Pagtanyag sing Maayong Balita nga May Positibo nga Panimuot
1 Luyag naton tanan makasapo sing kalipay sa aton ginahimo, labi na sa paghimo-sing-disipulo nga hilikuton. Ano ang nagahatag sa aton sing amo nga kaayawan? Nagasugod ini paagi sa paghupot naton sing positibo nga panimuot sa hunahuna kon nagabulig sa iban. (Hulu. 11:25) Dapat makita sa aton pamaagi sa pagtanyag sing maayong balita nga nagapati gid kita sa kon ano ang aton ginasiling. Kon maghambal kita sing tinagipusuon, nian ang aton kahanuot kag personal nga pagpati magaiwag. (Luc. 6:45) Paagi sa pag-ensayo sang aton presentasyon, mangin mas may kompiansa kita kon nagapakigsugilanon sa tawo. Magabulig ini sa aton ilabi na sa Septiembre kon nagatanyag sing libro nga Life—How Did It Get Here? By Evolution or by Creation? Masapwan mo ang masunod nga mga panugda nga mabuligon.
2 Kon nagatanyag sing “Creation” nga libro, mahimo mo ini masiling sa nahaunang pagduaw:
◼ “Sa pagpakighambal sa amon mga kaingod, nasapwan namon nga ang iban may pagsalig sa Dios. Ang iban naman nabudlayan sa pagpati sa iya. Kamusta naman ikaw? [Pasabta sia.] Talupangda kon paano nagapangatarungan ang Biblia nahanungod sini. [Basaha ang Roma 1:20.] Makakita kita sing pamatuod tuhoy sa ‘dayon nga gahom kag pagka-Dios’ sang Dios paagi sa pagpanilag sa mga butang nga gintuga niya.” Basaha ang katapusan nga parapo sa pahina 48 sang Creation nga libro, kag ipatalupangod ang kasibod sang buhi nga selula. Ukon gamita ang parapo 18 sa pahina 147 sa pagpakita kon paano ginapadaku sang makatilingala nga sirkulatoryo nga sistema sang kahoy ang binuhatan sang isa ka Manunuga. Itanyag ang libro kag maghimo sing kahimusan nga makabalik.
3 Kon nagaduaw liwat sa mga nasugilanon mo tuhoy sa pagka-Manunuga sang Dios, ayhan luyag mo ini isiling:
◼ “Sang nagligad nga pagduaw ko, ginhambalan naton ang nahanungod sa ebidensia sang pagluntad sang Dios—ang iya makatilingala nga tinuga. Nabudlayan ka bala sa pagpati nga ang Isa nga nagtuga sang uniberso mangin interesado man sa aton palaabuton? [Pasabta sia.] Makawiwili talupangdon nga napat-od na sang Manunuga ang palaabuton.” Basaha ang Isaias 46:9, 10. Depende sa interes sang indibiduwal, gamita ang mga larawan kag mga kapsion sa kapitulo 19 sang Creation nga libro sa pagpatalupangod sa matahom nga mga kahimtangan nga ginsaad sang Dios. Basaha ang parapo 1 sang kapitulo 20, kag magtanyag sing pagtuon sa Biblia. Kon ginbaton, sugdi ang pagtuon sa Ihibalo nga libro.
4 Mahimo mo tilawan ining presentasyon kon nagatanyag sing “Creation” nga libro:
◼ “Sa pagpakighambal ko sa imo mga kaingod, napanilagan ko nga ang kalabanan nagahandum sing isa ka walay peligro nga komunidad kag isa ka mahidaiton nga kalibutan. Ngaa, sa banta mo, napaslawan ang tawo sa pagtigayon sini nga mga kahimtangan? [Pasabta sia.] Ang iban nga mga lider mahimo nga sinsero kag nagahimo sing maayo, apang talupangda kon ano ang ginalaygay sang Biblia.” Basaha ang Salmo 146:3, 4; nian mamangkot: “May makapaayaw bala sang mga kinahanglanon sang tawo?” Basaha ang bersikulo 5 kag 6. Ipakita ang larawan sa pahina 251 sang Creation nga libro, kag ipatalupangod ang mga benepisyo sang paggahom sang Dios. Itanyag ang libro.
5 Kon ang pagginahom sang Dios ginhambalan sang nagligad, mahimo mo tilawan ining panugda sa pagduaw liwat:
◼ “Sang yari ako diri sang nagligad nga pila ka adlaw, ginhambalan naton ang kapaslawan sang tawo sa pagpaluntad sing paghidait sa duta. Ayhan nadumduman mo ang rason nga ginahatag sang Biblia sa sinang kapaslawan. [Basaha liwat ang Salmo 146:3.] Natalupangdan mo bala kon ngaa nagalaygay sa aton ang Dios nga indi naton pag-ibutang ang aton pagsalig sa mga tawo? [Pasabta sia.] Ayhan nagaugyon ka nga ang bisan anong paglaum para sa permanente nga solusyon dapat nga maghalin sa Dios. Ang rason naton sa sining pagsalig ginapaathag sa Salmo 146:10. [Basaha.] Kon luyag naton mangin sakop sang Ginharian sang Dios, ano ang dapat naton himuon?” Buksi ang pahina 250 sang Creation nga libro, basaha ang parapo 13, kag ipadaku ang Juan 17:3. Magpanugda nga ipasundayag mo kon paano matigayon ang ihibalo nga nagadul-ong sa kabuhi nga walay katapusan. Kon gintugutan, ipakilala ang Ihibalo nga libro kag sugdi ang pagtuon.
6 Kon nagabantala sa mga balaligyaan, mahimo mo gamiton ining malip-ot nga paagi sa “Creation” nga libro:
◼ “Nagahimo kami karon sing pinasahi nga serbisyo sa mga negosyante sang komunidad. Kita tanan nabalaka sa pagdamo sang krimen kag kasingki sa aton lugar. May isa bala, sa banta mo, nga may solusyon gid sa problema? [Pasabta sia.] Ang Dios may solusyon.” Buksi ang pahina 196 sang Creation nga libro; basaha kag komentuhi ang Hulubaton 2:21, 22 sa parapo 19. Ipakita ang titulo sang kapitulo 16, kag itanyag ang libro.
7 Kon nagaduaw liwat sa isa ka negosyante nga napahamtangan mo sing “Creation” nga libro, mahimo mo ini masiling:
◼ “Sang nagligad ko nga pagduaw, nasambit ko nga ang Dios gid lamang ang may mapinadayunon nga solusyon sa krimen kag kasingki. Suno sa saad niya, makasalig kita nga ang isa ka mahidaiton nga duta magaluntad. Talupangda ang pagpili nga ginapahamtang sa atubangan sang kada isa sa aton.” Basaha ang parapo 11 sa pahina 250 sang Creation nga libro, lakip ang Salmo 37:37, 38. Komentuhi ang larawan sa pahina 251, kag basaha ang nahaunang dinalan sang parapo 14. Itanyag ang walay bayad nga pagtuon sa Biblia sa puluy-an, nga pagahiwaton sa ila puwesto ukon sa ila puluy-an.
8 Subong “mga masigkamanugpangabudlay sang Dios,” may rason gid kita nga magmangin positibo kon nagatanyag sing maayong balita. (1 Cor. 3:9) Ang paghupot naton sini nga panimuot magaresulta sa bugana nga pagpakamaayo ni Jehova.