Bag-ong Programa sang Sirkito nga Asambleya
1 Ang tema nga pagabinagbinagon sa bag-ong programa sang sirkito nga asambleya nga magasugod sa Pebrero amo ang “Magpabilin nga Nagamata, Magpabilin nga Malig-on, Magmabakod.” Ginpasad ini sa mga pulong sang pagpalig-on ni Pablo sa 1 Corinto 16:13.
2 Ang programa magasugod paagi sa pagpadaku sang aton dalayon nga kinahanglanon para sa espirituwal nga pag-usisa sa kaugalingon. Ang paghupot sing mabakod nga tindog para sa kon ano ang husto sa sining “katapusan nga mga adlaw” nagakinahanglan sang pagbinagbinag sa aton kaangtanan kay Jehova kag sa aton tindog upod sa dutan-on nga organisasyon. (2 Tim. 3:1) Dapat kita tudluan sa mga paagi nga mapauswag ang aton Cristianong mga kinaiya kag mahuptan ang huwaran nga paggawi.
3 Ang kinahanglanon nga magmakugi sa paghimo sing disipulo nga hilikuton samtang nagahimud-os nga malab-ot ang espirituwal nga pag-uswag kag responsabilidad ipadaku man. Ang praktikal nga mga panugda sa kon paano mahuptan sang mga indibiduwal kag mga pamilya ang tayuyon nga programa sang espirituwal nga pagkaon igahatag sa nanuhaytuhay nga mga pamulongpulong, mga demonstrasyon, kag mga paghinun-anon.
4 Sa Sabado ang kalipikado nga mga kandidato magahimo sing dayag nga pagpahayag sang ila dedikasyon paagi sa pagpatugmaw sa tubig. Nian, sa Domingo kita tanan magatambong sa pamulongpulong publiko, nga natig-uluhan “Ano Bala ang Imo Tindog sa Dios?”
5 Ang programa pagatakpan paagi sa pagpalig-on nga magpabilin nga malig-on sa pagtuo, nga pirme nagapakig-angot sa isa kag isa sa espiritu sang gugma kag paghidait. Ang sirkito nga asambleya amo ang isa sa mga kahigayunan nga ginaaman ni Jehova para sa aton sa ‘pagpukaw sa isa kag isa sa gugma kag sa maayong mga buhat.’ (Heb. 10:24, 25) Maghimo sing pat-od nga mga plano nga tambungan ang bug-os nga programa sa duha ka adlaw.