Mga Paagi sa Pagpauswag sang Aton Pagbantala sang Ginharian
1 Ang aton hilikuton sa pagbantala labi karon ka hilingagawon sangsa nagligad. Ang pagkabuhi ukon pagkapatay sang mga tawo nasandig sa ila reaksion sa maayong balita. (1 Ped. 4:5, 6, 17; Bug. 14:6, 7) Busa dapat naton pirme panikasugan nga mapauswag ang aton pagbantala sang Ginharian. Ano ang pila ka mga paagi agod mag-uswag?
2 Maghanda sing Maayo: Nagagamit sang bag-o nga guwa sang Ang Aton Ministeryo sa Ginharian, magpili sing isa ka presentasyon nga makagalanyat sa mga tawo sa inyo teritoryo. Ukon ayhan luyag ninyo maghanda sang inyo kaugalingon nga presentasyon, nagagamit sang mga Kasulatan nga nasapwan ninyo nga epektibo. Kinahanglan ninyo ang makapukaw sing interes nga introduksion. (Tan-awa ang Reasoning nga libro, pahina 9-15.) Ayhan ginaplano ninyo nga pamangkuton ukon pangayuon ang komento sang tagbalay nahanungod sa isa ka lokal nga balita. Kon may nahunahuna kamo nga presentasyon, ensayuha ini upod sa isa ka katapo sang pamilya ukon sa isa pa ka manugbantala nga sarang makahatag sa inyo sing mga panugda sa pag-uswag.
3 Makighambal sa mga Tawo: Ang tuyo naton amo ang ipaalinton ang importante nga mensahe. Sarang ini mahimo paagi sa pagpakighambal sa mga tawo. Kon ang tagbalay magabangon sing pagpamatok ukon magahatag sing opinyon, pamatii sing maayo ang inugsiling niya. Ang iya mga komento magabulig sa inyo sa paghatag sing Makasulatanhon nga sabat. (1 Ped. 3:15) Kon ang iya pagtamod wala nagaugyon sa Biblia, mahimo kamo makasiling: “Madamo nga tawo ang may panghunahuna pareho sa imo. Apang, yari ang isa pa ka paagi sa pagbinagbinag sa tema.” Nian basaha ang nagakaigo nga teksto, kag pakomentuha sia.
4 Magtigayon sing Mapasibusibuon nga Iskedyul: Diutay ang kabilihanan sang maayo nga paghanda kon indi ninyo masugilanon ang mga tawo. Sa iban nga mga lugar karon diutay lamang nga mga tagbalay ang yara sa balay sa pagduaw naton. Kon matuod ina sa inyo teritoryo, tilawi nga bag-uhon ang inyo iskedyul agod makaduaw kamo sa tion nga mas madamo nga tawo ang yara sa puluy-an. Ayhan ang labing maayo nga tion sa pagduaw amo ang mga talipuspusan sang semana; ang iban mahimo nga mas mahapos masugilanon sa gab-i. Sa kabilugan ang mga tawo mas relaks kag mas handa sa pagpakigsugilanon sa sina nga mga tion.
5 Usisaa sing Maayo ang Pagkaepektibo sang Inyo Presentasyon: Sa pagtalikod sa tagsa ka ganhaan, pamangkuta ang inyo kaugalingon: ‘Nalab-ot ko bala ang tagipusuon sang tagbalay? Napalig-on ko bala sia sa paghambal kag ginpamatian ang ginsiling niya? Nangin mataktikanhon bala ako sa pagsabat? Gingamit ko bala ang labing maayo nga pagpalapit?’ Ayhan mabuligon ang mangabudlay kaupod sang isa ka eksperiensiado nga manugbantala ukon isa ka payunir sa tion kag tion kag mamati sing maayo sa iya mga presentasyon agod mapauswag ang inyo pagkaepektibo sa ministeryo.
6 Kon malantipon kamo sa inyo hilikuton, mapaambit ninyo ang mga kamatuoran sang Ginharian nga ‘magaluwas sang [inyo] kaugalingon kag sang mga nagapamati sa [inyo].’—1 Tim. 4:16; Hulu. 22:29.