Daw Ano ka Mapuslanon nga Isugid Kon Ano ang Nahimo ni Jehova!
1 Ginlaygayan sang inspirado nga manunulat sang Salmo 48 ang mga taga-Israel nga ‘maglakat sa palibot sang Sion, isipon ang iya mga torre, usisaon ang mga pamakud niya, agod masugid nila ini sa kaliwatan nga nagasunod.’ Napahulag sang gugma kay Jehova, interesado gid sila sa tagsa ka detalye sadtong dutan-on nga sentro sang teokratikong paggahom. Daw ano gid ka hamili ini nga mga detalye bangod amo ini ang siudad nga ginbutangan ni Jehova sang iya ngalan! Magapamulong sila nahanungod sini, kag pat-uron nila ilabi na nga mabatian sang ila mga anak ang tanan nga mga butang nga ginpakabahandi nila sa ila kaugalingon nga mga tagipusuon.—Sal. 48:12, 13.
2 Nagakabuhi kita karon sa tion nga ang teokratikong paggahom sang Mesias ni Jehova wala na nasentro sa dutan-on nga Sion kundi sa langitnon nga Jerusalem. (Heb. 12:22) Ang Ginharian ni Jehova sa mga kamot ni Jesucristo nagagahom sugod sang 1914. (Bug. 12:10) Interesado gid kita sa pagpanghikot sini. Interesado man kita sa kon paano ginatuytuyan ni Jehova ang iya mga alagad sa duta agod matuman nila ang iya kabubut-on subong kitaon nga mga tiglawas sina nga Ginharian. Ang makawiwili nga mga detalye nahanungod sini ginalaragway sa aton bag-ong libro nga Jehovah’s Witnesses—Proclaimers of God’s Kingdom. Daw ano gid ang aton kalipay nga mabaton ini sa aton “Balaan nga Panudlo” nga Distrito nga Kombension sining karon lang!
3 Sang Septiembre 1, 1993, ang libro napaguwa na sa 20 ka hambal, kag ang pagbadbad kag pagbalhag ginahimo agod pun-an ang mga kinahanglanon sang nagapamulong sang 13 pa ka hambal. Nakakuha bala sing isa ka kopya ang inyo panimalay? Ginabasa bala ninyo ini? Ginahambalan bala ninyo ang mga butang nga inyo natun-an gikan sa sini?
4 Sa tapos matan-aw ang mga laragway kag mabasa ang mga kapsion, subong sang ginpanugda sa kombension, madamong kauturan nga lalaki kag babayi ang gilayon nga nagbasa sa pangunang bahin sang materyal. Ano ang ila mga komento? Yari ang pila lamang.
5 Ang isa ka utod nga babayi nagsulat: “Ini lamang ang libro nga nabaton ko nga luyag ko dayon matapos agod mabasa ko liwat. Yari na ako karon sa kapitulo 25. Sa akon labi nga pagbasa, labi nga nagatulo ang mga luha kag ang akon tagipusuon napuno sing gugma para kay Jehova. Ang libro makapalig-on gid kag makapabakod sang pagtuo.”
6 Ang isa ka utod nga lalaki nga nagaalagad kay Jehova sa kapin na sa 40 ka tuig nagsiling: “Wala ko gid marealisar kon daw ano ka makawiwili ini nga libro. Nagpulaw ako kag nagbangon sing temprano kag gintapos ang pagbasa sa sulod sang duha ka semana. Isa gid ini sang labing makatalandog nga mga libro nga nabasa ko. Isa ini ka obra-maestra sang panalawsaw apang isa man ka obra-maestra sang pagpalig-on.”
7 Isa ka Regular nga Programa sang Pagbasa: Ang iban nga nagbasa sa gilayon sang bug-os nga libro namat-od nga basahon ini liwat apang sini nga tion sing mas mahinay.
8 Kon may kapin sa isa ka katapo sang inyo panimalay ang yara sa kamatuoran, ayhan luyag ninyo nga gamiton ang mga bahin sang libro sa inyo pamilya nga pagtuon. Ginsugdan ina nga himuon sang pila ka pamilya mga pila ka adlaw lamang sa tapos nila nabaton ang isa ka kopya sa kombension. Wala ini nagakahulugan nga ang iban pa nga mga butang, subong sang paghanda para sa Pagtinuon sa Lalantawan, dapat patumbayaan. Apang ayhan masapwan mo nga tuman ka mapuslanon ang paggamit sing 15 ukon 20 minutos pa sa pagbasa kag sa paghinun-anon sang materyal gikan sa Proclaimers nga libro.
9 Ang iban nga mga pamilya nagabasa sing duha ukon tatlo ka pahina—ayhan isa ukon duha ka subtitulo—kada gab-i antes biyaan ang lamesa pagkatapos sang panyapon. Sing indibiduwal ayhan nabasa na nila ang kalabanan nga bahin sang libro, apang nagabenepisyo sila gikan sa mas mahinay nga pagtuptop upod ang kahigayunan nga mahinun-anunan ang materyal. Ang iban nga nagahimo sini madamong tinuig na nga nagaalagad kay Jehova. Samtang nagabasa sila, madamong makalilipay nga mga handumanan ang nagabalik. Ginapahalipay sini ang ila tagipusuon samtang ginahambalan nila ang ila kaugalingon nga mga bahin nahanungod sa ila nabasa.
10 Bangod sang mga kahimtangan sa inyo puluy-an, ayhan masapwan mo nga nagabasa ka sing isahanon. Ang isa ka utod nga babayi nga nagsulat sa Sosiedad nagsiling: “Ginabasa ko ining libro sing utay-utay kada gab-i antes magtulog. Ini nga libro nagatukod sa akon sang mas madalom nga apresasyon kag gugma sa kamatuoran, kag nagabatyag ako nga mas malapit kay Jehova kag nagapasalamat gid nga bahin ako sang iya organisasyon. Ginapanaboran ko gid ang tagsa ka pahina nga ginabasa ko.”
11 Bisan pa ang libro daku, ang indibiduwal nga mga bahin indi. Ang una nga bahin isa ka madasig apang makawiwili nga pagtuptop sa mga hitabo kutob sang panahon ni Abel tubtob sang tuig 1992—sa 108 ka pahina lamang. Ang iban nga mga bahin may yara 13 tubtob 150 ka pahina. Ang tagsa sining mga bahin ginbahinbahin sa pila ka kapitulo. Sa baylo nga dalidalion ini, binagbinaga ang isa ka seksion, isa ka kapitulo, ukon isa ka subtitulo sa isa ka tion; mahalipay kag manginpulos sa sini.
12 Maghinguyang sing Tion nga Hunahunaon ang Imo Nabasa: Ano ang mangin tulumuron mo samtang nagabasa ka? Ang pagtuptop lamang sang mga pahina—ang pagtapos sa libro—indi dapat ang mangin tulumuron mo. Ang Proclaimers nga libro nagaunod sing isa ka rekord sang inyo espirituwal nga palanublion. Dapat ninyo ini mahibaluan sing maayo. Maghinguyang sing tion nga hunahunaon ang indi direkta nga mga panugda sang ginabasa ninyo. Samtang ginarepaso ninyo ang hilikuton sang unang mga saksi ni Jehova, binagbinaga kon paano ninyo mailog ang ila pagtuo. (Heb. 12:1, 2) Kon ginabasa ninyo ang nahanungod sa pagluntad sang daku nga apostasya, talupangda ilabi na ang mga tugalbong nga nagsiod sadtong nagtalikod, upod ang pagtamod nga amligan ang inyo kaugalingon nga espirituwalidad. Kag samtang ginarepaso ninyo ang aton modernong-adlaw nga maragtas, panilagi ang espirituwal nga mga kinaiya sadtong gingamit sang Dios, kon paano nila ginpakita nga ang paghimo sang kabubut-on sang Dios amo ang pinakaimportante nga butang sa ila kabuhi, kag kon ano ang ila reaksion sa mga kahimtangan—ang pila sini tuman kabudlay—nga gintugutan sang Dios.—Heb. 13:7.
13 Masapwan ninyo nga nagapabakod sing pagtuo ang paghibalo sang mga detalye nga nagapakita kon paano gintuytuyan ni Jehova ang iya katawhan padulong sa maathag nga paghangop sang kamatuoran sang Biblia nga ginaagom naton karon. Ang inyo apresasyon sa kitaon nga kahimusan nga ginagamit ni Jehova magatubo samtang labi nga ginasayod ninyo ang pag-uswag sang organisasyon. Pat-od gid nga makunyag kamo samtang ginabasa ninyo kon paano, bilang katumanan sang tagna, ang maayong balita nakalab-ot sa pinakaukbong nga bahin sang duta. Ang inyo tagipusuon mahalipay sa mga eksperiensia sang mga matutom sa tanan nga bahin sang kalibutan nga nangabudlay sing makugi sa pagbantala sang Ginharian. Mapalig-on gid kamo sa pag-atubang sa personal nga mga pagtilaw samtang ginabasa ninyo kon ano na ang nabatas sang matutom nga mga kauturan nga lalaki kag babayi bangod sang ila gugma kay Jehova.
14 Sa tapos ninyo mabasa ang isa ka bahin sang materyal, maghinguyang sing tion nga hambalan sing tingob ang kabilihanan sini kag repasuhon ang mga detalye. Kon may yara kamo magagmay nga kabataan, ilakip sila paagi sa pagpaathag sang mga laragway kag sa pagsugid sa inyo kon ano ang ila nahibaluan tuhoy sa mga tawo nga ginpakita. Bisan kon nagabasa kamo sing isahanon, panikasugi nga ipaambit sa iban ang inyo natun-an. Subong nagakaigo, gamita ang materyal sa mga pagduaw liwat kag kon nagadumala sing mga pagtuon sa Biblia sa puluy-an. Ang inyo pagsulit magapatudok sini sa inyo hunahuna kag tagipusuon, kag mabuligan man ang iban sa sini.
15 Hatagi sing Interes ang mga Detalye: Ang mga panag-on nga ginhinguyang ninyo sa pagbasa sang Proclaimers nga libro dapat nga mangin makalilipay kag mapuslanon.
16 Luyag mo bala nga ang inyo pamilya makaduaw sa bug-os kalibutan nga mga ulong-talatapan sang mga Saksi ni Jehova? Ang pahina 208-9 nagapakita sang mga pasilidad nga gingamit sang Sosiedad sang nagligad nga isa ka siglo sa Pittsburgh. Ang pahina 216-17 nagasugid sa inyo sang mga tinukod nga gingamit sang ulihi sa Brooklyn. Ang mga laragway sa pahina 352-6 nagabulig sa imo nga mahanduraw ang bug-os kalibutan nga mga ulong-talatapan karon. Ang Kapitulo 26 kag 27 nagahatag sang mga detalye nahanungod sa hilikuton nga ginahimo sa Bethel, kag ang pahina 295-8 nagahatag sing dugang nga kasayuran nahanungod sa kabuhi sa Bethel.
17 Kalabanan sa aton wala makaduaw sa madamo nga mga sanga sang Sosiedad. Ang pahina 357-401 sang Proclaimers nga libro nagadala sa inyo sa isa ka paglibot sa bug-os nga kalibutan. Indi kinahanglan nga dalidalion mo ini. Maghinguyang sing diutay nga tion sa tagsa ka pungsod kag magkalipay sa sini. Gamita ang mapa sang kalibutan sa pahina 415-17 sa pagpangita sang tagsa ka lugar. Basaha ang mga komento nga nagaupod sa tagsa ka laragway sang sanga. Paagi sa indese masapwan man ninyo ang iban pa nga makawiwili nga impormasyon nahanungod sa tagsa ka pungsod. Gamita ining kahigayunan nga makilala ang mga katapo sang inyo espirituwal nga panimalay sa iban nga mga kadutaan.
18 Kon ang mga tawo nagatinipon sing sosyal, kon kaisa nagahampang sila nga nagadalahig sang ihibalo tuhoy sa sekular nga mga katunayan. Indi bala nga mas mapuslanon nga mahibaluan ang talalupangdon nga mga petsa kag mga hitabo sa modernong-adlaw nga maragtas sang katawhan ni Jehova? Masapwan ninyo ang madamo sini nga nalista sa pahina 718-23 sang Proclaimers nga libro. Ina nga listahan nagaaman sing sadsaran nga balayan; sarang ninyo ini madugangan gikan sa mga detalye nga masapwan sa nabilin nga bahin sang libro. Gamita ini subong sadsaran para sa repaso. Ayhan madali ini masaulo sang mga kabataan sa pamilya. Ang pila sa aton nga mga may edad-edad mahimo nga mas mahinay makasaulo. Apang mga detalye ini sang teokratikong maragtas nga tanan kita makabenepisyo gikan sa paghibalo. Sa tapos ninyo mahibal-an ang mga petsa kag sadsaran nga mga katunayan, magtukod sa sina nga pundasyon. Tan-awa kon pila ka detalye ang madumduman ninyo nahanungod sa tagsa ka hitabo. Nian hambali ang bahin sang tagsa ka hitabo sa pagtuman sang kabubut-on sang Dios. Masunod, hambali kon paano ini nag-apektar sang inyo kaugalingon nga kabuhi kag kon paano kamo makapasibu sa ginahimo ni Jehova.
19 Tan-awa ang mga Kahigayunan nga Bukas sa Inyo: Samtang ginabasa kag ginahambalan ninyo ang Jehovah’s Witnesses—Proclaimers of God’s Kingdom, masapwan ninyo nga nagabukas sa inyo talan-awon ang daku nga katumanan sang Isaias 60:22. Ang libro nagasiling sa pahina 519: “Ang katumanan sang saad nga ‘ang diutay mangin isa ka libo’ matuod gid nga natabo, kag sing bugana gid! Sa tagsa sang kapin sa 50 ka kadutaan diin wala anay bisan sing “diutay’—diin wala anay sang mga Saksi ni Jehova sang 1919, diin wala gid sila sing ginhimo nga pagbantala—may yara karon kapin sa isa ka libo ka dumalayaw ni Jehova. Sa pila sining mga kadutaan, may yara karon napulo ka libo, huo, kapin pa sa isa ka gatos ka libo, sang mga Saksi ni Jehova nga makugi nga nagabantala sang Ginharian sang Dios! Sa bug-os nga kalibutan, ang mga Saksi ni Jehova nangin ‘mabakod nga pungsod’—mas madamo sa kadamuon subong isa ka nahiusa nga tugob-globo nga kongregasyon sangsa indibiduwal nga populasyon sang bisan diin sang dimagkubos 80 ka nagagahom sa kaugalingon nga mga pungsod sa kalibutan.”
20 Ina nga hilikuton sang pag-uswag sang Ginharian wala pa matapos. Sa kabaliskaran, ginpadasig ni Jehova ini sa dimatupungan nga kadakuon. Tubtob diin kamo makigbahin sa sini? Nahibaluan gid bala ninyo ang tanan nga mga kahigayunan nga bukas sa inyo? Samtang nahibal-an ninyo ang ginahimo sang iban, kabay nga ang inyo tagipusuon mapahulag nga itanyag ang inyo kaugalingon agod makigbahin sing lubos sa daku nga hilikuton nga ginatuytuyan sang aton mahigugmaon nga Dios paagi kay Jesucristo sa aton adlaw.