Madugangan Mo Bala ang Imo Pagdayaw kay Jehova sa Abril?

¹ Bug-os tagipusuon nga handum ni David nga dayawon si Jehova, kag gani sia nagsiling: “Magadayaw ako sing daku kay Jehova sa akon baba, kag magadayaw ako sa iya sa tunga sang madamo nga katawhan.” (Sal. 109:30) Ang Abril amo ang maayo nga tion nga ‘idugang sa tanan ang pagdayaw sa iya’ paagi sa pagpauswag sang aton bahin sa ministeryo. (Sal. 71:14) Plano mo bala nga himuon ini paagi sa pagbuylog sa mga auxiliary payunir?

² Magplano Karon: “Ang mga plano sang mapisan nagapadulong lamang sa kabuganaan,” siling sang Hulubaton 21:5. Ini nagakahulugan nga ipangamuyo naton ini nga butang kay Jehova, nagauna sa iya sa aton mga plano. (Hulu. 3:​5, 6) Masunod usisaa ang imo iskedyul agod tan-awon kon diin sarang mahimo ang mga pagpasibu sa paghinguyang sing duha ka oras sa isa ka adlaw sa ministeryo. Ang ‘pagbakal’ sang tion gikan sa iban nga mga hilikuton nagatugot sa imo nga mahinguyang ang madamo pa nga tion sa pagbantala nga hilikuton.​—Efe. 5:16.

³ Magkomunikar kag Magkooperar: Ginhinambitan ni apostol Pablo ang pila nga “nagapabakod nga bulig” sa iya sa pagtuman sang iya ministeryo. (Col. 4:11) Hambali ang imo mga plano upod sa iban nga luyag magpalista sa Abril. Ang ila supurta kag pagpakig-upod makahatag sing espirituwal nga mga bulig. Ang manugtatap sa pag-alagad makabulig sa imo kon may mga pamangkot ka nahanungod sa mga kahimusan sa pag-alagad.

⁴ Ang kooperasyon gikan sa sulod sang pamilya makabulig sa iban nga mga katapo sa pag-auxiliary payunir. Ang iskedyul sang mga hilikuton sa sulod-balay sarang mabag-o sing temporaryo. Ang paghambalanay sang pamilya tuhoy sa sining mga kinahanglanon makabulig sa pagtuman sang imo tulumuron. Ang maayo nga komunikasyon kag kooperasyon amo ang yabi sa kadalag-an.

⁵ Hupti ang Positibo nga Panimuot: Indi mangin maabtik sa pagsiling nga indi ka makaauxiliary payunir bangod sang indi maayo nga mga sirkunstansia. Ang mga pamatan-on sa eskwelahan, mga retirado, mga ginang sa puluy-an nga may mga kabataan, mga ulo sang pamilya nga nagatrabaho sing bug-os tion, ang tanan nakaauxiliary payunir sang Abril. Nagaugyon sila sa salmista nga “sa bahin sang mga matarong ang pagdayaw nagakaigo,” kag handa sila sa paghimo sing dugang nga panikasog sa paghinguyang sing 60 ka oras sa ministeryo. (Sal. 33:1) Kon indi ka makapalista, ngaa indi makigbahin sa kalipay paagi sa pagdugang sang imo hilikuton subong manugbantala?

⁶ Para sa madamo, ang pag-auxiliary payunir sa Abril nangin tulungtungan padulong sa pagregular payunir. Bangod gindugangan nila ang ila hilikuton, nangin mas mahapos sa ila ang magpalista subong mga regular payunir.

⁷ Ang Abril isa ka maayong tion para sa dugang nga teokratikong hilikuton, bangod sang maayong paniempo kag bakasyon sa eskwelahan. Sa masami makahimo kita sing dugang nga pagpanaksi sa kaagahon kag sa gab-i. Huo, ang pag-auxiliary payunir sa Abril isa ka maayo nga paagi sa pagdugang sang pagdayaw kay Jehova.