Pagdumala sing Pagtuon sa Biblia sa Puluy-an
1 Paano ginadumalahan ang isa ka epektibo nga pagtuon sa Biblia sa puluy-an? Paano pagabinagbinagon ang mga kasulatan? Sin-o ang magabasa sa mga parapo? Paano naton buligan ang estudyante nga himuon ang kamatuoran nga iya kaugalingon? Anong mga tugalbong ang dapat likawan?
2 Kon Paano Magdumala sing Pagtuon: Sa kabilugan nga hambal, ang pagtuon sa Biblia sa puluy-an kaangay sang Pagtinuon sa Lalantawan. Una, ginabasa ang parapo. Dayon ginapamangkot sang isa nga nagadumala sing pagtuon ang pamangkot sa sina nga parapo kag ginatugutan ang estudyante sa pagsabat. Kon ang estudyante nagapang-alag-ag, ang konduktor dapat maghatag sing mga leading question (mga pamangkot nga nagadul-ong sa sabat) sa pagbulig sa estudyante sa pagpangatarungan sa topiko kag sa paglab-ot sa nagakaigo nga konklusion.
3 Binagbinaga kon paano ang mga kasulatan naaplikar sa materyal. Ipakita sa estudyante ang ginbalikwat nga mga kasulatan, kag mangatarungan upod sa iya kon paano ini maaplikar. Kon ang mga kasulatan ginsitar apang wala ginbalikwat, maayo nga pangitaon ini sa Biblia. Dayon ipabasa ini sa estudyante kag pakumentuha sia kon paano ini nagasakdag sa ginasiling sa parapo.
4 Buligi ang Estudyante nga Himuon ang Kamatuoran nga Iya Kaugalingon: Palig-una ang mga estudyante sa paghanda sing maayo para sa pagtuon. Ipadaku nga ang pagbasa kinahanglanon sa pagtuon. Ginapabasa sang iban nga mga konduktor sa estudyante ang tanan nga mga parapo. Ang iban nagabulosbulos basa upod sa estudyante. Dapat gamiton ang maayo nga desisyon, nagahupot sa hunahuna sang espirituwal nga pag-uswag sang estudyante.
5 Ang rutina nga pagtuptop sa materyal sa pagtuon nga wala sing praktikal nga aplikasyon mahimo magabulig sa estudyante sa pagkuha sing ihibalo, apang nagapati bala sia sa natun-an niya? Agod ang kamatuoran mangin iya kaugalingon, pamangkuta sia kon paano sia naapektuhan sing personal sang materyal. Paano niya magamit ang natun-an niya? Gamita ang nagausisa nga mga pamangkot sa paglab-ot sa tagipusuon sang estudyante.
6 Likawi ang mga Tugalbong: May mga tugalbong nga dapat likawan kon nagadumala sing pagtuon sa Biblia. Kon may nag-utwas nga mga topiko nga wala sing labot sa materyal nga ginabinagbinag, labing maayo sa masami nga hambalan ini sa katapusan sang pagtuon ukon sa iban pa nga okasyon. Subong man, importante nga pasabton ang estudyante sa iya kaugalingon nga mga tinaga sa baylo nga ipabasa ini sa libro. Magabulig ini sa imo subong konduktor sa paghibalo kon bala nahangpan sang estudyante ang materyal.
7 Ngaa indi himuon nga imo tulumuron ang magdumala sing dimagkubos isa ka pagtuon sa Biblia? Indi ini isa ka mabudlay nga hilikuton kon magsalig ka kay Jehova kag magsunod sa sadsaran nga paagi sang Pagtinuon sa Lalantawan. Ang labing epektibo nga paagi sa paghimo sing mga disipulo amo ang pagdumala sing pagtuon sa Biblia sa puluy-an.—Mat. 28:19, 20.