Himusli sing Bug-os ang 1993 nga “Balaan nga Panudlo” nga Distrito nga Kombension
1 “Tudlui ako, O Jehova.” (Sal. 86:11) Amo ini dapat ang hanuot nga pangabay sang tagsa ka dedikado nga alagad ni Jehova. Determinado kita nga indi gid mag-untat sa pagtuon kag sa pag-aplikar sang kon ano ang aton natun-an. Kon kaisa kinahanglan nga kita tadlungon, kag subong sang ginhimo sang salmista, kinahanglan nga makiluoy kita sa Dios nga ihiusa ang aton tagipusuon agod indi ini mabahinbahin. Ang programa sa “Balaan nga Panudlo” nga Distrito nga Kombension magaaman sing praktikal nga instruksion kag pagtadlong nga kinahanglan naton agod maalagad si Jehova sing matutom sa tunga sang mga pag-ipit sining sistema sang mga butang.
2 Apat-ka-Adlaw nga Kombension: Ang programa ipresentar sa 36 ka lokasyon sa bug-os nga Pilipinas. Sa Metro Manila ang tatlo sining mga kombension kag pagahiwaton sa Nobiembre 4-7, 1993, samtang ang 33 pa pagahiwaton sa katapusan nga bahin sang Disiembre kag sa maaga nga bahin sang Enero. Ang programa magasugod sa Huebes sa ala 1:20 s.h. kag matapos sa Domingo sang hapon sa mga alas 4:15 s.h. Patalupangod: Ang programa sa tanan nga 36 ka lokasyon palareho, lakip sa Manila. Ang lamang nga kinatuhayan amo ang pagtambong sang dumuluong nga mga delegado sa Manila.
3 Ano ang ginatigana para sa aton? Bugana nga espirituwal nga pagkaon nga ihatag sa lainlain nga paagi: mga pamulongpulong, mga pasundayag, mga interbyu, kag duha ka drama. Tambungi ining tanan kinahanglanon nga instruksion! Dugang pa, ginakalangkagan naton nga makita liwat ang aton mga abyan kag makilala ang mga bag-o. Ang mga misyonero nga nagaalagad sa mga asaynment sa luwas mahimo magatambong sa inyo kombension. Himusli ang kahigayunan nga makilala ining matutom nga kauturan nga mga lalaki kag mga babayi. Kon isa ikaw ka ginikanan, ilakip ang inyo kabataan sa paghambalanay. Ang makalilipay kag nagasakripisyo sa kaugalingon nga espiritu sining mga misyonero mahimo magapasad sing sadsaran para sa inyo kabataan nga binagbinagon ang bug-os tion nga pag-alagad nga karera.
4 Dalhon Bala Ninyo ang Bug-os nga Ikapulo sa Tambubo? Sa Malaquias 3:10, si Jehova nanaad sa mga Israelinhon nga kon handa sila nga tilawan sia kag dalhon ang bug-os nga ikapulo sa tambubo, ibubo niya ang pagpakamaayo tubtob wala na sing masudlan.
5 Para sa iban, ang pagtilaw kay Jehova nagakahulugan sang pagpakigsugilanon sa ila amo sa pinakamaaga nga mahimo agod mangabay sing bakasyon ukon leave kag sa amo makatambong sa kombension. Kon kaisa ang mga kauturan nagpang-alag-ag sa paghimo sini, nagahaumhaom nga indi gid sila pagtugutan sang ila amo sa pagtambong sa kombension. Apang, tuhoy sa indi espirituwal nga mga butang, wala sila mabudlayan sa pagsugid sa ila amo sang luyag nila nga himuon.
6 Dapat naton pamangkuton ang aton kaugalingon: Kon ang isa ka mahal nga abyan kalaslon sa iban nga lugar, indi bala naton palapitan ang aton amo kag hangyuon nga makabiya kita sa trabaho agod makatambong sa kasal? Kag kon daw indi sia magpasugot, indi bala matinahuron nga paathagan naton sia kon daw ano gid ka importante para sa aton nga makatambong? Pat-od gid nga mas importante ang magpatudlo kay Jehova sangsa magtambong sa kasal! Kon kombinsido gid kita nga ang programa sa kombension kinahanglanon sa aton espirituwal nga pagtubo, mas mahapos naton makombinse ang aton amo agod tugutan kita nga makatambong sa kombension.—Santiago 1:7, 8.
7 Sa Israel ang ikapulo naglakip sang materyal nga pagsakdag sa duog sang pagsimba ni Jehova. Sa aton adlaw ang ikapulo nagarepresentar sa tion, enerhiya, kag kuwarta nga ginagamit sing direkta sa pag-alagad kay Jehova kag sa pagsakdag sa hilikuton sang Ginharian. Ang ikapulo nagalakip sang tion nga ginahinguyang naton sa mga miting, mga asambleya, kag mga kombension, pati na sa pagmentinar kag pagtinlo sa aton mga duog tilipunan. Ang “Balaan nga Panudlo” nga Distrito nga Kombension magahatag sa aton sing madamong kahigayunan nga dalhon ang bug-os nga ikapulo sa espirituwal nga tambubo ni Jehova. Ano ang pila sini?
8 Madala naton ang ikapulo paagi sa pagpamati sing maayo sa programa sang kombension, paagi sa pagpakigbahin sing mapagsik sa pag-amba sang tagsa ka ambahanon sa Ginharian, kag paagi sa pagpamati sing maayo sa tagsa ka pangamuyo, agod madugang naton ang aton tinagipusuon nga amen.
9 Ang aton pag-uswag sa kamatuoran nasandig sa daku nga kasangkaron sa kon daw ano kaayo kita nagapamati. Sa daku nga awditoryom ukon istadyum, madali kita matublag sang ginahimo sang iban sa aton palibot, kag bangod sina dapat naton pirme ikonsentrar ang aton hunahuna. Pat-ura nga magkadto sa kombension nga nakahanda sing bug-os, dala ang imo Biblia, songbook, pluma kag papel, kag ang guwa sang Ang Lalantawan nga pagatun-an sa sina nga semana. Mapuslanon nga isulat ang mga punto kag mga kasulatan nga gingamit sang tagsa ka humalambal. Lip-uta ang imo nota; ang tuman kadamo nga nota mahimo magtublag sang konsentrasyon. Ang kabataan dapat man hanason sa pagpamati sing maayo. Madala sang kabataan ang ikapulo upod sa ila mga ginikanan paagi sa pagpamati sing maayo sa programa.
10 Ang iban nga mga ginikanan nagahimos sing oras sa paghipos sa balay kada adlaw nga ang ila kabataan ginapaabot sa pagbasa ukon sa pagtan-aw sa mga laragway sa isa sang mga publikasyon sang Sosiedad. Ining maayo nga paghanas nagapahapos agod ang kabataan makalingkod sing mahipos sa tion sang mga miting kag mga kombension. Ang mga ginikanan nga may huwaran nga kabataan nagasiling nga wala gid nila ginatugutan ang ila kabataan sa pagdala sing hampanganan ukon coloring book sa mga miting. Bisan ang magagmay nga kabataan makatuon nga ang rason sang pagtambong sa mga miting amo ang pagsimba kay Jehova. Ang mga ginikanan nga nagatudlo sa ila kabataan kon ano ang kahulugan para sa ila sang pagdala sang bug-os nga ikapulo sa tambubo dalayawon gid!
11 Madala man naton ang ikapulo paagi sa pagboluntaryo sang aton tion kag enerhiya sa pagbulig sa organisasyon sang kombension. Sa kalabanan nga mga lokasyon ang pagpaninlo antes sang kombension ginaiskedyul isa ukon duha ka adlaw antes magsugod ang kombension. Kon malapit lang ang imo balay, ngaa indi maghimos agod ang bug-os nga pamilya makapakigbahin? Ginpaupod sang pila ka mga utod ang ila progresibo nga mga estudyante sa Biblia agod bisan wala pa sila mabawtismuhi matun-an na sining mga bag-uhan kon ano ang nalakip sa pagsakdag sa pagsimba kay Jehova. Madamo sing hilimuon agod siguruhon nga ang kombension magamadinalag-on. Ngaa indi magboluntaryo subong pamilya?
12 Ang aton pinansial nga pagsakdag sa kombension isa pa ka paagi sang pagdala sang ikapulo. Sa pagbalay kon paano ihatag ang materyal nga mga dulot sa pagsakdag sa putli nga pagsimba, si Jehova nagsugo sa pungsod sang Israel: “Wala sing isa nga mag-atubang kay Jehova nga wala sing dala. Ang dulot sang tagsa ka tawo dapat nga nahisuno sa pagpakamaayo nga nahatag sa imo ni Jehova nga imo Dios.” (Deut. 16:16, 17) Bisan pa madamo ukon diutay ang nahatag sang mga tawo, ang ila halad, nga ginhanda sing abanse, kalahamut-an kay Jehova. Sa kaanggid, madamong kauturan ang mapangayumuon nga nagahunahuna sang ila amot, kuwarta man ukon tseke. Ginapahulog bala ninyo ang inyo magagmay nga kabataan sa kahon-alamutan?
13 Punihi ang Pagtulun-an sang Aton Manluluwas, ang Dios: Paagi sa aton maayo nga pamatasan kag sa aton maayo nga paggawi, “mapunihan [naton] ang pagtulun-an sang aton Manluluwas, ang Dios.” (Tito 2:10) Sa iban nga hambal, mismo sa kombension, mapakita naton nga ang balaan nga panudlo ginaaplikar naton sa aton kabuhi.
14 Kamusta ang aton pamatasan? Ang pagpatugsiling sa iban talagsa na lang karon sa kalibutan. Apang ang katawhan ni Jehova, nga ginatuytuyan sang Makasulatanhon nga mga prinsipio, nagahunahuna, indi sang ila kaugalingon nga kaayuhan, kundi sang kaayuhan sang ila isigkatawo. (Filip. 2:4) Mahunahunaon kita sa iban nga nagapalibot sa aton. Wala kita nagapaniklod ukon nagapangwahig kon nagalinya para sa pagkaon ukon mga publikasyon. Mapatugsilingon kita sa mga tigulang kag sa magagmay nga kabataan nga ayhan nagalinya upod sang ila mga ginikanan kag madali madalasa sang mga hamtong nga wala makadipara sa ila. Sa mga restawran mabuot kita kag matinahuron sa mga empleyado, indi nga walay batasan ukon mayamuhon kon ang serbisyo indi suno sa ginapaabot naton.
15 Ang aton diosnon nga paggawi may tunay nga epekto sa mga yara sa palibot naton. Sa isa ka kombension sang nagligad nga tuig, amo sini ang ginsiling sang isa ka pulis nga may 21 ka tuig nga serbisyo: “Dayaw gid ako sa disiplina sang inyo katawhan. Tumalagsahon [sila]; ginapudyot nila ang sagbot bisan nga wala ginasugua kag mahim-ong sila kag ang inyo kombension organisado gid.” Sia nagdugang: “Kon makita kami sang inyo katawhan, nagayuhum sila. Maayo ina nga tanda. Ginapangita namon ina. Tanda ina sang pagkamainabyanon kag wala sing butang nga ginatago. Kag natalupangdan man namon kon paano ang kabataan nagaupod sa ila mga ginikanan kag disiplinado gid. Dayaw gid ako. Makalilipay matangdo diri.”
16 Personal bala ninyo nga punihan ang panudlo sang aton Manluluwas, ang Dios, paagi sa inyo huwaran nga paggawi? Yari ang pila ka paagi nga sarang ini mahimo:
Pamayo kag Pamustura: Sa tion nga kita nagatambong sa kombension, indi kita dapat maghunahuna nga nagabakasyon kita. Sa baylo, ginapresentar naton ang aton kaugalingon kay Jehova nga tudluan niya. Bangod sina, indi bala kita dapat mamayo subong sang kon nagatambong kita sa mga miting sa Kingdom Hall? (1 Tim. 2:9, 10) Dugang pa, dapat naton hunahunaon sing maayo kon ano ang aton isuksok pagkatapos sang sesyon. Pagpauli sa aton mga dalayunan, nahisanto bala para sa aton nga islan ang aton maugdang, talahuron nga pamayo sa kombension sing panapton nga magahatag sa aton sing panagway sang dimahipid nga mga kalibutanon? Indi bala ini magahatag sing impresyon nga ang aton mga panapton sa miting isa lamang ka costume sa baylo nga banaag sang aton dalanon sang kabuhi? Dumduma, ginadala naton ang ngalan ni Jehova, kag dapat tan-awon sang tagsatagsa sa aton nga wala sing masumbong batok sa dalanon sang kamatuoran.
Ang mga kandidato sa bawtismo dapat pahanumdumon nga dinagakaigo sa sinang sagrado nga okasyon ang magsuksok sing T-shirt nga may kalibutanon nga mga hambalanon, logo, ukon pasayod. Dapat pat-uron sang mga gulang nga ang mga pamangkot sa bawtismo ginarepaso sing maayo sing abanse kag nga ang tagsa ka kandidato ginasugiran sa nagakaigo nga tion kon bala aprobado sia para sa bawtismo ukon indi. (Samtang nagarepaso sang mga pamangkot, nagakaigo ini nga tion sa paghatag sing mga panugda tuhoy sa nagakaigo, maugdang nga panapot para sa bawtismo.) Indi kinahanglan para sa mga kandidato sa bawtismo nga aprobado sang mga gulang nga magparehistro sa kombension.
Paghupot nga Matinlo sang Aton Palibot: Subong sang ginsambit kaina, madamo ang nagakomento tuhoy sa katinlo sang katawhan ni Jehova sa mga kombension. Huptan naton inang mataas nga talaksan, nga wala nagahaboy sing papel, panit sang dulse, ukon iban pa nga mga basiyo, sa salog. Antes maghalin sa gab-i, tan-awa ang palibot sang inyo pulungkuan kag pudyuta ang sagbot kag ibutang sa nagakaigo nga mga basurahan ukon dalha sa balay agod didto ihaboy. Dumduma nga ang tilipunan sa kombension amo ang aton Kingdom Hall sa apat ka adlaw kag dapat tamdon subong sang pagtamod naton sa aton lokal nga Kingdom Hall.
Sekular nga Palamugnan: Nagatambong kita sa kombension sa pagkuha sing espirituwal nga pagkaon. Busa indi ini ang tion sa pagpamugon ukon sa pagnegosyo, nga nagahingalit sa dakung kadam-an nga nagatambong. Sa liwat luyag namon ipahanumdom sa tanan nga wala ginatugot ang pagbaligya sing personal nga mga butang sa sulod sang ginahiwatan sang kombension, kag iya sang Sosiedad lamang ang ginatugutan sa bookroom ukon sa iban pa nga mga departamento sa kombension.
Mga Kagamitan sa Pagrekord: Samtang ginatugot ang mga video camera, nahibaluan namon nga mangin mapatugsilingon kamo sa iban. Indi mahigugmaon ang pagtabon sa mga masigkakombensionista samtang nagarekord sang programa. Kon mahimo kamo makarekord sing mainandamon sa inyo pulungkuan, maayo ini. Apang, dumduma palihug, nga wala sing kamera ukon mga kagamitan sa pagrekord ang itakod sa koryente ukon mga sistema sa tunog sang kombension, ukon nga ang kagamitan ibutang sa alagyan ukon sa mga lugar sang trapiko.
Pulungkuan: Dumduma palihug nga ANG PULUNGKUAN MAHIMO LAMANG ITIGANA PARA SA MALAPIT NGA KATAPO SANG INYO PAMILYA KAG SA IBAN NGA NAGALAKBAY KAUPOD NINYO SA INYO SALAKYAN. Magmapatugsilingon palihug sa mga tigulang. Sang nagligad, ang pila ka tigulang nga mga kauturan nangita sing pulungkuan sa dimasulhay nga mga lugar bangod ang mga batan-on nagalingkod sa mga pulungkuan sa seksion nga gintigana para sa mga tigulang.
Personal nga Pagkabutang: Ginapanugda nga magdala kamo sing diutay lamang nga personal nga pagkabutang sa kombension. Kon indi makaigo ang isa ka butang sa inyo pulungkuan, maayo pa nga ibilin ini sa balay ukon sa likod sang salakyan. Ang dalagku nga pagkabutang wala ginatugot sa mga alagyan tungod sa kalig-unan, kag kon itungtong ninyo ini sa pulungkuan sa tupad ninyo, ginadingutan ninyo ang iban sing pulungkuan.
17 Bilang mahigugmaon nga patugsiling sa iban, planuha nga mag-abot sing temprano kada adlaw, labi na sa Huebes kon san-o mas madugay sangsa kinaandan makakita sing palarkingan kag pulungkuan.
18 Daw ano nga pribilehiyo ang tudluan ni Jehova! Ang paggamit naton sang aton tion, enerhiya, kag materyal nga pagkabutang sa pagsakdag sa “Balaan nga Panudlo” nga Distrito nga Kombension sini nga tuig magaresulta sa mapinadayunon nga espirituwal nga mga benepisyo sa aton kaugalingon kag sa aton mga pamilya.