Lucas 9:13; 17:28; 22:36) Apang ang komersial nga kalibutan nagapukaw sing handum para sa dugang pa kag mas bag-o nga mga butang. Madamo sang mga pasayod sa mga pamantalaan, mga magasin, kag sa telebisyon ang pakunokuno lamang nga mga panikasog agod pukawon ang kakagod. Ini nga mga panikasog mahimo man makita sa mga balaligyaan sa mga salab-itan sing mga blosa, mga amerikana, mga bayo, kag mga sweater, sa mga estante sang bag-o nga mga sapatos, elektroniko nga mga kasangkapan, kag mga kamera. Maalamon nga pamangkuton sang mga Cristiano ang ila kaugalingon, ‘Nangin isa bala ka daku nga butang ukon panguna nga kalipay sa akon kabuhi ang pagpamalaklon?’ ‘Kinahanglanon ko gid bala ang bag-o nga mga butang nga makita ko, ukon nagasab-ug lamang bala ang komersial nga kalibutan sing mga binhi sang kakagod sa akon?’—1 Juan 2:16.
10. Ano nga siod sang kakagod ang ilabi na nga makatalagam para sa mga kalalakin-an?
10 Kon ang pagpamalaklon daw amo ang kinaandan nga siod para sa kababayin-an, ang pagtigayon sing mas madamo nga kuwarta amo naman ang siod para sa dimaisip nga kalalakin-an. Gin-ilustrar ni Jesus ining siod paagi sa isa ka manggaranon nga tawo nga may daku na nga kinitaan apang determinado sia nga ‘gub-on ang iya mga tambubo kag magpatindog sing dalagku pa agod tipunan niya sang tanan niya nga uyas kag maayong mga butang.’ Maathag nga ginpakita ni Jesus ang katalagman: “Hupti nga nagamuklat ang inyo mga mata kag magbantay batok sa tanan nga sahi sang pagkamahamkunon” ukon kakagod. (Lucas 12:15-21) Manggaranon man ukon indi, dapat naton pamatian ina nga laygay.
11. Paano ang isa ka Cristiano mahimo masiod sang kakagod para sa mas madamo pa nga kuwarta?
11 Ang kakagod para sa mas madamo pa nga kuwarta, ukon mga butang nga mabakal sang kuwarta, masami nga ginapatubo sa idalom sang pakunokuno. Ang isa ka paagi agod magmanggaranon sa madali mahimo ipresentar—ayhan isa ka kis-a-lamang-sa-kabuhi nga tsansa agod mangin malig-on sa pinansial paagi sa isa ka peligruso nga pagpamuhunan. Ukon ang isa mahimo masulay sa pagpangita sing kuwarta paagi sa kuwestionable ukon di-legal nga mga padugi sa negosyo. Ining mahamkunon nga handum mahimo nga indi mapangindian kag makasiliod. (Salmo 62:10; Hulubaton 11:1; 20:10) Ang iban sa sulod sang Cristianong kongregasyon nagbukas sing mga negosyo nga nagapaabot nga ang ila nagasalig nga kauturan amo ang ila una nga mga bumalakal. Kon ang ila tuyo indi ang pag-aman lamang sing produkto ukon serbisyo paagi sa ‘lakas nga pagpangabudlay, nga nagabuhat sa ila mga kamot sang butang nga maayo,’ kundi amo ang madali nga pagtigayon sing kuwarta sa kahalitan sang mga masigka-Cristiano, nian nagahikot sila bangod sa kakagod. (Efeso 4:28; Hulubaton 20:21; 31:17-19, 24; 2 Tesalonica 3:8-12) Ang kakagod sa kuwarta nagdul-ong sa iban sa pagsugal paagi sa mga raffle, sweeptakes, ukon mga loterya. Ang iban, nagasikway sang pagkamahinuklugon kag pagkarasonable, padasudaso nga nagpasaka sing panumbungon sa paglaum nga makakuha sila sing daku nga premyo ukon bayad.
12. Ngaa nahibaluan naton nga ang kakagod sa manggad sarang malandas?
12 Ang bag-o lang masambit amo ang mga bahin diin nagakaigo nga usisaon naton ang aton kaugalingon agod makita naton sing bunayag kon bala ang kakagod mahimo nga nagapanghikot sa aton. Bisan pa kon amo sini, mahimo kita magbag-o. Dumduma nga si Zaqueo nagbag-o. (Lucas 19:1-10) Kon masapwan sang isa nga ang kakagod sa manggad ukon sa mga pagkabutang isa ka problema, dapat sia mangin determinado subong ni Zaqueo sa paglikaw sa siod.—Jeremias 17:9.
Kakagod sa Iban nga mga Bahin sang Kabuhi
13. Ano pa nga siod sang kakagod ang ginapatalupangod sa aton sang Salmo 10:18?
13 Mas madali makita sang iban ang katalagman sang kakagod kon tuhoy sa kuwarta ukon mga pagkabutang sangsa iban nga mga paagi nga ginalutawan sini. Ang isa ka Griego nga diksionaryo nagasiling nga ang grupo sang mga tinaga nga ginbadbad “kakagod” ukon “pagkamahamkunon” may kahulugan nga “ ‘paghandum sing dugang pa,’ kon tuhoy sa gahom kag iban pa, subong man sa pagkabutang.” Huo, mahimo kita masiod sang makagod nga paghandum nga makagamit kita sing gahom sa iban, ayhan pakurugon sila sa idalom sang aton awtoridad.—Salmo 10:18.
14. Sa anong mga bahin nangin makatalagam ang handum sa gahom?
14 Halin pa sang una nga mga adlaw naluyagan na sang dihimpit nga mga tawo nga may gahom sila sa iban. Nakita na nga daan sang Dios nga ang isa ka masubo nga resulta sang sala sang tawo amo nga madamo nga bana ang ‘magadominar’ sa ila mga asawa. (Genesis 3:16) Apang, ini nga kapaslawan, indi lamang sa mag-asawa nagakatabo. Linibo ka tuig sang ulihi, ang isa ka manunulat sang Biblia nagsiling nga ‘ang tawo naggahom sa tawo sa iya kasamaran.’ (Manugwali 8:9) Mahimo nga nahibaluan mo kon daw ano ini ka matuod sa latagon sang politika kag militar, apang mahimo bala nga sa aton man palibot, ginatinguhaan naton ang dugang pa nga personal nga gahom ukon pagkontrol?
15, 16. Sa anong mga bahin ang isa ka Cristiano mahimo masiod sang handum para sa dugang pa nga gahom? (Filipos 2:3)
15 Kita tanan nagapakig-angot sa iban nga mga tawo—sa sulod sang aton kaugalingon ukon kasugpon nga mga pamilya, sa aton ginatrabahuan ukon sa eskwelahan, sa tunga sang aton mga abyan, kag sa kongregasyon. Mahimo nga kon kaisa, ukon sa masami, may papel kita sa pagpamat-od kon ano ang dapat himuon, subong man kon paano ukon kon san-o ini himuon. Indi ina sayop ukon malain. Apang, sobra gid bala ang aton kalipay sa paggamit sang bisan anong awtoridad nga yara sa aton? Mahimo bala nga ang luyag naton amo nga kita pirme ang hingapusan nga magdesisyon kag nagahandum sing kapin pa sa sini? Ang kalibutanon nga mga manedyer ukon mga boss masami nga nagapakita sining panimuot paagi sa pagpalibot sa ila kaugalingon sing nagasunodsunod lang nga mga tawo, nga wala nagasumpakil sa ila kag wala nagahangkat sa kalibutanon nga pagtinguha (kakagod) sang ila mga superyor sing gahom.
16 Isa ini ka siod nga dapat likawan kon nagapakig-angot sa mga masigka-Cristiano. Si Jesus nagsiling: “Nahibaluan ninyo nga ang mga manuggahom sang mga pungsod nagapakaginuo sa ila kag ang mga kadalagkuan nagagamit sing pagbulut-an sa ila. Indi subong sini sa tunga ninyo; kundi ang bisan sin-o sa inyo nga luyag mangin daku mangin alagad ninyo.” (Mateo 20:25, 26) Ina nga pagkamapainubuson dapat mangin kitaon samtang ang Cristianong mga gulang nagapakig-angot sa isa kag isa, sa ministeryal nga mga alagad, kag sa panong. Mahimo bala nga ang handum sa gahom ginapakita, halimbawa, sang isa ka nagadumala nga manugtatap nga nagakonsulta sa iya mga masigkagulang kon tuhoy lamang sa diutay nga mga butang apang kon tuhoy sa tanan nga importante nga mga butang sia na ang nagadesisyon? Handa gid bala sia nga ihatag sa iban ang iban nga mga hilikuton? Mahimo may mga problema nga magaresulta kon ang isa ka ministeryal nga alagad nga nagadumala sang miting antes magguwa sa latagon indi makatarunganon nga estrikto sa iya mga kahimusan, kag nagahimo pa sing mga pagsulundan.—1 Corinto 4:21; 9:18; 2 Corinto 10:8; 13:10; 1 Tesalonica 2:6, 7.
17. Ngaa nagakaigo nga binagbinagon ang pagkaon kon ginahambalan ang siod sang kakagod?
17 Ang pagkaon isa pa ka bahin diin madamo ang ginasiod sang kakagod. Sa pagkamatuod, natural lamang nga malipay kita sa pagkaon kag sa pag-inom; ang Biblia nagahambal nga may kahamuot sa sina. (Manugwali 5:18) Apang, kinaandan na nga ang isa ka handum sa sini nga butang nagadaku sa sulod sang nagaligad nga tion, kag nagalampas sa kon ano ang makatarunganon nga makalilipay kag nagakaigo. Kon indi ini isa ka nagakaigo nga butang nga dapat kabalak-an sang mga alagad sang Dios, ngaa ang Pulong ni Jehova nagasiling sa Hulubaton 23:20: “Dili magsimpon sa mga palainom sing alak, sa mga mahakog magkaon sing unod”? Apang, paano naton malikawan ini nga siod?
18. Ano nga pag-usisa sa kaugalingon ang mahimo naton nahanungod sa pagkaon kag ilimnon?
18 Ang Dios wala nagapanugda nga ang iya katawhan magdingot sa kaugalingon sa pagkaon. (Manugwali 2:24, 25) Apang wala man sia nahamuot nga himuon naton ang pagkaon kag pag-inom nga isa ka nagapangibabaw nga bahin sang aton paghambalanay kag pagplano. Mahimo naton pamangkuton ang aton kaugalingon, ‘Ako bala masami nga sobra ka makunyagon kon ginalaragway ko ang pila ka pagkaon nga nakaon ko ukon ginaplano nga kaunon?’ ‘Pirme bala ako nagahambal nahanungod sa pagkaon kag ilimnon?’ Ang isa pa ka palatandaan amo kon ano ang aton ginahimo kon magkaon kita sang wala naton ginluto ukon ginbayaran, ayhan kon bisita kita sa balay sang iban ukon kon may pagkaon nga makaon sa isa ka Cristianong asambleya. Mahimo ayhan nga may huyog kita sa pagkaon sing kapin sa kinaandan? Dumdumon naton nga gintugutan ni Esau ang pagkaon nga mangin sobra ka importante, sa iya dayon nga kahalitan.—Hebreo 12:16.
19. Paano mangin problema ang kakagod kon tuhoy sa seksuwal nga pagpangalipay?
19 Ginahatagan kita ni Pablo sing paghantop sa isa pa ka siod: “Ang pagkamakihilawason kag ang tanan nga sahi sang kahigkuan ukon kakagod dili gid pagsambiton sa inyo, subong nga nagakaigo sa mga balaan.” (Efeso 4:17-19; 5:3) Sa pagkamatuod, ang kakagod para sa seksuwal nga pagpangalipay mahimo magtubo. Apang, nagakaigo nga ipautwas ini nga kalipay sa sulod sang higot sang pag-asawahay. Ang suod nga gugma nga ginabatyag sa sining kalipay nagabulig sa bana kag asawa nga mag-unungay sa sulod sang madamo nga tinuig sang pag-asawahay. Apang, pila lamang ka tawo ang magapanghiwala nga ginpasobrahan sang kalibutan karon ang pagpadaku sa sekso, ginapresentar subong normal ang sa kamatuoran isa ka pagpabanaag sang kakagod nga ginsambit ni Pablo. Inang sayop nga pagtamod sa seksuwal nga pagpangalipay ilabi na nga madali mabaton sang mga tawo nga nagapadayag sang ila kaugalingon sa imoralidad kag pagkahubo nga kinaandan karon sa madamo nga mga pelikula, mga video, kag mga magasin, subong man sa mga duog sang kalingawan.
20. Paano mapakita sang mga Cristiano nga alisto sila sa katalagman sang kakagod sa seksuwal nga mga butang?
20 Ang kasaysayan sang pagpakasala ni David upod kay Batseba nagapakita nga ang isa sang mga alagad sang Dios sarang masiod sang siod sang seksuwal nga kakagod. Bisan pa hilway sia sa pagpangalipay sa iya kaugalingon nga asawa, gintugutan ni David nga magtubo ang ginadumilian nga handum sa sekso. Sang makita kon daw ano ka makabibihag ang asawa ni Uria, ginpasugtan niya ang iya hunahuna—kag buhat—nga mangita sing ginadumilian nga pagpangalipay upod sa iya. (2 Samuel 11:2-4; Santiago 1:14, 15) Sa pagkamatuod dapat gid naton likawan ini nga porma sang kakagod. Bisan sa sulod sang pag-asawahay nagakaigo nga likawan ang kakagod. Magalakip ini sang paglikaw sa indi nagakaigo nga mga buhat sa sekso. Ang isa ka bana nga determinado sa paglikaw sa kakagod sa sini nga bahin dapat mangin interesado gid sa iya asawa, agod nga ang bisan anong desisyon nga mapilian nila nahanungod sa pagplano sang pamilya indi dapat magpabalor sang iya kalipay nga mangin mas importante pa sa ikaayong lawas sang iya asawa sa karon ukon sa palaabuton.—Filipos 2:4.
Padayon nga Mangin Determinado sa Paglikaw sa Kakagod
21. Ngaa ang aton paghambalanay tuhoy sa kakagod indi dapat magpaluya sang aton buot?
21 Si Jehova wala nagapahalong ukon nagahatag sing mga paandam bangod wala sia sing salig. Nahibaluan niya nga ang iya debotado nga mga alagad luyag mag-alagad sa iya sing matutom, kag nagasalig sia nga ang kalabanan magapadayon sa paghimo sina. Nahanungod sa iya katawhan sa kabilugan, sarang niya masiling ang subong sang ginsiling niya tuhoy kay Job sang nagapakighambal sia kay Satanas: “Natalupangdan mo bala ang akon alagad nga si Job, nga wala sing kaangay sa iya sa duta, tawo nga himpit kag matarong, nga mahadlukon sa Dios kag nagalikaw sa malaut?” (Job 1:8) Ang aton mahigugmaon, nagasalig nga langitnon nga Amay nagapaalisto sa aton sa makatalagam nga mga siod, subong sang may kaangtanan sa mga porma sang kakagod, bangod luyag niya nga magpadayon kita nga walay dagta kag matutom sa iya.
22. Ano ang dapat naton himuon kon ang aton pagtuon nagpakita sing isa ka bahin nga may personal nga katalagman ukon kaluyahon?
22 Ang tagsatagsa sa aton nakapanubli sing huyog sa kakagod, kag mahimo nga nakapatubo kita sing pila ka porma sini sing dugang pa sa idalom sang impluwensia sang malaut nga kalibutan. Ano kon sa tion sang aton pagtuon sa kakagod—tuhoy sa manggad, mga pagkabutang, gahom kag awtoridad, pagkaon, ukon seksuwal nga pagpangalipay—nakakita ka sing kaluyahon? Kon amo, pamatii ang laygay ni Jesus: “Kon ang imo kamot nagapasandad sa imo, utda ini; maayo pa sa imo nga magsulod nga kumpol sa kabuhi sangsa may duha ka kamot magakadto ka sa Gehenna.” (Marcos 9:43) Himua ang bisan anong mga pagbag-o nga kinahanglanon sa panimuot ukon sa mga interes. Likawi ang makamamatay nga siod sang kakagod. Sa amo sa bulig sang Dios, mahimo ikaw “makasulod sa kabuhi.”
Ano ang Akon Natun-an?
◻ Ngaa dapat kita mabalaka nahanungod sa siod sang kakagod?
◻ Sa anong mga paagi ang kakagod sa manggad ukon mga pagkabutang mahimo makasiod sa aton?
◻ Paano ang kakagod sa iban nga mga bahin sang kabuhi mahimo magpresentar sing matuod nga mga katalagman?
◻ Ano dapat ang mangin panimuot naton tuhoy sa bisan anong kaluyahon naton tuhoy sa kakagod?