Pukawa ang Iban nga Magtulok sing Hanuot kay Jesus
1 Ang Pinakabantog nga Tawo nga Nagkabuhi isa ka tumalagsahon nga libro. Ang 133 ka kapitulo sini makapukaw sa mga bumalasa sa pagtulok sing hanuot kay Jesus kag sa pagsunod sa iya halimbawa. Ginasiling nga ang tanan nga mga hari nga naggahom, bisan tingubon man, wala makaapektar sang kabuhi sang tawo sing subong ka daku sang kay Jesus. Ang nagatulok sing hanuot kay Jesus pat-od gid nga makabenepisyo.
2 Gintudluan ni Jesus ang iya mga disipulo nahanungod sa iya Amay kag ginhalimbawa ang mga kinaiya sang Dios. Ang aton mga tagipusuon ginapahulag kon ginabinagbinag naton ang maayo nga ikasarang ni Jesus subong manunudlo, ang iya walay kahadlok nga pagpangulo, kag ang iya mapinalanggaon nga kaawa. Kon dumdumon naton ang iya mga pag-antos sang ginhatag niya ang iya kabuhi sa paggawad sa aton, ginapahulag kita nga may apresasyon! Ang Pinakabantog nga Tawo nga Nagkabuhi magabulig sa mga tawo nga tan-awon si Jesus sa sining paagi.
3 Maghanda sing Maayo: Handai sing maayo ang pagsugod sing isa ka paghambalanay sa Biblia nga magapukaw sa iban sa pagtulok sing hanuot kay Jesus. Ang mga pamilya kag ang iban pa mahimo makaensayo sing tingob. Panikasugi nga pukawon ang interes kag pahulagon ang mga tawo sa pagbasa sang Pinakabantog nga Tawo nga libro. Kon ang una nga interes diutay lamang, mabilin naton ang isa ka tract ukon ayhan ang isa ka brosyur ukon magasin.
4 Ang aton paghambalanay sa pamalaybalay sa Enero magasentro kay Jesus kag magapalig-on sa katawhan nga kilalahon sia sing maayo pa. Paagi sa paggamit sang mga punto sa Pinakabantog nga Tawo nga libro, mabuligan naton ang katawhan nga tan-awon si Jesus, indi lamang subong isa ka maayo nga tawo, kundi subong Anak sang Dios kag nagagahom nga Hari sang panguluhan nga magalubad sang tanan nga mga problema sang katawhan.
5 Paano naton mahibaluan kon bala ang isa interesado gid? Kon mamati sia sing maayo, mamangkot, ukon magpakita sing partikular nga igtalupangod sa ginabasa naton sa Biblia, tanda ini sang isa ka hanuot nga interes. Kon ginapakita naton ang libro kag gilayon niya nga ginakuha ini, nagapakita ini sing matuod nga interes nga luyag naton palambuon. Bisan pa wala sia magkuha sing libro, apang kon nagpakita sia sing interes maayo nga magbilin sing tract, kag magpautwas sing pamangkot para sa palaabuton nga paghambalanay, kag maghimos sa pagduaw liwat.
6 Ang isa ka tawo nga indi pirme luyag magbasa nagpabutyag sing apresasyon para sa Pinakabantog nga Tawo nga libro, nagasiling nga naghimo ini sang pagbasa nga isa ka makalilipay pagkatapos sang iya isa ka adlaw. Buligan naton ang iban sa pagbatyag sing amo man, nagapukaw sa ila sa pagtulok sing hanuot kay Jesus paagi sa pagbasa sang Ang Pinakabantog nga Tawo nga Nagkabuhi.