Pamangkot

◼ Ano nga paagi ang sundon kon nagapresentar sing mga resolusyon sa kongregasyon?

Ang resolusyon ginakinahanglan kon dapat desisyunan ang importante nga mga butang subong sang pagbakal sing propiedad, pagkay-o ukon pagpatindog sing Kingdom Hall, pagpadala sing pinasahi nga mga amot sa Sosiedad, ukon pag-atipan sa mga gasto sang manugtatap sa sirkito. Kinaandan na nga labing maayo nga ipresentar ang resolusyon para sa aprobal kada tion nga ginagamit ang pondo sang kongregasyon.

Mahimo nga indi ilakip ang pinasahi nga mga kinahanglanon may kaangtanan sa importante nga mga proyekto ukon mga hilikuton. Halimbawa, ang kongregasyon mahimo mamat-od sing makaisa sa pag-amot sing espesipiko nga kantidad kada bulan sa Sosiedad para sa bug-os kalibutan nga hilikuton sa pagbantala ukon sa Kingdom Hall Fund. Subong man, ang kinaandan nga mga gasto sa pagpalakat sang Kingdom Hall, subong sang elektrisidad kag mga suplay sa pagpaninlo, wala nagakinahanglan sing resolusyon.

Kon may kinahanglanon, dapat ini hambalan sing maayo sang hubon sang mga gulang. Kon ang kalabanan nagaugyon sa paghimo sing pila ka butang, ang isa sa mga gulang, ayhan katapo sang Service Committee sang Kongregasyon, dapat maghanda sing nasulat nga resolusyon para ipresentar sa Miting sa Serbisyo.

Dapat ipaathag sing malip-ot sang gulang nga nagapanghikot subong tsirman ang kinahanglanon kag kon ano ang ginarekomendar sang hubon sang mga gulang agod maatipan ini. Nian ginahatagan sing kahigayunan ang kongregasyon nga mamangkot may kaangtanan sa sini. Kon masibod ini, ayhan labing maayo nga ipalantang ang botasyon tubtob sa masunod nga Miting sa Serbisyo agod hatagan ang tanan sing tion nga mahunahuna ang tuhoy sini. Ang aktuwal nga botasyon ginahimo sang mga katapo sang kongregasyon nga nagabayaw sang ila mga kamot.

Ang botasyon sa resolusyon ginalatiran sa dedikado kag bawtismado nga mga katapo sang kongrgasyon. Indi nagakaigo para sa mga bisita gikan sa iban nga mga kongregasyon nga makigbahin.

Sa tapos maaprobahan ang resolusyon, dapat ini petsahan, pirmahan kag itago sa file sang kongregasyon.