Pagtanyag sing Revelation nga Libro
1 Bangod sang aton makahalanguyos nga tion, madamong tawo ang nagapalibog kag nalangkag sa makaalayaw nga mga sabat nahanungod sa palaabuton. Nagakaigo gid, nian, nga palig-unon naton sila nga basahon ang Revelation nga libro! Ini nga publikasyon nagahatag sing balaan nga panuytoy paagi sa pagpaathag sang mga hitabo sa aton adlaw sa kapawa sang mga tagna sa Bugna. Ang masunod amo ang pila ka panugda nga sarang naton magamit kon ginatanyag ini sa mga tawo sini nga bulan.
2 Para sa mga Relihioso: Dugang kag dugang nga katawhan ang nagatuon sang Biblia karon. Kon nagapakigsugilanon sa mga tawo kaangay sini, ang direkta nga pagpalapit epektibo.
Makasiling ka:
◼ “Ginapamangkot namon ang amon kaingod sang isa ka pamangkot: Nagahunahuna ka bala nga ang tulun-an sang Bugna gintuyo nga hangpon, ukon pirme bala ini magapabilin nga isa ka tanhaga? [Pasabta sia.] Madamo ang may kaangay sang imo panghunahuna. Talupangda kon ano mismo ang ginasiling sang Biblia sa Bugna 1:3.” Nian mahimo mo patuhuyan ang mga komento sa introduksion sa pahina 9 sang libro sa “Interpreting the Scriptures.”
3 Para sa mga Nabalaka sa mga Kahimtangan sa Kalibutan: Maayo nga gamiton ang talalupangdon nga mga laragway sa Revelation nga libro kon ginatanyag ini sa mga nabalaka nahanungod sa mga problema sang kalibutan.
Halimbawa, makasiling ka:
◼ “Nagaduaw kami agod hambalan ang kahulugan sang nagakatabo sa aton palibot sa kalibutan karon. Ang iban nga mga lider sang kalibutan nagabatyag nga yara na kita sa bibi sang bag-ong dag-on sang paghidait. Matuod bala ini sa banta mo? [Pasabta sia.] Apang, walay sapayan sang kapaslawan sang mga gobierno sang tawo, sa 2 Pedro 3:13 ang Biblia nagapasalig sa aton sang isa ka bag-ong katilingban sa duta nga magapanghikot sa idalom sang langitnon nga gobierno. [Basaha ang kasulatan kag buksi ang Revelation nga libro sa pahina 302.] Ano ang nagaganyat sa imo sa laragway? [Pasabta sia.] Nahanungod sa mga kahimtangan nga magaluntad sa duta, ang Biblia nagasiling man sa Bugna 21:4 [basaha ang kasulatan gikan sa pahina 303, parapo 6]. Bisan ang kamatayon indi makapugong sa paghidait nga ipaluntad sang Dios.”
4 Para sa mga Nabalaka sa Polusyon kag sa Palibot: Ang laragway sa pahina 174 sang libro sarang magamit upod sang Bugna 11:18.
Halimbawa, pagkatapos sang imo introduksion makasiling ka:
◼ “Sa pagpakigsugilanon sa amon mga kaingod, madamo ang nabalaka sa daku nga pagdagta sa aton hangin, tubig, kag pagkaon. [Ipakita ang laragway sa pahina 174.] Sa banta mo masarangan bala sang gobierno nga matapna ini? [Pasabta sia.] Makapalig-on makita kon ano ang ginasiling sang Biblia nga mahanabo sa mga nagalaglag sang duta.” Basaha ang Bugna 11:18 gikan sa libro sa pahina 173, nian ipakita ang katuyuan sang Dios para sa duta sa pahina 302.
5 Ang mga tagna sang Bugna isa ka daku nga tuburan sang kalipay. Makugi naton nga itanyag ang Revelation nga libro sini nga bulan agod ang tanan mahimo nga matuytuyan sang maalam nga panuytoy ni Jehova.