Hatagi sing Dalayon nga Igtalupangod ang Imo Panudlo
1 Ang bag-ong programa sang Teokratikong Eskwelahan sa Pagministeryo magasugod sa Enero 1995. Ano ang bag-o sa programa? Ang makakulunyag nga maragtas sang modernong-adlaw nga organisasyon ni Jehova mangin ang tema nga pagahambalan sa kalabanan sang mga pamulongpulong sa pagpanudlo. Sa bug-os nga tuig, pagabinagbinagon ang 178 ka pahina sang libro nga Jehovah’s Witnesses—Proclaimers of God’s Kingdom. Sanglit wala sing repaso nga mga pamangkot pagkatapos sang pamulongpulong sa pagpanudlo gikan sa Proclaimers nga libro, ano ang sarang naton himuon agod mahatagan sing igtalupangod ang aton panudlo kag makabenepisyo sing daku?—1 Tim. 4:16.
2 Bisan pa nga madamo na ang nakabasa sang Proclaimers nga libro, ang pagbinagbinag sa sini sa eskwelahan magabulig sa tanan nga maapresyar sing labi pa ang ila teokratikong palanublion. (Sal. 71:17, 18) Ngaa indi mag-iskedyul sing pila ka oras kada semana sa pagrepaso sang gintangdo nga materyal sa Proclaimers nga libro?
3 Mapagsik kag Makawiwili nga mga Pamulongpulong sa Pagpanudlo: Ang mga pamulongpulong sa pagpanudlo gikan sa Proclaimers nga libro dapat ihatag sa isa ka mapagsik kag makawiwili nga paagi. Dapat man sini ipadaku ang mapuslanon nga kabilihanan sang impormasyon, nagagamit sini sa pagpatudok sang pagtahod sa organisasyon ni Jehova kag sa pag-apresyar sa aton mga pribilehiyo subong mga alagad sang Dios. Kon ang tagsa ka pamilya magadala sang kopya sang Proclaimers nga libro sa miting, sarang masundan sing maayo sang mga katapo sang pamilya ang pamulongpulong sa pagpanudlo kag makabenepisyo gikan sa mga laragway kag mga retrato sa libro.
4 Nagapahunahuna nga mga Pagbasa sa Biblia: Ang pagbasa sing maayo, upod ang nagakaigo nga pagpadaku sa ideya kag balatyagon, importante nga bahin sang epektibo nga pagtudlo. Dugang pa, ang gintangdo nga materyal nga pagabasahon sa Talk No. 2 indi malawig, kag busa may yara nagakaigo nga tion para sa nagabukas kag nagatakop nga komento sang humalambal. Ang introduksion dapat magapukaw sing interes sa materyal kag magahanda sa tumalambong sa paghantop sang mapuslanon nga kabilihanan sini. Ang konklusion mahimo maglakip sang nagapaathag nga mga komento kag pag-aplikar sa materyal, kag ginagamit sang humalambal ang tanan nga tion nga gintalana.
5 Ang dugang nga impormasyon sa programa sang eskwelahan kag sa kon paano ihatag ang mga asaynment masapwan sa “Theocratic Ministry School Schedule for 1995.” Ginahatagan naton sing igtalupangod ang aton panudlo paagi sa pagrepaso sa mga instruksion sa sining materyal, paagi sa paghanda sing maayo sang aton mga asaynment, kag paagi sa pag-aplikar sang laygay nga ginhatag. Yadtong wala pa makapalista sa eskwelahan mainit nga ginaagda sa pagpalista.