Hungod nga Nagapalapta sing Kamatayon
ANTES ginapatay sang AIDS ang iya mga biktima, ginahatag sini sa ila ang isa ka makahaladlok nga salabton: ang gahom sa kabuhi ukon kamatayon sa iban. Madamo sang may AIDS ang masaligan sa ila salabton, nagadingot sa ila kaugalingon sang bisan anong buhat nga mahimo makalaton sa iban. Apang tuhay ang makatalagam nga pila ka tawo.
Ang saykayatris sa Washington, D.C., nagsulat tuhoy sa isa ka makahaladlok nga halimbawa—isa sang iya mga pasyente: “Nahangawa ako nga ang natublag sing daku nga biktima sang AIDS nagapakigrelasyon sa babayi kag lalaki, hungod nga nagapalaton sang iya balatian sa iban nga tawo. Nahibaluan niya nga makapatay ini sa iban.” Ginsilingan niya sia: “Sang primero sang matukiban ko nga may AIDS ako namat-od ako nga indi makigsekso kay bisan sin-o, apang naakig ako kag nagsiling: Daugon ta ang kalibutan.” Ano ang buot niya silingon?
Ang saykayatris nagapaathag: “Ginsugiran niya ako nga kon kaisa kon may maakigan sia, may tingog sa sulod niya nga nagasugo sa iya, ‘Kuhaon naton ining tawo’ kag dayon ginatinguhaan niya nga makigsekso sa iya. Nagsiling man sia nga nagapuyo sia upod sa isa ka lalaki nga nagapakigrelasyon sa babayi kag lalaki kag kon bisan sin-o lang nga mga babayi ang iya ginatandog.” Gintinguhaan sang saykayatris nga kombinsihon ang mga opisyales nga bilangguon ining makatalagam nga tawo apang wala ini pagsapaka. “Sang katapusan nga nakita ko sia,” sulat niya, “ang iya panimuot wala gihapon magbalhin, kag wala ako sing rason sa pagduhaduha nga nagbag-o na sia karon.”
Isa bala ka tumalagsahon nga kaso? Sing makapasubo, indi. Ang isa ka tawo gintawag nga Patient Zero sang Centers for Disease Control bangod sang iya daku nga papel sa una nga paglapta sang AIDS sa Estados Unidos. Bisan sa tapos niya mahibaluan nga ginabutang niya sa katalagman ang kabuhi sang iban, nagpadayon sia sa iya homoseksuwal nga pagpakigrelasyon sa mga 250 ka lalaki kada tuig. Ang mga babayi nagareklamo batok sa mga tiayon nga nagasekreto sang ila pagpakigrelasyon sa babayi kag lalaki. Ang mga nagadroga nagapadayon sa pagpahulam sang ila nagamit na kag mahigko nga mga dagom kag gani sila ang nangin pinakadaku nga grupo sang bag-o nga mga biktima sang AIDS sa pila ka pungsod.
Bisan pa makatulublag ini, wala ini nagapakibot sa mga estudyante sang Biblia. Inang dumaan nga tulun-an madugay na nagtagna nga ang katawhan sining ginatublag nga kaliwatan mangin “mahigugmaon sa ila kaugalingon . . . nga wala sing kinaugali nga gugma.” (2 Timoteo 3:1-5) Ina nga tion nag-abot na gid. Ginasaklaw sang mga nagasikway sa kasuguan sang Dios tuhoy sa moralidad ang Awtor sinang kasuguan, ang aton Manunuga, halin pa sang una. Amo ini ang pinakagrabe nga katalagman nga matigayon sang isa sa kabuhi. Apang karon ang amo gihapon nga pagkamalalison masami nga nagadala sing dugang pa nga katalagman: pagtugyan sang imo kabuhi sa mga tawo nga wala sing ginapabilihan kundi ang ila kaugalingon nga kalipay.